MARK 7

Npvü Nbonyu Jvü

(Mt 15:1-9)

1Lo tsüsika Jerusalem nyu keryü Farisinyu dan lo lesükeshatsin nyu dan-e tse ryüo a-khoka kequenlo. 2Lo temi tsüdan le a-le senthyükelo nyu peha le a-ben nshün mvuo, npvü nbonnyu nyünyü jvü zenmvuo a-ben tsemvu tse chvü tyü kebin hyushü.

3(Kechamvule Farisinyu lo Judanyu aphu npvü nbon nyu jvü zen-o a-ben tsela kemvu we tyütsü hü kemvu genyu. 4Lo anyugun le hakethyü bin ki hüo ryüe zülu la kemvu we tyütsü hümvu. Tsüntimvule anyugun le zen mvulokeshvu honpen, khun, la, lo lazogi pe kethyü dan kesü kethyü jvü kechon le bin kehü genyu.)

5Tsükatsü Farisinyu lo lesü keshatsin nyu dan le zo-o, “Nyuthyüo nle senthyükelo dan le npvü nbon nyu jvu zen mvuo anyugun ben no nshün mvu tse tyü hü nla?” tson-o a-ketso so.

6Tsontsin a-le anyugun ka, “Isaya le nduka hagun kerokon kehünyu rüla:

‘Temi hidan le a-mün pe arühvu

kehü gwünzin,

ai anyugun nyun we azen-o nithen

bin hünyo.

7Lo anyugun le temi le kethyü jvü pe

Sunggigü jvü hontseo anyugun le

akerüshvu nyu thaja thyü kehü gwünzin!’

8“Hagun le Sunggigü le A-jo khikeshü khelao temi le a-npvü thyükeshü jvü gü zen hü laso.”

9Lo tsüntimvule a-le anyugun ka, “Hagun le hagun pvübon nyu jvü zen titseo Sunggigü le khikeshü jvü gü khekela jvü sha salo laso. 10Mosa le nduka, ‘Npvü njvünyu rühvulo,’ tsonshü. Lo temi lihigüe a-pepvünyu ge jo gwakemvu zolo, tsügü no sila chi! tson zo njü. 11Ai hagun we zokehü le temi nme le a-pvü nmvue a-jvü ka, ‘Ano n cheshü nrün hile Korban laso’ (a-kon le pe Sunggigü tenyenla so). 12Tson-o hagun le tsügü no a-pvü nmvue a-jvü ka tha thyüshü kezügü thyüshü hü mvu. 13Lo tsühontse thyüo hagun le hagun npvü hagun pvübon nyu jvü pe me senthyüo Sunggigü jo we no a-kerun thyü la hü; lo tsühontse kethyü kechon ki-e hagun le thyü hü laso,” tson zoshü.

Ngwün Nrhula Kehü dan

(Mt 15:10-20)

14Lo tsüsika a-le temi dan kope a-ki shülo njüo anyugun ka zo, “Hagun aphu ajo nyülo njüo shalo nye. 15Tha nme-e tegwen ki temi nyun nyu yüo temi gwün nrhula hü mvu, ai temi nyun ki chwiryü kehügü le a-npvü temi gwün nrhula kehü gwünzin. 16Temi lihigüe a-nyetin kebin nyu no nyü lo nye.”

17Lo tsüsika a-le tin sen-o temi dan nyu kanyu ki yülo ntsin, a-le senthyükelo nyu dan le a-ka jokejvü tsü a-kon ketsoshü. 18Tsontsin a-le anyugun ka, “Hagun-e thasha mvu pe hitsüla ki thyü hü zun ole? Tegwen ki temi nyunki keyü dan le temi thyü nrhula loho. 19Tsüle a-nyunki yüo khipe kevü bin ki shwenla kehü tsü hagun le rüchünlo hü mvu ole.” (Tson-o a-le ketyüketsü aphu le nshün letse la.)

20Tsüntimvule a-le anyugun ka, “Temi nyunki chwiryü kehügü tsü le temi thyü nrhula hünyo. 21Kechamvule temi nyun ki temi nyun kendo gwakemvu, 22keyüla, kerühu, medukeshvu, ketepen, kemu nyun kepvü, nku kethyü, keso keyhüdyü kethyü, me shwipe a-yhükethyü, me swetsü kethyü, ketekho kethyü, lo keshyelu kethyü le chwiryü hünyo. 23Tha gwakemvu aphu nnyun ki chwiryüo temi thyü nrhula kehü gwünzin.”

Sirofonikia nyu Tenugi Ketenyen

(Mt 15:21-28)

24Lo tsüsika a-le Tur lo Sidon hvu rünyi kho kipon gunla, tson-o a-le ka nme nyu yüo me no tsü shanyü mvula, ai a-le kebu loho la. 25Tsükatsü tenunyu nme a-nyu le nshünkemvu kapu no semen zen kehü, nme le a-rüla shashüo ryü nkhüntsü gü a-pha nyu zhülo la. 26Lo tenunyu tsügi tsüle Griknyu Sirofonikia nyu nme. Lo Tenunyu tsügi le a-no a-nyugi ge tero gwakemvu tsü hüla lo tseo a-ka hi tenge tse sola. 27Tsontsin a-le tenunyu tsügi ka, “Ntsenyu no a-ginyülo terilo; kechamvule ntsenyu ketyüketsü sen gü tehi tsü kela le a-zü mvu kethyü genyu.”

28Ai tenunyu tsügi le a-ka, “Npugü, ai tehi ko ntsenyu le ketyüketsü hensinki tyütsü kerhi keshü fütyü hünyo.”

29Tsontsin a-le tenunyu tsügi ka zo, “Jo higenyu nle tin gunlo chi, tero gwakemvugü le nnyugi ge chwila sele!”

30Tsonshü ntsin tenunyu tsügi le a-npvü a-ka ki gun-o a-nyugi le noge zhü kebin lo tero gwakemvu gü le a-ge chwikela hyulo.

Jisu Le Kepinnyu Nme Lo Kerügünyu Nme Tse Thyüngwakeshü

31Lo a-le Tur rünyi khokipon chwio Sidon rünyi khokipon rhon sen tse Dikapoli rüyi kho Galil züda ki chwiryü. 32Tsükatsü mele a-nyetin kerügü nyu lo jozo ntsenlo hü kemvunyu nme zen-o a-ki ryü; tson-o anyugun le a-no a-ben pe tsügü kesü shülo tse hi tenge tse sola. 33Tsontsin a-le temi dan nyu a-zen kecha thyü gü a-zenkero pe tsügü nyetin hvu keshü shü, lo a-yi ko kesüshü. 34Tson-o tsangge nrio a-nyun gwakemvu khwen thyüo a-ka, “Efata,” a-kon le “Pechwiryülo ta.”

35Tsontsin a-nyetin kü tsüle pechwiryülo, lo a-yi kephin-e shwü chwiryülo-o jozo ntsenlo la. 36Tson-o a-le temi dan no tsü pe me ka zo nyalo tse khin shü. ai anyugun le tsü pe me ka zo chon sa shüla. 37Tson-o me no me dunthyü sario, “A-le tha lihi thyüshüe thyü pe gwasa shüla sele! A-le a-nyetin gwakemvunyue no thakhwen nyülo, lo jozolo hü kemvu nyue no jozolo la sele!” Tson sola.

Currently Selected:

MARK 7: REGSBSI

Highlight

Copy