MARK 6

Nazaretnyu Le Jisu Zenlomvu Kela

(Mt 13:53-58; Lk 4:16-30)

1Tsüsika a-le tsünyu chwio a-npvü a-rünyi ki tsü gunla; lo a-le senthyükelo nyu dan ko a-sithen gun. 2Lo tsükatsü a-le Sabbath jon tilo ntsin sinagog ka nyu yüo me senthyü so; lo tsüka temi kechon le a-senkethyü jo nyü pe anyugun dun thyüo, “Temi higü hile dikipon tha hihontse kethyü hyulo la? Lo khipe a-ketsü thakesha hiko tha dihontse kethyü nme la? Lo A-ben nyu thakeda hihontse kethyü nyu tsethyü thyülo hü nla? 3Higü hile tesen mistri gü, a-jvü le Maria lo a-sikezen nyu dan le Jakob, Joses, Juda lo Simon nyugun mvu ole? Lo a-lüginyue ngun zen-o hinyu bin mvu ole?” Tson-o anyugun le a-ge anyugun nyun ntala.

4Tsüselo Jisu le anyugun ka, “Sidyükeshanyu le a-npvü a-rünyi lo a-npvü a-kaminyu lo a-kakhwün nyeki we teshwen pvü kemvu thyü hü mvu.”

5Tson-o a-le kehonyu dan me kesüshüo thyü kesherhün keshü nyeki tsünyu tha keda thyüsin shü mvula. 6Lo tsüntimvule anyugun le tenyen kemvu genyu a-no a-dunthyü sala.

Tseryü kenyhunche dan Nikeshü.

(Mt 10:5-15; Lk 9:1-6)

7Lo tsükatsü a-le rünyi nyu ntsü gungü me senthyü. Lo a-le tseryü kenyhunche dan kope a-khoki shülo njüo anyugun mihvu hvu nishü; lo a-le anyugun no nshünkemvu kapu so bin kelo kekvu khishü. 8lo a-le anyugun ka ahza shüo, “Hagun kenjwen ka thün nme nyeki tensü-e, thakhvü-e, senkephin nyu seki rakae thame sen nyalo tsela.” 9Lo anyugun no phaje we pvülo, ai mirün we kenyhun ben nyalo tsela. 10Tsüntimvule a-le anyugun ka, “Hagun ka lika hika yülo yatse-e hagun le rünyi tsünyu tinla kemvuthen ka tsügü nyu binlo. 11Lo lihikae mele hagun zenlo mvu, nmvue hagun khwen-e nyü mvu yatselo, hagun le rünyi tsünyu tin kezhü ka anyugun no shalo nrün genyu hagun pha ge kemphü le kebin dan-e kekhü shü lachi!”

12Tsüselo anyugun le gungü meno me nyunkelulo lotse zope me senthyüshü. 13Lo anyugun le tero gwakemvu kechon hüla. Lo kehokenyü nyu ge terzü pe anyugun yünshüo temi kechon thyü kesherhün shü.

Johan Baptist Gü Kesi Rüla

(Mt 14:1-12; Lk 9:7-9)

14Tsükatsü me le Jisu zan kechwi shagun kela raja gü Herod ko tsü shalo, lo peha le kezo le, Johan Baptist gü le kesinyu dan nyu rhünni soryüla so; tsügenyu a-ge tha kekvu hidan hithyülo hü nle tse zo.

15Ai kechanyu peha le hile Elia le, lo peha le nmvu, ai a-ko sidyükeshanyu nme le.

16Ai Herod le tsü shalo ntsin nduka a-le a-pe gwenkelagü Johan le rhünni soryüla sele tse so. 17Nduka Herod le a-npvü a-sikezen gü Filip nu Herodia genyu me nipe Johan tenlo-o phin pe doka nyu shüla; Herod le tenu tsügi lolo kela genyu. 18Kechamvule Johan le Herod ka, “Nle n npvü nsikezen gü nu lolo kela tsü le tejvü kemvu; tsonzo keshü genyu!”

19Tsügenyu Herodia ko Johan ge a-kenyü mvuo a-dushvula nyü so; ai tsü thyülo nrün ndila. 20Kechamvule Herod le Johan hile kentsen nyu lo kenshün nyu nme tsekethyü shao nshvuo a-ntsen lola. Tson-o a-jo shakelo ka a-nyun keyhunkerunlo lala tse hü, ai a-khwen kenyü we nyü lolo tse ryü. 21Tson hüo a gwünkho kegwa nme hyulo; lo tsüle Herod kenyu jon nyü a-hensin kedanyu lo shüpahü nyu so keda nyu lo Galil nyu pelü dan zen-o keho nme thyü. 22Lo tsükatsü Herodia nyugi le a-npvü yügü Herod lo a-ka nyu ho kebin ju mhundyü nyu nashü pe gwasa shü. Tsontsin kedagü le lünyu tsügi ka, “Nle aka tha lihi-e nkenyü hilo chi, lo ale pe ntsü shü ti.” 23Tson-o a-le tsügi mhundyü nyu swe-o, “Nle aka tha lihi-e hi-o akeda pehae hilo pe ntsü ti,” tson.

24Tsontsin tsügi le chwigü a-jvü ka, “Ano nyu hi mon?” tson-o ketsoshü ntsin, a-jvü le, “ Johan baptist gü pe ti,” tsonshü.

25Tsonshü ntsin a-le kedagü ka yügü, “Nle John baptist gü pe lope khun nme ka shü pe atsü whütse shülo akenyü tile,” tson-o hi sola.

26Tsonshü ntsin kedagü le a-nyun kenjünthyü lola; ai a-npvü a-keswe genyu, lo ryüo ho kebin nyu dan genyu tenunyu tsügi jo kenilo shvula. 27Tson-o a-le rikhun kebin shüpahü nyu nme nishüo no Johan pe gwen senryü lotse zoshü la, lo tsügü le gungü doka nyu Johan pe gwenlo. 28Tson-o pe khun nme ka shü sengü lünyu tsügi tsüla; tson-o tsügi le pe a-jvü tsüla. 29Lo John le senthyükelo nyu dan le tsü nyülo njüo a-min pen gungü sika nme nyu sunla.

Jisu le Temi Yiepvün Ginthyü Keshü

(Mt 14:13-21; Lk 9:10-17; Jn 6:1-14)

30Tsüsika senthyükelo nyu dan le Jisu ka ryüo tha lihi-e thyükela lo zope me senthyü kela aphu pe a-ka zo küshü. 31Tsontsin a-le anyugun ka zo, “N gun npvü tin-o gü mele hü kemvu binki n gun npvü ryüyü dinlo tije; ” kechamvule temi kensin kenshye chonrio Jisu lo a-le senthyükelonyu dan le ketyüketsü gwünkhoe ndi kela genyu. 32Lo tsükatsü anyugun le run nme nyu yüo me kendi bin nme ki gunla.

33Lo mele anyugun le kegun hyushüo temi kechon le tin kehü gü anyugun mhundyü rilo la. 34Lo tsükatsü a-le chwiryüo temi danda nme hyulo; lo temi tsüdan le tanyü a-kekhwen kendi hontse kethyü genyu anyugun shwi njünla. Tson-o a-le tha kechon zope anyugun senthyü so. 35Tson bin-o tsangkeben jon gübu zhüla ntsin, a-le senthyükelonyu dan le ryüo a-ka, “Hile tehen ki so, lo tsangkeben jon-e güzhü bula so. 36Tsügenyu anyugun no lukipon hikipon lo low nyu-e lo rünyi nyu-e gunlo-o anyugun no anyugun pvügin-e heilo nrün genyu anyugu nishüla gwünlo.”

37Ai Jisu le anyugun ka, “Hagun npvü anyugun ginthyü shü chi.”

Tsontsin anyugun le a-ka, “Nle agun no gü rakagi tsihvu pe tensü hei sen ryüo anyugun ginthyü shülo tse ole?”

38Tsontsin a-le anyugun ka, “Hagun le tensü dikho sen hü nla? Gü shwishü chi.”

Lo tsükatsü anyugun le shalo njüo a-ka, “Tensü pvü pvün, lo tsehü kenyhun le.”

39Tsontsin a-le temi dan no a-dan kechacha thyüo tehen kenjvü soge dun külo lo tse zoshü. 40Tsontsin anyugun le tsitsi lo henpvün pvün tseo a-tson kechacha thyüo dun külo. 41Tsüselo a-le tensü pvü pvün lo tsehü hvu tse khipenlo njüo tsangge nrio jochü shü. Njüo tensü dan boshwenlo-o pe senthyükelo nyu dan tsüshüo no khipe temi dan tsüshülo tse shü. A-le tsehü hvu ko kenjün pe temi dan tsüshü. 42Lo anyugun aphu tyüo anyugun ginnyü külo. 43Lo tsükatsü anyugun le tsehü lo tensü tyü kensen tsü khü pe khvütsü tseryü kenyhun che sünilo. 44Lo tsüka anyugun kengüo tensü ketyü temi le pechenyu yiepvün.

Jisu Le Zü Soge Tsonchü Kethyü

45Tsüsika a-le temi dan nishüla titseo a-le senthyükelo nyu dan no run nyu yüo a-mhundyü richwi gü lukipon Betsaida nyu gunlo lotse zoshü. 46Tson-o a-le anyugun zen kekho sen-o rincho ge gungü hi tinla. 47Tsüselo khejeki thyülo ntsin run tsüle züda chvü ki gunla, lo awe a-npvü kesinki hü. 48Lo tsangkenbu le anyugun mhundyü kipon anyugun whünlo kela anyugun le anyugun run thu kenjünthyü sa kehü hyushüo rikhun kelu pezi gü gwünkho ka a-le züda soge tsonchü sen-o gungü anyugun zen-o hü tinla nyüo gunzhü. 49Ai nyugun le a-le zü soge tsonchü kehü hyushüo a-lope rümen nme sele tseo nra sen sola. 50Kechamvule anyugun aphu a-hyushüo anyugun nyun keyhunkerunlo kela genyu.

Tson-e a-le anyun kerhün thyüo anyugun ka, “Hagun dyübenlo chi! Ale mare, nshvu nya chi!” 51Tson-o a-le anyugun run nyu yülo; tsontsin tsang le nbu mvula. Tsügenyu anyugun le anyugun dunthyüla. 52Kechamvule anyugun le tensü ketyü rülae rüchünlo mvula, tsonkethyü gü mvule anyugun nyun-e tha rüchünlo mvula.

Jisu Le Genesaret Nyu Kehonyu Thyü Ngwakeshü

(Mt 14:34-36)

53Tsüsika anyugun le tsü nken gü Genesaret lojvü nyu ryüo run no züda seka binlo. 54Tson-o anyugun le run nyu chwiryülo ntsin mele anyugun shalo la. 55Tson-o tsüte tsümhun rünyi aphu nyu kehokenyü nyu pen-o a-le bin tsekethyü kesha bin nyu ryü sola. 56Tson-o a-le nyishwen kae lo nyida kae, lo low nyu-e tse a-le kegun aphu ka anyugun le kehokenyünyu pen gungü hakethyü bin nyu-e shüshüo tsüdan no a-phishwe-e kesükelo rüchün-o a-ka hi tenge tse sola. Lo a-kesü kelonyu aphu sherhün külo la.

Currently Selected:

MARK 6: REGSBSI

Highlight

Copy