MARK 8

Jisu le Yiezi Ginthyü Keshü

(Mt 15:32-39)

1Lo tsügwünkho ka temi danda nme le gungü kequenlo, lo anyugun le ketyüketsü nme-e sen hü mvu; lo a-le a-senthyükelonyu dan kolo njüo anyugun ka, 2“Ale temi hidan shwi njün laso, anyugun le jonshen a-zen hü laso, lo ketyüketsü nme-e sen hü kemvu genyu. 3Lo ale anyugun no tyütsü mvutse anyugun nishülo, anyugun le tsonsela nyu pesi lati; anyugun peha le tsonthon ki ryü kenbin genyu.”

4Tsontsin a-le senthyükelo nyu dan le a-ka, “Segü le tehen terho hihontse kethyü pvünyu nyu tsethyüo tensü hyu pe temi hitsü laki ginthyü logwa tila?”

5Tsontsin a-le anyugun ka, “Hagun le tensü dikho sen hü nla,” tson-o anyugun ketso.

Lo anyugun le a-ka zo, “Tensü tsenyü le.”

6Tsontsin a-le temi dan no kazü nyu dun külo lotse so; lo a-le tensü tsenyü tsü khisenlo-o Sunggigü shwenshüo khipe temi dan tsüshülo tseo a-le senthyükelo nyu dan tsüshü. Lo anyugun ko pe temi dan kenjünshü. 7Lo anyugun le tsehü keshen pehae senhü, tsügenyu a-le tsü so-e jochü shüo jün pe temi dan tsüshü lotse khishü. 8Tson-o anyugun le tsü tyü pe anyugun ginyü külo, lo tsüle anyugun temi yiezi laki kho. 9Tson-o anyugun le tyü kensen khü pe khvütsü tsenyü sülo. 10Lo tsükatsü a-le anyugun nishüla; lo a-le senthyükelo nyu dan zen-o run nyu yüo Dalmanutha lojvü kipon ryüla.

Farisinyu Le Zansü Hikethyü

(Mt 16:1-4)

11Tsükatsü Farisinyu dan le ryü a-semen-o a-no tsangge tha zansü nme thyü pe anyugun hishü lotseo a-zen kenyi so. 12Tsontsin a-le a-npvü a-kapu nyu henshwi da thyüshüo, “Nyuthyüo ntso ntsenyü nyu hile tha zansü nti fühü nla? Ale hagun ka zo tsentsü shüti, tha zansü nme-e thyü pe ntso ntsenyü nyu hisin loho so!”

13Tson-o a-le anyugun khela njüo kecha kipon gunla.

Farisinyu Lo Herod Genyu Petsülo

(Mt 16:5-12)

14Tsükatsü senthyükelonyu dan le tensü khilo nmhinla; tson-o anyugun le run nyu tensü nme nyesin sen mvula. 15Tsükatsü Jisu le anyugun ka zo, “Farisinyu lo Herod kebu genyu hagun petsülo chi; ” tsonkethyü anyugun ka zoshü.

16Tsontsin anyugun le kenthon-o, “Ngun le tensü nme khilo mvukela genyu a-le hizo bin laso.”

17Tsüselo Jisu le anyugun ka, “Hagun le nyuthyüo tensü sen mvukela genyu zohü nla? Hagun le ntsokhin-e sha, lo rüchün lo mvuzun ole? Hagun nyun thyü pe rükvula se ole? 18Hagun yhütyü le bin-o pe hyu hü mvu ole? Lo hagun nyetin le bin-o pe thakhwen nyülo hü mvu ole? . 19Lo hagun nyunki tha rüchün hü mvu ole? Ale tensü pvüpvün pe temi yie pvün ginthyü keshü ka hagun le a-sen khvütsü dikho kesü khülo la?” tson-o ketso so.

Tsontsin anyugu le a-ka zo, “Tseryü kenyhunche le.”

20“Lo ale tensü tsenyü pe temi yie zi tsü keshü ka hagun no a-sen khvütsü dikho kesü khü lola?”

Tsontsin anyugun le a-ka, “Tsenyü le,” tsonshü.

21Lo a-le anyugun ka, “Hagun le ntsokhin-e tsü rüchün lo mvu bin zun ole?” tson.

Jisu Le Betsaida nyu A-yhütyü Keponyu Nme Thyü Ngwakeshü

22Lo tsükatsü anyugun le Betsaida nyu ryülo. Lo mele a-yhütyü keponyu nme zen ryüo a-no tsügü kesü shü lotse zo tenge lola. 23Tsügenyu a-le a-yhütyü kepo gü nrhisülo njüo a-zen-o chwida ngwenki chwila. Tson-o a-le nsü pe tsügü yhütyü nyushüo a-ben pe kesüshüo a-ka, “Tha hyu bin semon?” tson-o a-ketso.

24Lo a-le nyi sogü a-ka, “Ale temi dan me hyu bin, lo tsüdan le tsonchü pe senbin hontse bin nyo.”

25Tsontsin Jisu le a-ben pe tsügü yhütyü kesüni, tson-o tsügü le tha nrinishü ntsin, a-yhütyü le gwalo lao tha aphu hyu tsentsülo la. 26Tsüselo Jisu le a-nipe ka kishüo a-ka zo, “Nle rünyi nyu chwi nya nye.”

Pitor Le Jisu No Khrista gü Letse Zoshwikeshü

(Mt 16:13-20; Lk 9:18-21)

27Tsüsika Jisu le senthyükelo nyu dan zen-o Kasaria Filipi rünyi nyu gunzhü; Tsükatsü a-le tsonne nyu a-le senthyükelo nyu dan ketso-o anyugun ka zo, “Mele alope segü letse hü nla?”

28Tsontsin anyugun le a-ka, “Johan baptist gü letse zo hü, lo kechanyu dan me le nno pe Elia letseo zo hünyo. Lo peha le nno pe sidyükeshanyu nme letse zo hünyo.”

29Lo Jisu le, “Ai hagun we alope segü letse hü nla?” tson-o anyugun ketso shü.

Tsontsin Pitor le a-ka, “Nle Khrista gü le,” tsonshü.

30Lo tsükatsü a-le anyugun no a-rüla tsülope meka zo nyalo tseo anyugun khin tenge tsela.

Jisu Le A-si Lo A-rhünni Keso Rüla Kezo

(Mt 16:21-28; Lk 9:22-27)

31Tsüntimvule a-le Temi Nyugü le kenjünthyü sati, tson-o pelünyu ju lo peshükeda ju lo lesükeshatsin dan no a-nkhin lao me no a-dushvu lati; lo jonshen siki a-le rhünniso lati; tsonkethyü zo pe anyugun senthyü tinla. 32Lo a-le jo tsügü zope gingvü tse shüla. Tsontsin Pitor le a-zen-o kecha nme ki bagü a-gwün khinla titse so. 33Ai a-le ranigü senthyükelonyu dan hyulo njüo Pitor kesüo, “Hire, Satan, nle asiki güla chi; nle Sunggigü rüla rüchün mvule temi phin rüchün kehü hile.”

34Tson-o a-le temi dan kope senthyükelonyu sin-o anyugun ka zo-o, “Temi lihigüe asithen kenyünyu tsünyu no a-npvü a-kekhenilo njüo a-krus pen-o a sithenlo. 35Kechamvule temi lihigüe a-npvü a-phou ntsen pe a-honthyülo kenyünyu a-le tsü nmhenla ti; lo temi lihigüe agenyu lo jolokegwa genyu a-phu nkela kehünyu, a-le tsü ntsen pe a-hon thyülo nrün genyu. 36Lo temi nme le kazü aphu pe a-hon thyülo lae a-le a-npvü a-phou nmhen kela we a-kechwi nyu le bin nla? 37Tsüntimvule temi le nyu lope a-phou sun thyülo gwa tila? 38Lo temi lihigüe keyüla lo kemu temi hidan dan nyu arüla pe zo keja kela gü, Temi Nyugüe tsangge lokethyü kenshün nyu dan zen-o a-zan le gingvü tse keryü nyü temi tsügü rüla zo keja lati.”

Currently Selected:

MARK 8: REGSBSI

Highlight

Copy