MATHI 9

Jisu Le Terothonyu Nme Thyü Ngwakeshü

1Tsükatsü a-le run nyu yüo a-rünyi ki gunla. 2Tsontsin hire, temi dan me le terotho kethyü nme a-zhü nyuzhü gwünzin kehünyu nme zen ryü; lo tsüka Jisu le temi tsü dan ketenyen hyulo-o terotho gü ka, “A nyugü, ndyü benlo chü! Nkemu jüshüla sele.”

3Tsontsin hire, lesükeshatsinnyu dan me le anyugun npvü anyugun nyun ki, “Temi higü hile Sunggigü nkhin hünyo.”

4Ai Jisu le anyugun nyun kerüchün shalo njüo, “Hagun le nyuthyüo tha gwakemvu rüchün hü nla? 5‘Nkemu jüshüla sele nye,’ tsonkezo, lo ‘So-o tsonchülo chi,’ tson kezo jo hihvu digü le zo nne kvula? 6Ai temi kemu jüpe tsülo kegwa kazü hinyu Temi Nyugü kekvu le kebin hagun no shalo titse kethyü genyu.” Tson-o a-le terothogü ka, “So-o nzhü khilo njüo, nkaki gunla chi!” tsonshü.

7Tson zoshü ntsin temi tsügü le solo njüo a-ka ki gunla. 8Lo temi le tsü hyushüo shwi nshvula, lo kekvu tsühontse kethyü pe temi ge keshü genyu Sunggigü shwenla.

Jisu Le Mathi Kokelo

9Lo Jisu le tsünyu chwi zhü ntsin a-zan le Mathi tsekethyü nme le khajana keshvu bin nyu bin-o hyulo; tson-o a-le tsügü ka, “A sithenlo re,” tsontsin tsügü le a-sithen tinla.

10Tsüselo a-le yügü Mathi kanyu tyütsü bin ntsin hire, khajana keshvunyu lo kemunyu kechon le gunryüo Jisu lo a-sikethen nyu dan zen-o binlo. 11Lo Farisinyu dan le tsü hyushüo Jisu le senthyükelonyu dan ka, “Hagun senkethyügü le nyuthyüo khajana keshvunyu lo kemunyu zen-o tyütsü hü nla?” tson.

12Ai Jisu le jo tsü shalo njüo, “Kegwanyu le dawa keshanyu zen-o thame kethyüi ndi, dawa keshanyu le kehonyu genyu le. 13Hagun gun gü ale kershvu gü mvule shwikenjün gü le akenyü, tson zo kenjü gü jo tsü a-kon rüchünlo nye; kechamvule ale kentsennyu mvule kemunyu kolo titse keryü genyu,” tsonla.

Nyen Kethyü Rüla Ketsokeshü

14Tsontsin Johan le senthyükelo nyu dan le Jisu ki ryüo, “Nyuthyüo agun-e lo Farisinyue nyen-o hi hünyo ai nle senthyükelonyu dan we nyen hümvula?”

15Ai Jisu le tsüdan ka, “Senhüho nyu senhügü le tesin dan zen kebin ka, anyugun le nyungwamvu bin logwa ole! Ai anyugun dan nyu senhügü zen tinkela gwünkho le gunryü ti, tsünyü anyugun le nyen ti.

16“Lo temi nme-e phi keshün sen gü phiren nkhvü hümvu, kechamvule nkhvü keshü phi gü le ligü sürhenla hünyo. Tson-o nrhen ketsin la hünyo. 17Lo temi nme-e vain zu keshün pe thyügi khin when nyu shü hümvu; tsonshü yatselo thyügi khin pvürhenla ti, tson-o vain zu no tsunla ti, lo thyügi khin-e gwamvu la ti. Ai vain zu keshün pe thyügi khin keshün ka shü hünyo, tsügenyu kenyhun nren gwa bin hünyo.”

Pelünyu Nme Nyugi, Lo Jisu Phishwe Kesükelogi Au Rüla

18Lo a-le anyugun ka johi zoketse ka, hire, peshünyu nme le ryüo a-rüshvuo a-ka, “A nyu le ntsoka sila so, ai nle ryüo nben pe a-ge shüshülo, tsonlo a-le rhünlo ti.”

19Tsüselo Jisu le solo njüo a-kethennyu dan sin tse tsügü sithen gunla.

20Lo Tsükatsü chen tseryü kenyhun che tezi tsun hü kela tenunyu nme le a-sizin gunryüo a-phishwe kesüshü. 21Kechamvule a-le a-nyunki, “Ale a-phi kesüshü gwünzin-e gwalo ti,” tson rüchün kehü genyu.

22Lo Jisu le ranigü a-hyulo njüo a-ka, “A nyugi, ndyübenlo chi, nketenyen le a-npvü nthyü ngwashü sele,” tsonshü. Tsontsin tsügwünkho ka tsü tenunyu tsügi thyü ngwashü la.

23Lo Jisu le gungü peshü gü ka tikelo ka kheli kekhunyu le kevü keben kebin hyulo. 24Tson-o a-le anyugun ka, “Hagun tinla chi; lünyu higi le sila mvu, ai zhü kebin gwünzin,” tsonshü. Tsontsin anyugun le a-shwinyü la. 25Ai temi tsüdan hü pe kamhun ki shükela siki a-le kanyuki yügü lünyugi ben süshü ntsin, a-le soryüla. 26Tsontsin kazü tsügü nyu aphu tsü rüla zo sü gunla.

Yhükeponyu Mihvu Thyü Ngwakeshü

27Lo Jisu le tsünyu gunzhü ntsin a-yhütyü keponyu mihvu le a-sithen-o nra sen-o, “David Nyugü, Nle ayi shwinjün shüta!”

28Tsüselo Jisu le me ka nyu yüla ntsin a-yhükepo hvu ko a-then yüla, tsükatsü Jisu le au ka, “Ale hi thyü logwa letse kethyü hai le tenyen bin nle?”

Tsonsin au le, “Ele, Npugü,” tsonshü.

29Tsontsin a-le au yhütyü kesüo, “Hai ge hai ketenyen hontse thyülo chi!” tsonshü. Tsüselo au yhütyü tsüle kochwiryüla- 30tsüselo Jisu le au khin tenge tseo, “Temi nme-e no shamvu nrün genyu hai ndolo chi!” tson.

31Ai au le chwi ntsin kazü tsünyu me le a-rüla zoshwen zonye la.

Jozolo Kemvunyu Nme Thyü Ngwakeshü

32Tsüsika anyugun le gun kezhü ka, hire, me le tero gwakemvu le zen kehü lo jozolo kemvunyu nme zen a-ki gunryü. 33Lo tero gwakemvu tsü hüla ntsin jozolo hükemvu gü le jozo shwi chwiryüla, tsontsin temi dan le anyugun dunthyüo, “Israel nyu dan nyu honkethyü thame kae hyu hü mvu.”

34Ai Farisinyu dan le, a-le tero gwakemvu kedagü zen-o tero gwakemvu hüla hünyo, tsonla.

Jisu Le Temi Dan Shwinjün Kethyü

35Tsüsika Jisu le rünyi nyida nyue lo rünyi keshen kae aphu ka gun-o anyugun sinagog ka nyu yügü me senthyü; lo keda jolokegwa zope me hi, lo me kehokenyü aphu lo kenjünthyü kebin nyu aphu thyü ngwa küshü. 36Lo a-le temi dan kehyu ka anyugun le tanyü a-kekhwen kendi hontse kenjün thyü lo tsenchvü tinkela genyu a-le anyugun shwi njün sala. 37Tsükatsü a-le senthyükelonyu dan ka, “Lowbin le chonsa, ai lothonyu rhori. 38Hagun tsügenyu low Npugü no thakethyünyu nipe a-low ki shülo nrün genyu hilo chi.”

Currently Selected:

MATHI 9: REGSBSI

Highlight

Copy