MATHI 8

Jisu le Nyun le Ketyünyu Nme Thyüngwa Keshü

(Mk 1:40-45; Lk 5:12-16)

1Tsüselo Jisu le rincho ge tsenryü ntsin temi danda le a-sithen ryü. 2Lo hire, Nyun le ketyünyu nme le ryüo a-rüshvu, “Npugü, Nkendolo, nle athyü nshün shü logwa; ” tsonshü.

3Tsontsin Jisu le a-ben shwen pe temi tsügü ge shüo, “A kendo le, nle nshünlo chi,” tsontsin nyun le ketyü tsüle nshünlo la. 4Lo Jisu le a-ka, “Nle me ka zoshvu tsin, ai gü nmin pe peshükeda gü no nri nye, tson-o me no shalo nrün genyu Mosa le zokenjü phukerho jvügü thyüla nye,” tsonshü.

Tsiso Kedagü Go Thyü Ngwakeshü

(Lk 7:1-10)

5Tsüselo Jisu le Kapernaum nyu yü ntsin tsiso kedanyu nme le ryüo tenge tse a-ka, 6“Npugü, agogü le terotho thyüo kenjünthyüo ka nyu yhon bin nyo,” tsonso.

7Tsontsin a-le a-ka, “Ale ryüo a-thyü ngwashü ti.”

8Ai tsiso kedagü le a-ka, “Npugü ale nno aka hensin yüryülo kümvu, ai nle jo nme zoshülo agogü le gwalo ti. 9Kechamvule ako kedanyu hensin kebin nyu nme; lo a hensin-e shüpahünyu le bin nyo; lo ale nme ka, ‘Nle gun chi,’ tsonshülo a-le gun hü nyo; lo kechanyu nme ka, ‘Nle ryü re,’ tsonshülo ryü hünyo; lo agonyu ka, ‘Nle hithyüshü re,’ tsonshülo a-le tsüthyüshü hünyo.”

10Lo Jisu le jotsü nyülo ntsin a-dun thyülo njüo a-sikethen nyu ju ka, “Ale hagun ke zo tsentsü shü ti. Ale Israel nyu dan nyu ketenyen keda hihontse kethyü hyumvu zun. 11Lo ale hagun ka zoshü ti, yhüko kechwi kipon lo yhüko keche kipon temi kechon le ryüo tsangge keda nyu Abraham, Isak, Jakob nyugun zen bin tinla ti. 12Ai keda nyenyu ju we khipe kamhun kezün ki shü lati; tsünyu chü lo hüketa bin ti.” 13Tsonshüo Jisu le tsiso kedagü ka, “Gunlo, nle tenyen kelo hontse ngenyu tsü thyü penlo nye; ” tsontsin go tsügü le tsügwünkho ka tsü ponlo la.

Jisu le Temi Kechon Thyü Ngwakeshü

(Mk 1:29-34; Lk 4:38-41)

14Lo Jisu le Pitor ka nyu yü ntsin tsügü nu a-jvü le rükao zhü kebin hyulo. 15Tson-o a-le tenu tsügi ben kesüshü ntsin a-le rüka mvula; tsontsin tsügi le soryüo a-lothyü shü.

16Lo tsüje me le tero gwakemvu le zen kehünyu kechon zen ryü lo a-jo no tero tsüdan hüla, lo kehokenyünyu aphu thyü ngwashü. 17Hile Isaya sidyükeshagü le zo kenjü no penlo nrün genyu, “A-le nkvukemvu lo kenjünkethyü khilola, lo nkethyükenyü dan pvülola.”

Senthyükelo Ketsinnyu

(Lk 9:57-62)

18Tsüsika Jisu le temi danda nme le a-hunpvü kebin hyulo njüo a-le tsüdan no perezin külo lotse ahza hoshü. 19Lo tsükatsü lesükeshanyu nme le gunryüo a-ka, “Senkethyü gü, nle dika gü tiyo ako nsithen tile,”

20Tsontsin Jisu le a-ka, “Mesükerun-e a-kü le bin, lo tegüe a-sü le bin; ai temi Nyugü we a-pe lope tesun kelo bin-e ndi.”

21Lo senthyükelo kecha nme le a-ka, “Senkethyü gü, ano gungü apvü sunla rilo.”

22Ai Jisu le a-ka, “A sithenlo, lo kesinyu no a-npvü kesinyu sunlalo,” tsonla.

Jisu Le Tsangkenbu Kesü Kela

(Mk 4:35-41; Lk 8:22-25)

23Tsüsika a-le run nme nyu yülo ntsin senthyükelo ju le a-sithen gunryü. 24Lo hire, züda nyu tsü terün thyü ryü,lo zükenkhün le run tsü ketyü sen tinla, ai a-le tsüka zhü bin. 25Tsontsin anyugun le gungü a-kesun-o a-ka, “Agun kenishülo, Npugü, agun le nke güzhü laso!” tsonshü.

26Lo a-le anyugun ka, “Hire, ketenyen kerho ju, hagun le nyuthyüo nshvu hü nla?” Tson-o a-le sogü tsangkenbu lo züda rhoshü; tsontsin ma tsela.

27Tsügenyu temi ju no a-dun thyüo, “Tsangkenbu, lo züdae a-jo zen kehü hile temi nyutsekethyü nme sela?” tsonla.

Gadara Rünyi Nyu Tero Gwakemvu No Zen Kehü Mihvu Thyü Ngwakeshü

(Mk 5:1-20; Lk 8:26-39)

28Tsüsika a-le tsü nken gun gü Gadaranyu kazü tilo ntsin gwakemvu kapu no nthyü nnyü zen kehü nyu mihvu le me sika nyu chwiryüo a-tenolo, lo au jvü gwamvu pe ketetsin thyü kethyü genyu temi nme-e tsütson zen gunlo hümvu. 29Lo hire, au le Jisu tenolo ntsin sen-o, “Sunggigü Nyugü, Nle ayi zen-o nyuthyü mon? A-gwünkho tikemvu ka nle ayi nthyü nyü titse ryü ole?”

30Lo tsükatsü tebo dan me le anyugun kepen ka a-chvü hotyü bin.

31Lo tero gwakemvu ju tsüle a-ka, hio, “Nle agun hüshwi shülo agun nipe tebo dan nyu tsü shülo.”

32Tsontsin a-le anyugun ka, “Gülo,” tsonshü ntsin anyugun le chwio tebo dan nyu yüla; lo hire, tsü aphu tin sen-o tsokhin nyu yügü züda nyu nke küla.

33Tsontsin kekhwenyu dan le tin-o nyida gü nyu gungü tero gwakemvu le zen kehü hvu ge tha thyükela dan aphu zoshü. 34Lo hire, Nyida tsünyu kebin aphu Jisu zen keteno titse chwiryü, lo anyugun le a-hyulo ntsin a-no anyugun kazü nken tinla lotse tenge tse hi sola.

Currently Selected:

MATHI 8: REGSBSI

Highlight

Copy