MATHI 10

Apostel Tseryü Kenyhunche dan Kejükelo

(Mk 3:13-19; Lk 6:12-16)

1Tsüsika a-le tseryü kenyhun che dan ko zen a-ki gunryüo, nshünkemvu kapu lo kehokenyü aphu lo gwakemvu aphu thyü kesherhünlo kegwa kekvu khipe anyugun tsüshü. 2Lo apostel tseryü kenyhun che dan zen le hidan hi: kerigü, Simon mele a-no Pitor tse kelagü, lo a-sikezengü Andria; Zebedi nyugü Jakob lo a-sikezengü Johan. 3Filip lo Bortholoma; Thoma, lo Mathi khajana keshvu gü; Alfia nyugü Jakob, lo Thadia, 4Kanan nyu gü Simon, lo Jisu tenkeshü gü Iskariot Judas.

Tseryü Kenyhun dan Nikeshü

(Mk 6:7-13; Lk 9:1-6)

5Lo Jisu le tseryü kenyhunche dan hi nishüo tha zope anyugun hio, “Hagun Judakemvunyu tson nyu gun nya, lo Samaria nyu rünyi nme nyue yü nya. 6Tsonkethyü gü mvule Israel tsipwen nmhe kela tanyü dan ki gunlo nye. 7Lo hagun gun kethyü ka me senthyüo, ‘Tsangge keda kho nni laso!’ tsonlo nye. 8Lo kehonyu thyü kesherhün shü, kesinyu thyü nrhün shü nye, lo nyun le ketyünyu thyü nshün shü, tero gwakemvu hüla chi. Hagun le kerunnyu hyulo, tsügenyu kenrun nyu pe zhünshü nye. 9Hagun pisa khin nyu suna nmvue pisa nme-e pvü nya. 10Lo hagun kenjwen ka thakhin nmvue mirün kenyhun nmvue, phaje nmvue thün-e sen nya. Kechamvule thathyü kehünyu le a-ketyüketsü hyutyü zü kethyü genyu.

11“ Lo rünyi keda nyue keshen nyue segü le hagun nsin nyü bin yo tsünyu fülo chi; tson-o hagun le tin kemvuthen tsünyu binlo nye. 12Lo hagun le ka tsünyu keyü ka jochü hipe ka tsünyu shülo nye. 13Lo ka tsügü le gwa yatselo, hagun kehi no ka tsünyu bin kelogü thyülo; ai gwamvu yatselo, hagun kehi no hagun ge niryü kelogü thyülo. 14Lo temi ligü higüe hagun zenlo mvu, nmvue jo-e nyümvulo, ka tsünyu nmvue rünyi tsünyu tinkezhü ka hagun pha ge kenpüe kekhü shüla nye. 15Ale hagun ka zo tsentsüshü ti, ketsokethyü nyu rünyi tsügü rüla nyeki Sodom lo Gomora rünyi hvu rüla we nne kvuti.

Kenjünkethyü Le ryü Nrün

(Mk 13:9-13; Lk 21:12-17)

16“Hire, tanyü le teken dan nyu keyü hontse ale hagun nishü güzhü nyo; tsügenyu hagun peri do kegwa hontselo, lo nsu jvü kegwa hontselo. 17Ai temi ge petsülo, kechamvule anyugun le hagun ten pe ketsokehü dan ki shüti, lo anyugun le sinagog kanyu hagun vüti. 18Lo azan genyu meno hagun sü zen-o ahng nyu lo rajanyu mhundyü nyu gun ti, tson-o tsüdan ka lo Judakemvunyu mhundyü nyu azan zoshü ti. 19Lo mele hagun ten keshü ka, nyu tsethyü zo mon? nmvue nyu zo mon tsekethyü rüchün pe hagun nyun kenjünthyü bin nya, kechamvule tsü gwünkho ka hagun no nyu zotiyo tsüpe hagun tsü nrün genyu. 20Tsüle hagun npvü zo mvule hagun Pvügü Kapu le a-npvü hagun nyunki zoshü nrün genyu.

21“Lo temi le a npvü a-tsasikezen gü tenshü,lo a-pvü le a-npvü a-nyenyu ten pe meno dushvu ti. 22Lo azan genyu temi ligü higüe no hagun ntsü ti; ai nyhen ti kelogü le kenilo ti. 23Lo rünyi nme nyu mele hagun nshwen keso ka tin sen-o rünyi tsü khokeni ki gunla nye; ale hagun ka zo tsentsü shüti hagun le Temi Nyugü le keryü mhundyü Israel nyu rünyi nyu gun keti kü loho.

24“Senkethyügü nyeki a-le senthyükelo dan le gon mvu, nmvue Npugü nyeki gogü le gon mvu. 25Senthyükelo dan le a-senthyükelo gü hontse, nmvue gogü le Npugü hontse kela we gwala ti atale. Kami pegü nsin mele a-no Beelzebul letse lalo, a-kaminyu dan we tsühontse zo mvu ti ole?

Segü Nshvu Zü La

(Lk 12:2-7)

26“Tsügenyu hagun tsü nshvu nya nye; kechamvule tha nme-e pe me tesha loho letseo hen kebin ndi; lo meno shamvu titseo kebu kenjüe ndi kethyü genyu. 27Lo ale kezün nyu hagun ka zokeshü tsü hagun le keben nyu tsü sen-o me senthyüshü nye; lo hagun le nyükelo tsü pe ka soki sen shü nye. 28Lo nthyü nmin higü dushvulae, Kapugü dushvulo keho gü tsü nshvu nya nye; ai Kapu lo thyümin-e sin pe mahzi nyu boshvula lo kegwa gü nshvulo nye. 29‘Rinyu kenyhun pe pisa nme hei hü mvu ole?’ tson-e hagun Pvügü kendo kemvu we tsü nme-e kazü nyu chetsüryü loho. 30Ai hagun pehüe swükülo laso. 31Tsügenyu hagun nshvu nya nye; rinyu kechon we mvu hagun we gwakvu!

Temi Mhundyü Ka Khrista Zokeja Nya.

(Lk 12:8-9)

32“Tsügenyu temi ligü higüe temi mhundyü ka Azan pe zolo, ako tsangge kebin Apvü mhundyü nyu tsünyu zan pe zoti. 33Ai temi ligü higüe temi mhundyü ka azan pe zomvulo, Ako tsangge kebin Apvü mhundyü ka a-zan pe zo loho.

Gwaketho Mvü, Ai Zhethon Gü

(Lk 12:51-53; 14:26-27)

34“Ale gwaketho khipe kazü nyu shüti tse tsüryü letse rüchün nya. Ale gwaketho mvule zhethon khishü titse ryü. 35Ale meno me jo kechacha thyüo a-pepvünyu shwi rüchün, a-nyu tenugi no a-jvü shwi rüchün, lo a-mogi no a-nyügi shwirüchün, tsonshü titse keryü le. 36Tson-o a-kami npvü keshwirüchün ti.

37“Temi ligü higüe A nyeki a-pvü a-jvü sokvu yatselo, a-le Atemi thyü kü mvu; lo temi ligü higüe A nyeki a-nyu tenugi-e pechegüe sokvu yatselo a-le atemi thyü kümvu. 38Lo temi ligü higüe a-npvü a-krus pen-o A sithen mvu yatselo atemi thyü kümvu. 39Temi ligü higüe a-phou sope a-hon thyükelogü tsüle nke lati; lo temi ligü higüe a genyu a-phou nke kela gü le tsü lope a-hon thyü loti.

Kegwa Chün

(Mk 9:4)

40“Temi ligü higüe hagun zenlo kehügü le ako azenlo hünyo, lo temi ligü higüe azenlo kehügü we A nikeshü güe zenlo hünyo. 41Lo temi ligü higüe sidyükeshanyu zan nyu sidyükeshanyu zenlo kehünyu le sidyükeshanyu chün hyulo ti; lo temi ligü higüe kentsen nyu zan nyu kentsen nyu zenlo kehünyu le kentsen nyu chün hyulo ti. 42Lo temi ligü higüe senthyükelonyu zan nyu zükun honpen nme-e pe a sikethen nyu keshen tsingüe la keshügü we, Ale hagun ka zotsentsüshü ti, tsünyu le a-chün ndila loho.”

Currently Selected:

MATHI 10: REGSBSI

Highlight

Copy