APOSTELNYU THO 4

Süda Mhundyü Nyu Pitor Lo Johan Au Ketsokethyü

1Pitor lo Johan au le tsühontseo temi dan mhundyü nyu jozo bin ntsin peshünyu dan lo Kershvuka nyu keda thyü kehügü lo Sadukinyu dan le au khoki gunryü. 2Au le temi dan senthyüo Jisu genyu kesi nyu rhünso kelo rüla zope me senthyü kethyü genyu anyugun kenyü mvu sala. 3Tson-o anyugun le au tenlo, lo tsüle ngwünki kela genyu meno au khwen bin-o tsüsinyü ti. 4Tson-e Npugü jo shakelonyu temi kechon le tenyenlo, tson-o temi tsüdan swükelo le temi yiepvün kho thyüla.

5Lo tsüsinyü anyugun so ge kedanyu lo peshünyu dan lo thakeshatsin nyu dan le gungü Jerusalem nyu kequenlo. 6Tsükatsü peshükeda gü Anna ko lo Kaifa lo Johan lo Alekander lo peshükeda gü kaminyu aphu tsünyu gunryü kü bin. 7Tson-o anyugun le au zen gungü anyugun dan nyu shülo njüo au ketso-o, “Hagun le dihontse hithyü hü nla? Nyu kekvu hagun le hyulo, nmvue zan nyu tse kethyü sen-o tha hithyü lola?”

8Tsontsin Pitor le Kenshün Kapu no a-süpvüo anyugun ka, “Hire, rünyi so kedanyu dan lo peshünyu ju: 9hagun le nthu terotho higü shwi njün keshü rüla ketso kegwa thyüo dihontse temi higü thyü ngwashü yo tsekethyü shalo nyülo hagun aphu lo Israelnyu aphu no sha tsentsü lo nye, 10Nazaretnyu Jisu Khrista hagun le krus ge hükela gü, lo Sunggigü le kesi nyu a-thyü nrhünnilo kelagü zan sen-o lo a-genyu temi higü hithyü ngwashüo gunryü hagun mhundyü ka bin kelo le. 11Tsügü tsüle,

‘Hagun ka kethyünyu dan le a-lope tha lihi letse

mvu kela tso gü tsüle a-qün nyu tso keda tsingü thyü laso.’

12Tsüntimvule a-genyu kemvu we kenikelo kecha ndi; kechamvule nno nkenilo mvulo shvu tsekethyü tsang hensin temi dan nyu zan kecha nme-e khishü kemvu genyu.”

13Lo tsükatsü anyugun le Pitor lo Johan au kepeche hyulo, lo au le lesü sha sari kemvu nyu lo mijanyu tsekethyü shalo njüo anyugun dunthyü la, ai anyun le au le himhundyü Jisu zen kehünyu tsekethyü shalo. 14Lo temi gwakelo gü le au zen kehü hyulo njüo anyugun le thame zolo nrün ndi la. 15Tson-o anyugun le au no anyugun kehun gü nrhi sen-o kecha nme ki gü tselo tse hukum hoshü lao anyugun npvü kenthon. 16Lo anyugun le, “Ngun temi hihvu lope nyuthyüla logwa tila? Au le tha ndun kethyü tho nme thyüshü laso, lo tsüle Jerusalem nyu kebin nyu aphu sha kü bin laso; lo ngun-e tsüle nmvu letselo nrün ndi so. 17Ai temi no tsü rüla shasin gun mvulo nrün genyu au no nthu gerho nyu zan higü hi pe zo sin nya lotse ngun au khinla tile nu.”

18Tson-o anyugun le au koni zen gunryüo anyugun dan nyu shülo njüo au no Jisu zan pe meka zoni nya lotse au khin tenge shü. 19Ai Pitor lo Johan au le anyugun ka, “Sunggigü mhundyü ka Sunggigü khwen kenyü nyeki hagun khwen kenyü le a-zü tile mvuyo. 20Hagun npvü rüchün shwilo; ai ayi we tha lihi-e ale kesha kehyu tsü we zomvu lo nrün ndi,” tsonla. 21Tsüselo anyugun le au kesüni shüo au hoshü la; temi dan le au ge tha thyülo nrün anyugun rhodyü kela genyu. Kechamvule au le thyü keshü tho tsü genyu temi aphu Sunggigü shwenlo kela genyu. 22Lo a-ge nduntho thyükeshü temi tsügüe chen henzi sin kela genyu.

Ketenyen Nyu dan Kepeche

23Tson-o mele au kheshü kela siki au le au pvünyu dan nyu gungü peshükeda dan lo pelünyu dan le au ge thyü kela lo zo kela aphu pe zoshü. 24Tsüselo anyugun le jo tsü shakelo ka anyugun nyun me thyüo Sunggigü ka, “Hire, Npugü, tsang lo kazü lo züda lo tsünyu kehü aphu thyükeshü gü! 25Nle Kenshün Kapu no ngogü agun pvü David mün nyu,

‘Nyuthyüo tsipwen kechacha kethyü

no a-kenyü mvuri lala;

lo nyuthyüo temi dan no lihi kemvu

a-kenrun nti rüchün hü nla?

26Npugü lo A-Khrista shwinyü mvuo

kazü so kedanyu dan le a-npvü

ketsensen bin so,

lo rünyi so kedanyu dan le gungü

kequen bin so.’ 27Ketsin le Herod lo Pontia Pilat au-e, rünyi kechanyu lo Israel temi dan zen-o N go kenshün gü nle kejü keshü gü Jisu shwirüchün-o gunryü rünyi hinyu kequenlo le. 28Tson-o nben lo nkendo dan nchwenyu thyü titseo rhi sen kehü dan thyü penla. 29Lo Npugü, nle ntsoka anyugun le me kesükedün kehü dan nrilo chi; tson-o nle nben shwenshüo me thyü ngwalo. 30Lo n gonyu dan no peche sao njo pe meka zolo, lo N go kenshün gü Jisu zan nyu thazansü dan lo nduntho dan thyü sinlo chi!” tson-o hishü.

31Tsüselo anyugun le kehun kebin ka tsüle nnu tsü, tsontsin anyugun aphu Kenshün Kapu no anyugun kesü thyü pvüo peche sao Sunggigü jo sen-o me ka zo tinla.

Tha Aphu Pe Kerhün Hon Thyükela

32Lo tsükatsü ketenyen nyu dan le aphu kengüo nyun me thyü bin; tson-o anyugun nme-e a-hon lope a-hon letse mvu la; ai anyugun le tha aphu pe kerhün küla. 33Lo apostelnyu dan le peche sao Npugü Jisu rhünni keso rüla zo zin tinla. Lo Sunggigü shwikenjün le anyugun aphu ge bin kü lola. 34Lo tsüntimvule anyugun nme-e thame rhokedyü ndila; kechamvule temi dan le a-kazü-e a-ka-e kebin aphu jwen külo njüo tsümin sen gunryüo apostelnyu dan pha ka shüla. 35Tson-o senyu no dikho hyulo mvulo shvu yo tsühontse kenjünlo lotse tinla.

36Tsükatsü Josef tsekethyü apostelnyu dan le a-zan lope Barnaba letse kehü gü (a-kon le “me thukeyhun kehü gü” tsekethyü,) Kupra nyu nnyukelo Levi tsipwen nyu nme le, 37a-low nme le bin-o jwe sen ryü a-min tsü khipe apostel nyu dan pha ka shüla.

Currently Selected:

APOSTELNYU THO 4: REGSBSI

Highlight

Copy