APOSTELNYU THO 3

Kershvuka Nyu Terothonyu Nme Thyü Ngwakeshü

1Khenyü me kehi gwünkho ka Pitor lo Johan au le tegi kenshen kevü gwünkho ka Kershvuka ki gunzhü ntsin; 2a-jvü gin nyu terotho thyüo nnyu kelonyu nme pen gunryü. A-no mele Kershvuka nyu gunkeryü nyu aphu ka tha hi titseo mele khenyütsen a-pen gungü Kershvuka chonrha kezegwa gü letse kehü ka shü njü hü. 3Temi tsügü le Pitor lo Johan hvule Kershvuka nyu yü kezhü hyuo au ka tha hi. 4Tsontsin Pitor lo Johan au le a-nrilo njüo a-ka, “Ayi nri tonlo!” tsonshü. 5Tsontsin a-ko au ka tha hyukelo rüchün-o au nri tonlo. 6Tsükatsü Pitor le zoshü, “Ale raka lo suna sen hü mvu, ai ale sen kehü gü pe ntsü tile, ale Nazaret Jisu Khrista zan sen-o nka zoshü le, nle so-o tsonchülo chi.” 7Tson-o a-le temi tsügü ben njüzin süso shü. Tsontsin a-pha hvu lo a-khenyenru-e nko whütselo. 8Tson-o a-le whütse solo njüo tsonchü tinla, lo a-le au zen Kershvuka nyu yüo tsonchüo whenso nsin nshyeo Sunggigü shwen tinla. 9Lo a-le tsonchüo Sunggigü shwen tin kela temi aphu a-hyu. 10Lo anyugun le a-le Kershvuka chonrha kezegwa gü ka bin-o shvutyü kehü gü letse kethyü shalo njüo anyugun le a-ge tha tsü thyükeshü genyu anyugun dunthyü sala.

Solomon Kasüka Pitor Senkethyü

11Lo a-le Pitor lo Johan au zen kehü genyu temi aphu a-dunthyüo tinsen-o (Solomon ka letse kehü ka) gunryüo kequenlo. 12Lo Pitor le tsü hyushüo temi dan ka, “Hire, Israel nyu dan, hagun le nyuthyüo temi higü genyu hagun dunthyü hü nla? Nmvue nyuthyüo ayi le ayi npvü ayi kekvu nmvue ayi kegwa genyu temi higü thyü ngwa pe a-no tsonchü kelo hontse hagun yhütyü keli pe ayi nri hü nla? 13Abraham lo Isak lo Jakob nyugun Sunggigü, lo tsüle ngun pepvünyu Sunggigü le A-nyugü Jisu kekvu pe me tesha keshü, hagun le nduka a-tenshüo Pilat le a-hoshü lanyü kesoka hagun le a-mhundyü nyu a-zan zoshwishü mvula. 14Hagun le ketsin gü lo kenshün gü zoshwi mvulao me dukeshvunyu nme khipe hagun tsüla lotse la. 15Tson-o kerhünronzin khikeshü gü dushvula, ai Sunggigü le kesinyu dan nyu a-thyü nrhün nilo laso. 16Lo agun hiko a-rüla tsü zo kehünyu temi le; lo a-zan nyu tenyen kelo genyu a-zan tsügü le a-npvü hagun kesha kehyu ka temi higü thyü nkvu keshü le. Ketsin, Jisu ge chwikeryü ketenyen le hagun aphu mhundyü ka temi higü hi thyü ngwa shüle.

17“Lo hire, apvünyu dan, akerüchün le hagun-e lo hagun sokeda dan-e tha rüchün mvuo thyü laso. 18Tson-o Sunggigü le Khrista no kenjünthyü nrün rüla sidyükeshanyu aphu mün ka nchwen nyu nka zo keshü dan a-le tsü thyü pen shü. 19Tsügenyu hagun, hagun kemu jülo nrün genyu lo Npugü ka nyuthyü nbwen keshü gwünkho no ryülo nrün genyu hagun nyunkelulo njüo ranilo nye. 20Tson-o Sunggigü le nchwenyu hagun genyu kejü pe bin kenjü gü Khrista, lo tsüle Jisu nishü nrün genyu. 21Sunggigü le sokerika nyu a-temi kenshün sidyükesha ju münka tha aphu thyü kenshün kelo mhundyü a-zen gungü tsangge binlo mvulo shvu. 22Mosa le kezo le, ‘Npugü Sunggigü le hagun tsipwen nyu dan nyu sidyükesha ahontse kethyü nme no soryü ti; lo a-le hagun ka kezo jo tsü hagun no nyülo lotse zoshü. 23Lo temi lihigüe sidyükesha khwen tsügü nyü kemvu gü hagun temi dan nyu a-nke lati tse zoshü.’ 24Tsüntimvule Samuel gerho nyu yhun sokeryü sidyükeshanyu aphu tha rüla tsügü kezo tsüle Jisu rüla zokü ketsin. 25Lo hagun le sidyükesha tsüdan nyenyu dan le, lo Sunggigü le Abraham ka, ‘N tsipwen genyu kazünyu tsipwen kechacha kethyü aphu no jochü hyulo ti,’ tson-o hagun bon nyu dan ka zo kenjü tsünyu hagun ko hagun jünle kebin nyu le. 26Sunggigü le A-nyu tsügü no hagun genyu yhun soryüo hagun lihigüe no hagun serikemvu nyu ranilo-o jochü pe hagun tsüshü nrün genyu Jisu nishü le.”

Currently Selected:

APOSTELNYU THO 3: REGSBSI

Highlight

Copy