APOSTELNYU THO 2

Kenshün Kapu Le Tsükeryü

1Lo pentekos jon le gunkeryü nyü anyugun aphu gungü bin nme ka kehun bin ntsin. 2Tsangge tsangkenbu terhi kethyü khwen hontse kethyü khwen nmele whütse gunryüo anyugun le kebin ka nyu tsü süpvülo la. 3Tsontsin mah le temi yi hontse kethyü dan me le tsükeryü hyulo; lo tsüle ko kezen gungü anyugun nme me pe ge kü külo la. 4Tsüselo anyugun aphu Kenshün Kapu no anyugun süpvüo Kapugü le anyugun no zolo tsekethyü hontse, anyugun le me rünyi khwen kechacha kethyü zo sola.

5Tsügwünkho katsü tsang hensin keyhun temi aphu dan nyu Judanyu ntsen seri kehünyu aphu gunryüo Jerusalem nyu kequen bin. 6Temi tsüdan aphu thakhwen tsü shalo ntsin dan me thyü gunryüo kequenlo la; lo temi tsüdan le ketenyen nyu jule anyugun khwen ki jozo külo kela genyu anyugun dunthyü la. 7Tson-o anyugun aphu anyugun dunthyüo, “Hire, jozo kebin hidan hi aphu Galilnyu nti mvu ole! 8Tsonlo ngun le nyu tsethyü anyugun mün nyu nrünyi khwen kezo sha pe hihontselo la? 9Anyugun peha le Perthianyu, lo peha le Medianyu, lo Kapodokianyu, Pontu lo peha le Elimitnyu, peha le Mesopotamianyu lo Judia lo Asianyu. 10Frugia lo Pamfulianyu, Ijiptnyu, lo Kurin rünyi teki kebin Libianyu, lo peha le Judanyu lo Judakemvunyu le gunryüo Judanyu jvü zen tinkela Rom nyu gunryü kebin tesin dan, 11lo peha le Kretanyu lo Arabnyu, anyugun lihigüe temi hidan le a-rünyi khwen ki Sunggigü le ndun kethyü tho thyükeshü rüla nyü külo bin!” 12Tson-o anyugun aphu anyugun dunthyüo khinyu khinyu ka, “Hile nyu tsethyüo hihontselo la?”

13Ai kechanyu peha le anyugun shwünyüo, “Anyugun le vain zü keshün tsüpvüo nzeü nle, tse zo sola!”

Pentekos Jon Nyü Pitor Senkethyü

14Ai Pitor le tseryü nmeche dan zen-o jozo sen-o temi dan ka, “Hire, Judia temi dan lo Jerusalem nyu kebin nyu aphu, hagun le akhwen hi nyülo njüo jo hidan shalo nye. 15Temi hidan hile hagun kerüchün hontseo nzeü bin mvule; tsangben chwikeryü le ntsoka tegi kevü kenshen nti bin zun kethyü genyu. 16Ai hi rüla nduka Joel sidyükeshagü no zo njü:

17‘Sunggigü le zoshü le, jon kekhin ki

ale Akapu run pe temi aphu ge

shüti.

Lo hagun nyenyu peche-e tenu-e

sidyükesha jo zoti;

lo hagun dan nyu ponyu dan le tsemin ki tha hyuti,

lo hagun dan nyu kethen nyu dan le a-min shati.

18Tson ketsin thyüti,

tsükatsü ale akapu run pe agonyu peche tenu

aphu ge shüti,

tsontsin anyugun le sidyükesha jo zoti.

19Lo ale tsangge ndun kethyü dan me,

lo tsang hensin kazü soge thazansü

dan me thyüshü ti.

Tezi lo mah lo mah kekhu no nmhu

thyükelo;

20Npugü keben jon keda gingvü

kethyü gü le gunkeryü mhundyü

yhüka le zünla ti,

lo shye le tezi ngwa lati.

21Tson-o temi lihigüe Npugü zan

sen-o hi kelo gü kenilo ti,’ tson.

22“Hire, Israelnyu dan, hagun jo hidan hi nyülo nye! Hagun ko shabin ti, Nazaret Jisu le hagun dan nyu Sunggigü le a-zen-o temi le thyülo keho ndun kethyü tho dan lo thazansü aphu thyü kelo dan genyu a-npvü tsü tsin tsentsü pe hagun hishü so. 23Sunggigü le nchwenyu tson-o rhi to sen kehügü hontse, a-tenlo njüo hagun npvü tejvü sen kemvunyu no krus ge a-hü lao a-dushvu laso. 24Ai Sunggigü le kesi kenjün kethyü nyu a-kenishü lao a-thyü nrhünlo laso; kechamvule tsügü tsü no a-khin sen binlo keho genyu. 25Tsühontse David le a-rüla kezo le,

‘Ale a mhundyü ka Npugü hyu zin gunryü;

ano nnu loho letse kethyü genyu, a-le

anjüzin bin hünyo.

26Tsügenyu anyun-e bwen,

lo asherhün-o lüthyü gunryü le.

Tsüntimvule tenrenla lo kegwa

ahi-e adyü ben-o tin lati,

27kechamvule nle akapu no Hades

hensin bin loho;

nle ntenyen kehü ngogü no sika

nyu tenla loho.

28Nle kerhün tson dan tsin pe

ahishü laso,

nle ano nyhühyu ka akenyüri tsin

hü tinla tiso.’

29“Hire, apvünyu dan, ale ngun bon David rüla hagun ka zo tsentsü pe tishüe shvu mvu ado. A-le sila njüo meno a-sun laso, lo a-sika le ntsoka-e ndan nyu bin nyo. 30Lo a-le sidyükeshanyu-e thyü sin-o a-tsipwen nyu nme no a-keda bin ge bin titse kethyü Sunggigü le swe-o a-ka zo letse kethyü-e shalo. 31David le nchwenyu Sunggigü le siki nyuthyü shüti yo hyu, lo tson-o a-le Khrista le rhünni keso rüla hihontse zo,

“A-khe pe Hades hensin

shü loho;

lo a-phou güe no sika nyu tenren loho.’ 32Sunggigü le Jisu tsügü tsü thyü nrhünlo laso, lo agun hidan hi aphu jo tsügü jün kezo nyu nti. 33Tson-o a-le Sunggigü ben njüzin no a-thyü ngonlo njüo Pvügü kanyu Kenshün Kapu khishü titseo zo kenjü gü tsü hyu kelo siki a-le ntsoka sha lo hyu kebin dan hi khipe hagun tesha shü. 34Lo David we tsangge kümvu; ai a-le a-npvü zo kethyü le,

‘Npugü le a Npugü ka:

ale n shwikerüchün nyu no

35npha bin thyüla kemvuthen,

nle anjüzin bin tse nye,’ tsonshü.

36“Ts'ügenyu hagunle krus ge a-hü kela Jisu tsügü tsü, Sunggigü le a-thyü pe a-no Npugü lo Khrista gü thyülo kela Israel nyu aphu no tsü sha tsentsü lonye!”

37Tsügenyu anyugun le jo tsügü shalo ntsin rüchün pe anyugun nyun gwün sen tselo njüo Pitor lo apostel kechanyu dan ka, “Npvünyu dan, agun no nyuthyülo mvulo shvu la?” tson-o ketso sola.

38Tsüselo Pitor le anyugun ka, “Hagun kemu jülo nrün genyu hagun nyun kelulo njüo Jisu Khrista zan nyu baptaiz thyülo nye; tsonlo yatselo hagun le Kenshün Kapu jochü hyulo ti. 39Kechamvule zo kenjü jo gü tsüle hagun lo hagun nyenyu dan, tsüntimvule rünyi nithen ki kebin, Npugü Sunggigü le ko zen a-ki gunryü nrün nyu aphu genyu-e le.”

40Lo tsüdan ntimvule a-le jo kecha-e kechon pe sin-o anyugun senthyüo, “Hagun ntso ntsenyü temi nzhü kemvunyu dan ge petsü salo nye.” 41Tsüselo a-jo le a-kenyü kelonyu aphu baptaiz thyü külo; lo tsünyü temi yieshen laki kho pe anyugun sinlo. 42Tson-o anyugun apostelnyu dan le anyugun senkethyü jo nyu lo kepvüshen kethyü nyu, tensü boshwen kethyü ka lo kehi kethyü ka khela mvu shü tse binlo.

Ketenyen nyu Keyhun Jvü

43Lo tsügwünkho ka tsü temi aphu nshvu küla, lo apostelnyu dan no me mhundyü nyu ndun kethyü tho lo tha zansü kechon thyülo. 44Lo tsükatsü ketenyen nyu dan le kengü dan me thyüo anyugun hon aphu kerhün pe nme thyülo. 45Tson-o anyugun le anyugun ka, low, lo anyugun hon jwen sen gunryüo senyu no dikho kho hyulo zü yo tsü rüchün-o kenjün külo hü. 46Lo Khenyütsen nyunme thyüo Kershvuka nyu lo kaho ki-e tensü boshwen tyü zin tinla. 47Tson-o anyugun le Sunggigü shwen-o temi aphu mhundyü nyu teshwen pvü tseo anyugun shekerhün thyü tinla. Lo Npugü le khenyütsen kenikelonyu no anyugun sinlo lotse zin tinla.

Currently Selected:

APOSTELNYU THO 2: REGSBSI

Highlight

Copy