APOSTELNYU THO 5
5
Anania Lo Safira Au Le Mukela
1Ai Anania tsekethyü nme le a-nu Safira au lobu nme jwenlo. 2Lo a-nu au kenyunrhün-o au low min peha khipe binlao peha sen gunryüo apostelnyu dan pha ka shü. 3Tsüselo Pitor le, “Anania, nle nyuthyüo Kenshün Kapu sa titse lo n low min peha loti tse hü nla? 4Low tsüle nben nyu kebin ka nhon mvu ole? Lo jwen kelo siki-e a-min le nkendo mvu ole? Lo nle nyuthyüo nnyun ki tha hihontse kethyü rüchün hü nla? Nle temi sa mvule Sunggigü sa bin nyo,” tsonshü. 5Lo Anania le jo tsü shalo ntsin chetsü gü sila; lo tsükatsü tsü rüla keshanyu aphu nshvu pe ketsin thyü küla. 6Tsüselo ponyu dan le phi lope a-jelo njüo khipen chwigü chwida ngwen ki sunla.
7Lo tegi kevü ja kenshen sika a-nu Safira le tsonkela rüla shamvuo tsüka niryü. 8Tsügenyu Pitor le a-ka, “Hai low pe tsükho heilo le nyutsethyü yo aka zoshülo?” tsonshü.
Tsontsin a-ko, “Ele, tsükho heilo le,” tson.
9Tsontsin Pitor le a-ka, “Kha, nyuthyüo hai le kengüo Npugü Kapu senmen titse hü nla? Hire, nnyepvü pen gü sun kegü nyu dan le kakhin khoka ryüzhü so, lo tsüdan no nko npen gü sun lati!” 10Tsonshü ntsin a-le a-pha nyu che whütse tsügü sila; lo ponyu dan le ryüo a-kesi hyulo-o a-ko a-pen gungü a-nyepvü sika khoka sunla. 11Tsügenyu kehun aphu lo jo tsü keshanyu aphu nshvu pe ketetsin thyü sola.
Thazansü Lo Nduntho Thyükelo
12Lo tsüki we apostelnyu dan no temi dan nyu thazansü lo ndunkethyü tho kechon thyü tinla; tson-o anyugun le kengüo nyunme thyüo Solomon kasü ka kehun hun tse hü. 13Ai kechanyu dan nyu temi nme-e yügü anyugun dan nyu kengü nshvula. Lo temi dan le anyugun rüchün ngwa sala. 14Lo pechenyu-e tenunyu-e Npugü tenyen kelonyu kechon ki le anyugun sinlo tson-o Npugü ki gunryü ketsin tsin tselo la. 15Tsüntimvule Pitor le gunryü yatselo a-shye nti-e no sunkeshü rüchün-o kehokenyü nyu khipen gunryüo tsoncho tsonda nyu no ge lo temi kepen khin nyu shü njü hü. 16Lo Jerusalem rünyi kho lukipon hikipon kebin rünyi nyu mele kehonyu lo nshün kemvu kapu no thyü nshvu zen kehü dan kechon ki zen gunryüo kequenlo; lo tsüdan aphu thyü kesherhün küshü.
Apostelnyu dan Nthyü Nnyükethyü
17Ai Peshükeda gü lo a-pvünyu dan, lo Sadukinyu logwa dan aphu anyugun yhüthyü sa lola. 18Tson-o apostelnyu dan tenlo njüo anyugun khipe doka nyu shüla. 19Ai Npugü lokethyünyu nme le khejenyu gunryüo doka kakhin shye shüla, tson-o anyugun zen-o kamhun ki chwigü anyugun ka, 20“Hagun gungü Kershvuka nyu binlo njüo kerhün jo hi aphu pe temi dan ka zoshü nye.” 21Tsontsin anyugun le jo tsügü shalo njüo tsangkeben mün ka Kershvuka nyu yügü tsünyu me senthyü bin.
Tsükatsü peshükeda gü lo a-pvünyu dan le gungü kehun kedagü lo Israelnyu aphu ko kequenlo; tson-o me nipe doka nyu shüo tsüdan no doka nyu apostelnyu dan zen ryülo tse zoshü. 22Ai anyugun lokethyünyu dan tsüle doka nyu apostelnyu dan fü kendi la. 23Lo anyugun le rani gunryüo, “Doka gü tsü khin kegwa thyü kenjü lo do kekhwenyu dan-e kakhin ka khwen kegwa thyü bin-o agun le yü ntsin temi nme-e kanyu ki bin-o hyulo mvu laso,” tson. 24Lo Kershvuka nyu keda thyü kebin gü lo peshükeda dan le jo tsü shalo njüo nyuthyüla seyo tsekethyü apostelnyu dan rüla rüchün pe anyugun rhokedyü thyülo la. 25Tson kebin ka temi nme le gunryüo anyugun ka, “Hire, hagun le temi dan me khin pe doka nyu bin kenjü dan tsüle gungü Kershvuka nyu me senthyü binla sele!” 26Tsontsin Kershvuka nyu keda thyü kehü gü le lokethyünyu zenlo njüo gungü anyugun nthyü nnyü mvutse anyugun zen gunryü la; kechamvule anyugun le mele tso pe anyugun kejon nshvu kela genyu.
27Tson-o anyugun le tsüdan zen gunryüo anyugunno kehun gü mhundyü nyu solo. 28Tson-o peshükeda gü le anyugun ka, “Agun le hagun no zan higü hi sen-o me senthyü nyalo tseo hagun ka jo kerü zoshü mvu ole? Lo hire, hagun senkethyü jo no Jerusalem sü laso. Tson-o hagun le temi tsügü zi tsüno agun ge shü titse kethyü rüchün kehü si hile,” tson sola.
29Ai Pitor lo apostelnyu dan le anyugun ka, “Agun le temi jo nyeki Sunggigü jo we zen mvulo shvu kvu. 30Npvü nbon nyu Sunggigü le hagun le san ge hüo dushvu kela gü Jisu thyü nrhün nilo laso. 31Sunggigü le nyun kelukelo lo kemu tsü keni pe ketsü khipe Israel nyu tsü ti tse kethyü genyu a-npvü a-ben njüzin khipe Jisu tsü thyü ngon pe a-no Kedagü lo Kenikelogü thyülo laso. 32Lo agun hile jo tsügü jün kezo nyu dan le; lo Sunggigü le a-jo kezen nyu dan tsükeshü Kenshün Kapue jo tsü gü jün kezo gü le,” tsonla.
33Tsüselo anyugun le jo tsüdan shalo njüo anyugun nyun nta salo-o apostelnyudan dushvula nyü so. 34Ai a-zan le Gamaliel tsekethyü Farisinyu nme le temi aphu dan nyu teshwen pvü kehü tejvü keshatsin nyu nme, a-le kehun gü mhundyü nyu solo njüo meno gwüngwa nme apostelnyu dan zen-o nme ki kerü tin tselo tse zoshü. 35Tson-o a-le a-pvünyu danka, “Hire, Israel nyu temi dan, hagun le temi hidan ge tha thyü titse rhi kebin gü tsünyu tsü petsülo nye. 36Hagun ko rüchün bin ti, nduka a-zan le Theuda a-le a-npvü kedanyu nme letse soryüo temi tsizi laki kho le a-sithenlo la; ai temi tsügü tsü le meno a-dushvula, lo a-jo kezen nyu aphu hü tsenchvülao ndi bula. 37Lo temi tsügü siki sorkari le temi keswü gwünkho ka Galilnyu Juda ko soryüo temi dan me rhi pe a-sithenlo; ai a-ko sila, lo a-jo kezen aphu tin-o a-kehü bin shamvu la, tson le nye. 38Tsügenyu hagun ajo zen-o temi hidan ge hagun kekhenilo njüo anyugun khe shüla. Kechamvule tedo higü nmvue thatho higü le temi genyu yatselo bo kemhen lati. 39Ai Sunggigü kanyu yatse kethyü we, hagun le higü hi bo kemhen loho. Petsü salo nye, hagun le Sunggigü zen kega titse bin-e shalo keho genyu!” tson zoshü.
Tsüselo anyugun le a-jo tsü zenla. 40Tson-o anyugun le apostelnyu dan koni zen gunryüo anyugun vüla njüo anyugun no Jisu zan sen-o jozo nyalo tseo anyugun khin tenge tseshüo anyugun no tinla. 41Tson-o anyugun le kehun tsügü nyu tin chwila. Lo anyugun le zan tsügü genyu we me mhundyü nyu kejopvü zü tsekethyü rüchün pe anyugun shekerhün thyü tinla. 42Tsüntimvule anyugun le khenyütsen Kershvuka nyue lo khinyu khinyu ka ki-e Jisu le Khrista gü letse kethyü pe me senthyü, lo zo pe me hi kethyü kheshü mvu tinla.
Currently Selected:
APOSTELNYU THO 5: REGSBSI
Highlight
Share
Copy
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
Free Reading Plans and Devotionals related to APOSTELNYU THO 5
Now Is The Time: Acts Youth Journey
The Book of Acts
This Is the Way: A 30-Day Journey Through the Book of Acts
