ZEKARIAH 14
14
Jerusalem Leh Namte Kidouna
1Ngai in, Toupa ni, na gallak na lak a hawm a a-om ding hun ahong tung hi. 2Jerusalem dou a galdou ding in nam tengteng ka kaikhawm ding a; khopi lak in a-om dia, innte lok in leh numeite sualluih in a-om ding uh; khopi kimkhat sal a kaih in a-om ding a, khopi a kipan mikhosuaksunte kuamah satkhiak in a-om kei ding uhi. 3Huai ni chiang in Toupa apaikhe dia, kidou lai a adou bang in huai namte adou ding hi. 4Huai ni chiang in akhe a Jerusalem suahlam a om, Olive Tang sik in adingh dia, huchi in Olive Tang bel suahlam a pan tumlam ah phel nih kisuah in akiphelkhap ding hi, huchi in phaizang thupi mahmah ahong omta ding a; tang kimkhat mallam ah leh akimkhat simlam ah akikhin ding hi. Huchi in phaizang lam ah ka mualte na taikek ding uhi. 5Mualte phaizang Azal tung ding ahi ngal a; ahi, Judah kumpipa Uzziah dam lai a zinling ma a kipan na taikek uh bang in; huchi in Toupa ka Pathian ahong pai ding a, akiang ah misiangthoute ahon tonpih ding hi.
6Huan huai ni chiang in hichi ahi ding a, khovot a-om kei dia, vuk a-om sam kei ding. 7Himahleh Toupa a dia theih a om ni khat ahi ding; sun hilou, zan hilou; himahleh hichi ahi ding a, nitaklam in khovak a-om ding hi.
8Huan huai ni chiang in hichi ahi ding a, Jerusalem a kipan in tui hingte aluangkhe dia; alak ua kimkhat suahlam tuipi ah, alak ua kimkhat tumlam tuipi ah; nipi leh phalbi in a-omden ding hi. 9Huchi in leitung tengteng ah Toupa kumpipa ahi ding; huai ni chiang in Toupa khat amin khat ahi ding hi.
Toupa Vualzohna Leh Vaihawmna
10Jerusalem sim Geba a kipan Rimmon tan, gam tengteng phaizang asuak ding a; Jerusalem bel Benjamin kongpi a kipan kongpi khatna chiang, aning a kongpi chiang, Hananel insang a kipan kumpipa uain sukna pha a kipan khentuam in a-om ding hi. 11Huai ah mite ateng ding ua, hamsia a-om nawn kei dia; himahleh Jerusalem ah muangtak in ateng ding uhi.
12Huan Jerusalem kidoupih mite tengteng Toupa'n agawtna ding hipi bel hiai ahi ding; akhe ua adin lai un, asa uh amuat ding a, amit hawm sung uah amit uh amuat ding, akamsung uah alei uh amuat ding hi.
13Huai ni chiang in hichi ahi ding a, Toupa a kipan nakpitak a buaina alak uah ahong om ding a; michih in a-invengte khut ah alen tinten ding a, a-invengte khut dou ding in akhut akisa ding hi. 14Judah in leng Jerusalem ah adou dia; kho kim khovel a nam tengteng hauhsakna dangka-eng, dangka, puansilh atam a tam in alakhawm ding hi.
15Huchibang in hiai gawtna hipi gamsa tengteng leh sakol, sakolneu, sangawngsau leh sabiltungte puaninte ah hiai gawtna a-om ding hi.
16Huan hichi ahi ding a, Jerusalem dou ding a hong kuan nam tengteng lak a nutsiat a om michih akum sik in Kumpipa, sepaihte' Toupa, be ding leh Biakbukte Ankuangluina nei ding in Jerusalem ah akuantou ding uhi. 17Hichi ahi ding a, leitung a inkuan tengteng, Jerusalem a Kumpipa, sepaihte' Toupa, be ding a hohtou lou peuhmah, atung uah vuah azu kei ding hi. 18Aigupta inkuan ahohtouh louh ua, ahong pai kei uleh, amaute tung ah leng vuah azu kei ding; Biakbuk Ankuangluina nei ding a hohtou lou namte gawtna ding hipi a-om zaw ding hi. 19Hiai Aigupta gawtna bel Biakbuk Ankuangluina nei ding a hoh lou nam tengteng gawtna ahi ding hi.
20Huai ni chiang in sakol longte ah, Toupa A DING A SIANGTHOU, chih akigelh ding a; Toupa' inn a belte maitam ma a noubemte bang ahi ding uhi. 21Ahi, Jerusalem leh Judah a bel tengteng sepaihte' Toupa a ding in siangthou ahi ding uh; akithoihte ahong pai ding ua huai belte la in kithoihna sa ahuan ding uhi, huai ni chiang in sepaihte' Toupa' inn ah Kanaan mi a-om nawn kei ding hi.
Currently Selected:
ZEKARIAH 14: PAITBSI
Highlight
Share
Copy
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
