ZEKARIAH 14
14
Jerusalem Leh Namte Kidouna
1Ngai in, Toupa ni, na gallak na lak a hawm a a om ding hun a hongtung hi. 2Jerusalem dou a galdou ding in nam tengteng ka kaikhawm ding a; khopi lak in a om dia, innte loh in leh numeite sualluih in a om ding uhi; khopi kimkhat sal ah a paikhe ding a, mi omlaite khopi a kipan a satkhiak in a omkei ding uhi. 3Huai ni chiang in Toupa a paikhe dia, kidou lai a a dou bang in huai namte a dou ding hi. 4Huai ni chiang in Olive mual tung ah ading dia, suahlam pang a Jerusalem mazawn a om ah, huchi in Olive mual bel suahlam sang tumlam sang huai ah a kitam ding hi, huchi in guam thupi mahmah a omta ding; mual kimkhat mallam ah a kimkhat simlam ah a kisuan ding hi. Huchi in ka mualte guam lam ah na taikek ding uhi. 5Mualte guam Azal tung ding ahi ngal a; ahi, Judah kumpipa Uzzia damlai a zinling ma a kipan na taikek uh bang in; huchi in Toupa ka Pathian a hongpai ding a, a kiang a misiangthoute hon tonpih ding hi.
6Huan huai ni chiang in hichi ahi dia, khovot a omkei dia, vuk a omsam kei ding hi. 7Himahleh Toupa adia theih a om ni khat ahi ding; sun hilou, zan hilou; himahleh hichi ahi ding a, nitaklam in khovak a om ding hi.
8Huan huai ni chiang in hichi ahi dia, Jerusalem a kipan in tui hingte a luangkhe dia; a lak ua kimkhat suahlam tuipi ah, a lak ua kimkhat tumlam tuipi ah; nipi leh phalbi in a om den ding hi. 9Huchi in leitung tengteng ah Toupa kumpipa ahi ding; huai ni chiang in Toupa khat a min khat ahi ding hi.
Toupa Vualzohna Leh Vaihawmna
10Jerusalem sim Geba a kipan Rimmon tan, gam tengteng phaizang a suak ding a; Jerusalem bel Benjamin kongpi a kipan kongpi khatna chiang, a ning a kongpi chiang, Hananel insang a kipan kumpipa uain sukna pha a kipan khentuam in a om ding hi. 11Huai ah mite a teng ding ua, hamsia a om nawn kei dia; himahleh Jerusalem ah muangtak in a teng ding uhi.
12Huan Jerusalem kidoupih mite tengteng Toupa’n a gawtna ding hi bel hiai ahi ding; a khe ua a dinlai un, a sa uh a muat dia, a mit hawm sung uah a mit uh a muat ding, a kam sung uah a lei uh a muat ding hi.
13Huai ni chiang in hichi ahi dia, Toupa a kipan nakpitak a buaina a lak uah a hongom dia; michih in a invengte khut ah a len chinten ding ua, a invengte khut dou ding in a khut a kisa ding uhi. 14Judah in leng Jerusalem ah a dou dia; khokim khovel a namte tengteng hauhsakna dangkaeng, dangka, puansilh a tam a tam in a lakhawm ding hi.
15Huchibang in hiai gawtna hipi gamsa tengteng leh sakol, sakolneu, sangawngsau leh sabiltungte puaninte ah hiai gawtna a om ding hi.
16Huan hichi ahi ding a, Jerusalem dou dia hong kuan nam tengteng lak a nutsiat a om michih a kum sik in Kumpipa, sepaihte Toupa, be ding leh biakbukte Ankuangluina nei ding in Jerusalem ah a kuantou ding uhi. 17Hichi ahi dia, lei a inkaw tengteng, Jerusalem a Kumpipa, sepaihte Toupa, be ding a hohtou lou peuhmah, a tung uah vuah a zukei ding hi. 18Aigupta inkuan a hohtouh louh ua, a hongpai kei uleh, amau tung ah leng vuah a zukei ding; biakbukte Ankuangluina nei dia hohtou lou namte gawtna ding hipi a omzaw ding hi. 19Hiai Aigupta gawtna bel biakbukte Ankuangluina nei dia hoh lou nam tengteng gawtna ahi ding hi.
20Huai ni chiang in sakol longte ah, TOUPA A DING A SIANGTHOU, chih a kigelh ding a; Toupa inn a belte maitam ma a noubemte bang ahi ding uhi. 21Ahi, Jerusalem leh Judah a bel tengteng sepaihte Toupa ading in siangthou ahi ding uh; a kithoihte a hongpai ding ua huai belte la in kithoihna sa a huan ding uhi, huai ni chiang in sepaihte Toupa inn ah Kanaan mi a om nawn kei ding hi.
Currently Selected:
ZEKARIAH 14: PAITBSI
Highlight
Share
Copy
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
