ZEKARIAH 13
13
Jerusalem Hih Siangthouna
1Huai ni chiang in khelhna leh nitna siangsak ding in, David inkawte leh Jerusalem a tengte ading in tuikhuk kihong a hongom ding hi.
2Huai ni chiang in hichi ahi ding a, gam a kipan in milimte minte ka satkhe ding a, theihgige in a omta kei ding uhi; huan zawlneite leh kha nin gam a kipan in ka pai khesak ding, sepaihte Toupa’n a chi. 3Hichi ahi ding a, zawlnei kuapeuh a hong kilat lai leh, amah suangtu a nu leh pa’n a kiang ah “Na hing kei ding: Toupa min in zuau na gen a” a chi ding ua; amah suangtu a nu leh pa’n thu a genkholh ziak in amah a sun pailet ding uhi. 4Huai ni chiang in hichi ahi ding a, zawlneite thu a genkholhna uah, a mengmuh uah a zahlak chiat ding ua; khem ding in samul phan puanak leng a silh sam kei ding uhi. 5“Zawlnei ka hi kei, leiletmi ka hi; ka tuailai a kipan a sikha a bawl ka hih khittak ziak in” a chi zaw ding uhi. 6Mi’n a kiang ah, na bante kikal a liamnate bang ahia? a chi ding uhi. Huchi in aman, “Huaite ka lawmte inn sung a ka liamna ahi uh” chi in a dawng ding uhi.
Belamchingtu Khetna
7“Aw namsau, ka belamchingmi dou ding leh, mi ka lawm dou ding in halh in, sepaihte Toupa’n a chi: belamchingmi khen in, huan belamte a dalh ding uh; huchi in a neute tung ah ka khut ka lik ding hi. 8Huan hichi a honghi ding a, gam tengteng ah, huai a seh nih satkhiak in a om dia a si ding uhi; himahleh huai a a thumna nutsiat in a om ding, Toupa’n a chi. 9Huan a seh thumna mei a paisuak in ka hontawi dia, dangka hihsiangthou bang in ka hihsiangthou ding a, dangka ettel bang in ka entel ding hi; ka min a lou ding ua, amau ka dawng ding; ka mite ahi, ka chi dia, amau, Toupa ka Pathian ahi” honchi ding uhi.
Currently Selected:
ZEKARIAH 13: PAITBSI
Highlight
Share
Copy
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
