ZEKARIAH 12
12
Judah A Hat Ding Hi
1Judah tungtang a Toupa thu kilakna. Van phalh khia a, lei kingakna koih a, mihing sung a mihing kha koihpa, Toupa’n hichi in a chi. 2“Ngai in, khaw kimvel a mite ading in Jerusalem hoina nou in ka bawl ding a, Judah tung ah leng, Jerusalem lakna ah ahi ding hi. 3Huan huai ni chiang in hichi ahi ding a, mi tengteng ading in Jerusalem suang chimtakhuai in ka bawl ding a, amah ziak a tunggik kisate nakpi a liamsak in a om ding ua, amah dou ding in lei a namte tengteng a kikhawm khawm ding uhi. 4Huai ni chiang in lamdangsakna toh sakol chih ka khen ding a, hehna toh a tungtuangmi; huan Judah inkawte tung ah ka mit a hak ding a mittawtna in mite sakol chih ka gawt ding hi. 5Judah hausate’n a lungtang un, Jerusalem a tengte’n sepaihte Toupa a Pathian uah hatna a nei uh” a chi ding uhi.
6“Huai ni chiang in Judah hausate sing lak a mei am bang in ka bawl dia, buhphal lak a meisel bang in; a kimvel a mite tengteng a negai ding uh. Khut taklam pang leh veilam pang a; Jerusalem amah mun ah a hong tengnawn ding uhi, Jerusalem mahmah ah.
7 Toupa’n amasa in Judah puaninte leng a hondam ding. David inkawte thupina leh Jerusalem a tengte thupina Judah tung a kiliksak louhna ding in. 8Huai ni chiang in Toupa’n Jerusalem a tengte a hum ding a, a lak ua hatlou pen leng huai ni chiang in David bang a hi ding ua; David inkawte Pathian bang in a om ding ua, a ma ua pai Toupa angel bang in. 9Huai ni chiang in hichi ahi ding a, Jerusalem dou ding a hong kuan namte tengteng hihse ding in ka kuankhe ding hi.
Jerusalem Sunna
10Huan David inkawte tung leh Jerusalem a tengte tung ah hehpihna leh thumna kha ka sungbaw ding a; a sutpa uh lam a en ding uhi: amah a sun ding ua, min a tapa neihsun a sun bang in, amah, min a tamasa khasetak a a kah bang in, a kah ding uhi. 11Huai ni chiang in Jerusalem ah sunna thupi a om ding, Megiddon guam a Hadadrimmon sunna bang in. 12Huan gam pumpin a sun dia; inkuan chih in a tuam in; David nam inkawte a tuam in, a zite un a tuam in; Nathan nam inkawte a tuam in, a zite un a tuam in 13Levi nam inkawte a tuam in, a zite un a tuam in, Shimei inkawte a tuam in, a zite un a tuam in; 14inkuan omlai teng a inkuan chih a tuam in, a zite un a tuam in.
Currently Selected:
ZEKARIAH 12: PAITBSI
Highlight
Share
Copy
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
