ZEKARIAH 11
11
Lebanon Khopi Pukna
1Aw Lebanon, mei in na
sidar singte a kattum theihna ding in na kongkhakte hong in.
2Aw meilah sing, mau vongvong
in, Sidar sing a pukta ngal a,
a hoihtatate hihsiat a a om ziak un;
Aw nou Bashan tosaw singte chiau vongvong un,
gammangpi vatpaih ahita hi.
3Ngai un belamchingmite a mau vongvong ding ua,
na thupina uh loh a a om ziak in,
Ngai un humpinelkai a humham a!
Jordan gammang a thengta hi!
Belampu Chi Nihte
4Hichibang in Toupa ka Pathian in a chi hi, “Goh ding belamhon chingpa honghi in. 5Amau leite’n a that ua, gawt in a omkei ua; amau zuakte’n Toupa phat in om hen! ka hauta uh! Amau chingte’n a lainat kei uhi” a chi uhi.
6“Gam a tengte ka hehpih nawn kei ding” Toupa’n a chi. Himahleh ngai in mite michih a invengte khut ah leh, a kumpipa khut ah ka pe ding; amau gam a gawt ding ua, a khut ua kipan amaute ka hunkhe kei ding” chi in.
7Huchi in belamte a sumdawngte adia thahdia om belamte chingpa ka hong hita hi. Huchi in chiang nih ka kilak a; khat pen ‘Deihsakna’ ka chi a, a dangpen ‘Kizopna’ ka chi; huchi in belamte ka vak hi. 8Huan kha khat in belamchingmi thum ka satkhia hi. Himahleh ka kha in amau a chimtak a, amau kha in leng kei a hon chimtak uhi. 9Huaitak in ken, “K’on vak kei ding, a sisi, si heh, satkhiak a om ding satkhiak in om heh; nutsiatte khat leh khat sa kine tuah uhen” ka chita hi. 10Huan ‘Deihsakna’ chiang ka la a, ka sattan a, mite tengteng toh ka thukhun ka bawl ka suksiat theihna ding in. 11Huchi in huai ni’n a kitanta huchi in pawlte lak ah a genthei kei hon limsakte’n Toupa thu ahi chih a thei uhi. 12Ken a kiang uah. “Hoih a na ngaihtuah ua leh, ka lohtak honpia, un ahihkeileh, tang un” ka chi hi. Huchi in ka lohtak ding in ‘dangka sekel sawmthum’ a buk uhi.
13Huan Toupa’n ka kiang ah, “Ka man dia a seh uh, man hoih belvelmi kiang ah khia in” a chi hi. Dangka sekel sawmthum ka la a Toupa inn a, belvelmi kiang ah ka khia hi. 14Huchi in ka chiang dangpen ‘Kizopna’ ka tumtan a, Judah leh Israel kikal a ki unauna ka suksiat theihna ding in.
15Huan Toupa’n ka kiang ah, “Belamching mihai vanzatte kilak nawn in a chi hi. 16Ngai in, gamsung a belamchingmi ka bawlkhe ding hi. Aman satkhiak a om dingte a vehkei dia, delhzak a om dingte leng a zong sam kei dia, satkeh a omte leng a hihdam sam kei ding, a hoih leng a vaksam kei dia, himahleh a thau sa a ne ding a a chinte nangawn uh a tolsak ding hi. 17Belamhonte nusia belamchingmi phattuamna bei tung a gik hi; a ban tung leh a mit taklam tung namsau in dou ding a; a ban a keugawp kiuhkeuh ding a, a mit taklam a mial bikbek ding!” a chi hi.
Currently Selected:
ZEKARIAH 11: PAITBSI
Highlight
Share
Copy
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
