PHILIPPITE 4
4
Thuhilhna
1Huaiziak in ka unau it leh ngaih, ka kipahna leh ka manglukhute aw, Toupa ah kiptak in ding un, ka itte aw.
2Iodia ka thuhilh a, Sintikhe ka thuhilh a, Toupa a lungsim kibang pu ding in. 3Ahi, nou leng k’on ngen hi, hakkol puakpih muanhuaite, Tanchinhoih a ka na seppih hiai numeite, Klimen leh ka naseppih dangte hinna bu a min tuangte leng na panpih un.
4Toupa ah kipak gige un; ka chi nawn ding hi kipak un.
5Na migitna uh mi tengteng kiang ah kithei hen, Toupa a nai hi. 6Bangmahlou ah mangbang kei un; himahleh thil bangkim ah, thumna ngetna, kipahthugenna toh na ngetnate uh Pathian kiang ah theihsak in om hen. 7Huchi in Pathian muanna, lungsim himhim a theihzoh vuallouh in Khrist Jesu ah na lungtang leh na ngaihtuahnate uh a hon kepsak ngeingei ding hi.
8Huaikhit chiang in unaute aw, thil dik peuhmah, thil phathuai peuhmah, thil kilawm peuhmah, thil siangthou peuhmah, thil hoih peuhmah, thil minhoih peuhmah, hoihna himhim a om a, phatna ding a om leh huai thilte ngaihtuah un. 9Keimah a na thil theihte, tante, zakte leh muhte uh, huai thilte hih un. Huchi in muanna Pathian na kiang uah om ding hi.
Philippite Tung a Paul Kipahna
10Himahleh nakpitak in Toupa ah ka kipak hi, huchi a tua kei n’on awlmohna uh a thak nawn ziak in: n’on limsak mahmah ua, himahleh hun kizen na neikei ua ahi. 11Taksap ziak a hiai thu gen ka hi kei a; bangchi bang in om mah leng huai a lungkima omdan ka theikheta hi. 12Zawn dan ka siam a, hauhdan leng ka siam, thilchih leh thil tengteng a gilvah leh gilkiala om theihna leh niang leh tasama om theihna thuguk ka thei kheta hi. 13A hon hihhatpa Khrist ah thil tengteng ka hihthei hi.
14Huchi a ka mangbatna a n’on panpih ziak un na hihhoih mahmah uhi. 15Nou mahmah, nou Philippite ngei in leng Tanchinhoih omtunga kipat, Masidonia gam a kipan a ka painung nou chihlouh saptuam dang kuamah in piak leh muh lam ah, honpe kei uh chih na thei uhi. 16Thessalonika khua ah ka taksap awng n’on huksakta uhi. 17Thilpiak ka zon ziak ahi kei a, nou ading a gahpung ka zong ahizaw hi. 18A himhim in thil bangkim ka nei a, ka hau a; hihdim in ka om a noumau apat bangbanghiam, gimnamtui, kithoihna hoih, Pathian kipaksak, Epafrodita a kipan in ka na mu hi. 19Huai chiang in ka Pathian in Khrist Jesu thupina a hauhna bang in na taksap tengteng uh a honpe ngeingei ding hi. 20Tuin Pathian leh i Pa uh kiang ah tangtawn, tangtawn in thupina om hen, Amen.
Chibaibukna Nanung
21Khrist Jesu a misiangthou tengteng chibai hon buksak un. Ka kiang a unau omte’n leng chibai honbuk uhi. 22Misiangthou tengteng in chibai a honbuk uhi, Kaisar inkuanpihte ahi deuh tuam uhi.
23Toupa Jesu Khrist hehpihna in hon ompih hen, Amen.
Currently Selected:
PHILIPPITE 4: PAITBSI
Highlight
Share
Copy
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
