PHILIPPITE 3

Khrist Suan Ding Ahi

1Atawppen in unaute aw, Toupa ah kipak un. A ngeimah gelh kei ading in a chimtakhuai kei a, nou ading in a hoihzaw hi. 2Uite lak ah kiveng un, na gilou semte apan kiveng un, sa atgawp mite apan kiveng un. 3Pathian kha a bia, Khrist Jesu suang, zeksum diktak i hi uhi, huan sapum ah suanding i neikei uhi. 4Sapum ah suang ding chile hang kei mahmah in suanding ka neisem ding hi. Mi himhim in sapum a suanding nei a a kitheih leh ken ka neisem hi: 5A ni giatni a zeksum, Israel chi, Benjamin nam, Hebru mi kholdiak, dan lam a Pharisai; 6Phatuamngaihna lam chi lehang saptuamte sawi; dan a diktatna lam chi lehang gensiatbei ka hi. 7A hihi hitaleh, thil kei adia punna peuhmah Khrist ziak in manna in ka simta hi. 8Hitaktak hi, ka Toupa theihna manpha ziak in thil tengteng ka tanta hi. Khrist ka tan theihna ding in thil tengteng ninneng bang phet in ka sim hi. 9Amah a ka om theihna ding in leh dan a kinga keimah diktatna hilou a, Khrist ginna ziak a om pen, ginna a kinga Pathian apan suak diktatna nei zaw in. 10Huchi a Amah leh a thohnawnna thilhihtheihna ka theih a, a thuaknate tanpiha, a sihna a Amah batna ka neih theihna ding in. 11Bang chi hiam a misi lak a kipan thohnawnna ka ngah theih khak leh chi in.

Phakchiam Delhna

12Hiai tangkhin ka hi kei a, bukim khinta ka hi kei; himahleh huai mah kei a hihsak tum in ka delh teitei hi, Khrist Jesu’n kei amah a hon hihsaktak ziak in. 13Unaute aw, tangkhinta in ka kingai kei a: himahleh thil khat ka hih; nunglama omte mangngilh in malama ompen ka delh hi; 14Khrist Jesu a Pathian sapna sang kipahman mu ding in phak chiamna ka delh hi.

15Huaiziak in i lak ua a piching deuhdeuh bek in huchibang lungsim i nei ding uh: huchi a thil peuhpeuh a lungsim dang na neih uleh Pathian in nou a hon theisak ngei ding hi. 16I hongtunna i ngahna chiang uah muanhuai in kip peuhmah ni uh.

Van Khua Leh Tui

17Unaute aw, kei hon enton vek unla huchibanga omte zuih ding a n’on neihte uh chiamteh un. 18Mi tampi a om ua, a tanchin uh k’on hilhta hi, amau Khrist Kros melmate a hihdan uh tuin leng kapkawm in k’on hilh hi, 19Leilam thil ngaihtuahte zaw a tawpna uh siatna ahi a, a pathian uh a gilpi uh ahi a, a thupina uh leng a daina uh ahi. 20I khoveng hihna uh van ah ahizaw a; huai a kipan mah in Toupa Jesu Khrist hondampa i ngak uhi. 21I pumpi thulimlou amah thupina pumpi toh kibang ding in, a hon bawlthak sak ding a, thil bangkim amah thuthu a a omsak theihna thilhihtheihna in.

Currently Selected:

PHILIPPITE 3: PAITBSI

Highlight

Copy