PHILIPPITE 2

Khrist Kingaihniamna

1Huaiziak in Khrist a thu kihilh ding a om a, itna a kinep theihna ding a om a, kha toh kithuahna, kilainatna leh kihehpihna a om leh, 2huai lungsim mah pu in, hichibang itna mah nei unla, tup kibang leh lungsim khat nei in ka kipahna hon hihkim sakun. 3Kikhenna ding leh kithupisakna ziak in bangmah hih kei un; lungsim niamlak in michih in amah sang in midang hoihsa zaw hen. 4Na lak ua kuapeuh in amah ading kia enlou in, midang a leng en sam hen. 5Khrist Jesu a om hiai lungsim nei le uchin:

6Amah Pathian bang a om hinapi in,

Pathian toh kikim a om thil khiaklah ding in a sepkei hi,

7Himahleh amah a hong ki awngsak a,

sikha bang in a hongom a,

mihing bang a bawl in a hongom hi;

8Huchi in mihing mel a honpu a,

hong kihihneu in si ding in thu a hon mang a, ahi,

Kros a sihna a hong thuak hi.

9Huaiziak in Pathian in amah nakpitak in a hihlianta a,

min laklak a min tungnungpen a peta hi;

10Jesu min a mi tengteng a khukdin a, vantung,

leitung leh leinuai a thil om tengteng leh,

11lei tengteng in Jesu Khrist

Pa Pathian thupina ding a Toupa ahi a chih theihna ding un.

Aksite Bang a Tang

12Huchi a hih ziak in, ka itte aw, ka omlai kia hilou a, ka omlouh lai a leng thu na man theihtak mah bang un, lau leh ling kawm in na hotdamna chiat uh semkhia un; 13Amah lungtuak dia noumau a hon utsak leh hon semsakpa Pathian ahi.

14Dawngdawng lou leh phunphun lou in thil bangkim hih un: 15Khangthak gilou leh khial, a lak ua khovel vak bang a na tennate lak uah Pathian ta gensiatbei leh siangthou, 16Hinna thu taklang na hih theihna ding un; huai a kipan a ken Khrist ni a hongtun chiang a, a thawn in ka semgim kei a, a thawnin ka taigim kei ka chih ngamna ding in.

17Ahi, na ginna thillat tung ua Pathian adia buakkhiak a om ding na hi leng ka dah kei a, na vek un k’on kipahpih hi. 18Huaiziak mah in, nou leng kipak unla; keileng hon kipahpih un.

Timothi

19Abang abang hileh na omdan uh ka theih a lungmuanga ka om theihna ding in Timothi na kiang ua honsawl pah Toupa Jesu ah ka lamen hi. 20Hichibang lungsim pu a, na hoihna ding uh awlmoh midang kuamah ka neikei hi. 21Jesu Khrist thilte zong lou in, avek un amau tuam chiat a zong uhi. 22Himahleh aman tuh ta in a pa nna a sep bang in Tanchinhoih genzakna ah kei a hon seppih chih theihchetna amah ah na nei uhi. 23Huaiziak in bangchi’n ka om dia chih k’on theihchet peuhpeuh chiang in amah hon sawlkhiak pah ka kilamen hi; 24Himahleh keimah mah leng ka hongpah ding chih Toupa ah ka kilamen hi.

Epaphrodita

25Himahleh ka sanggam leh seppih leh sepaih pih leh na taksapna ua gamtang leh sawltak Epafrodita na kiang ua honsawl kiphamoh ka sa hi; 26Na vek un a hon ngai mahmah hi, a damlouh thu na zak un, a lungkham mahmah hi. 27Si dektak in a china ngei a; himahleh Pathian in a tung ah hehpihna a nei a; amah tung kia leng hilou in kei tung ah leng ahi sam a, huchi a lungkhamna ka neih sawnsawn louhna ding in. 28Huaiziak in amah k’on sawlteitei hi, amah na muh chiang un na kipahpih un, huchi a keileng ka dah luat louhna ding in. 29Huaiziak in kipaktak in Toupa ah amah na kipahpih unla; amah na ngaisang un; 30Khrist nasepna ah amah tuh a hong sideka, kei ding a na hihkim louhte uh hon hihsak a tupna lam ah a hinna a khuai dektak hi.

Currently Selected:

PHILIPPITE 2: PAITBSI

Highlight

Copy