MARK 3

Mi Khutzaw Hihdamna

(Matt. 12.1-8; Lk. 6.1-5)

1Huan kikhopnain ah a lut nawn a; huai ah khutzaw khat a na om hi. 2Amah a hek theihna ding un khawlni a a hihdam nop leh noplouh a enkhia uhi. 3Aman khutzaw kiang ah, “Ding khia in” a chi hi. 4Huan a kiang uah, “Khawlni’n hihhoih hia siang, hihsiat? Hotdam hia siang, hihlup?” chi’n a dong hi. Himahleh a daidide uhi. 5Huan a lungtang uh tak ziak a lungkham mahmah leh hehkawm a amaute a et velvel nung in, huai mi kiang ah, “Na khutzan in” a chi a, huchi in, a zankheta a a khut a damta hi. 6Pharisaite a pawtkhia ua, amah hihlup theihna ding lampi ngaihtuah in Herod pawl a mite toh a kihoukhawm pah uhi.

Hihdamna Dangte

7Jesu a nungzuite toh dil lam ah a paimang ua; Galili gam a kipan mipi tampitak in a zui uhi; 8A thilhih thupidan a zak un Judia gam a kipan, Jerusalem khua a kipan, Idumai gam a kipan, Jordan gal a kipan, Tura leh Sidon khokim a kipan in mipi tampitak a kiang ah a hongpai uhi. 9Mipi ziak in amah adia long neu mansa a om ding in a nungzuite a hilh hi, huchilou in zaw honum lutlut ding uh, a chi hi. 10Mipi tampi a hihdamtak ziak in natna nei peuhmah in amah a khoih theihna ding un a boh huthut uhi. 11Dawininte’n leng amah a muh un a ma ah khupboh in, “Nang Pathian Tapa na hi” chi in, a kikou uhi.

12Huan a tanchin genthang lou ding in a kiang uah a chi bikbek hi.

Sawltak Sawmlehnih Telna

(Matt. 10.1-4; Lk. 6.12-16)

13Huan tang ah a hohtou a, aman a ngaihngaih a sam a; amau a kiang ah a hohtou uhi. 14A kiang a om ding leh thugen dia a sawlkhiak ding in sawmlehnihte a namkip hi. 15Natnate hihdam ding leh dawite delhkhe ding in thuneihna a pia hi.

16Huai mite, Simon, Peter, a chih pa; 17Zebedai tapa, Jakob leh Jakob unau Johan, huai mite Boanerges a chihte; huai omdan tuh vanpiging tapate chihna ahi. 18Andru, Philip, Bartholomai, Matthai, Thomas, Alphai tapa Jakob, Thaddai, Kanan mi Simon leh, 19a mansakpa, Judas Iskariot ahi uhi.

Jesu Leh Beelzibul

(Matt. 12.22-32; Lk. 11.14-23; 12.10)

20Huaizoh in, in khat ah a lut uhi. Huai ah mipi tampi a hong ki khawm nawn ua, huchi in an nangawn leng a ne theikei uhi. 21Huan a lawmte’n a zak un, “Lungsim buai” chi in amah mat a tum uhi.

22Huan Laigelhmi, Jerusalem khua a kipan a hongsukte’n, “Beelzibul a zawl hi, dawite kumpipa ziak in ahi, dawite a delhkhiak” a chi uhi.

23Jesu’n laigelhmite a sam a, gentehna in a kiang uah, “Setan in Setan mah bangchi in a delhkhe thei dia? 24Gam leng amah a kidou leh, huai gam ading khe theikei ding hi. 25Inkuan khat leng amah a kidou uleh, huaite inkuan ading khe theikei ding uhi. 26Setan leng amah kidou a, a kilan leh, ading khe theikei ding a, a mangthang zaw ding hi. 27Kuamah in mi hatpa a hen masak phot kei leh inn a lut in a sum a laksak theikei uhi, huai nung in bel a inn a lok mai ding uhi.

28“Chihtaktak in k’on hilh ahi, mihing tate, a khelhna tengteng uah leh Pathian a gensiatna bang peuh uah leng a gensiatnate uh ngaihdam ahi ding hi. 29Kuapeuh Kha Siangthou hilhial gensia zaw chikmah chiang in ngaihdam a hi kei ding a, tangtawn khelhna a siamlouh in a omzaw ding” a chi hi. 30Dawinin a zawl ahi, a chih ziak un huai a gen ahi.

Jesu Nu Leh Sanggamte

(Matt. 12.46-50; Lk. 8.19-21)

31Huan a nu leh a unaute a hong ua, inn pua ah ading ua; amah sam di’n mi a sawl uhi. 32A kim ah mipi tu diamduam te’n a kiang ah, “Ngai dih, inn pua ah na nu leh na sanggampate’n a hon ngak uh” a chi uhi.

33Aman a kiang uah, “Ka nu leh ka samgampate kuate ahi ua?” chi’n a dong hi, 34A kiang a tute a en vialvial a, “En un, ka nu leh ka sanggampate; 35kuapeuh Pathian deihlam hih photphot ka sanggampa, ka sanggamnu leh ka nu ahi uh” a chi hi.

Currently Selected:

MARK 3: PAITBSI

Highlight

Copy