MARK 2

Mizaw Hihdamna

(Matt. 9.1-8; Lk. 5.17-26)

1Huan ni bangzah hiam nung in Kapernaum khua a a honglut nawn leh, inn ah a om chih thu a hongthang hi. 2Huchi in kongkhak kim a omna ding omlou khop in mi tampi a hong kikhawm ua, a kiang uah thu a gen hi. 3Mizaw khat, mi li zawn, a kiang ah a honpi uhi. 4Mipi ziak a a kiang nai a a hongpai theihlouh ziak un a omna intung a laihong ua; huaikhit in a lupna leh atunga mizaw lumkawm in a khai khesuk uhi. 5Huchi in Jesu’n a ginna uh a muh in, mizaw kiang ah, “Ka tapa, na khelhnate ngaihdam ahita” a chi hi.

6Laigelhmi khenkhat huai mun ah a tu uhi. 7“Hiai min bangdia hichibang thugen ahia? Pathian a gensia hi; mi khat, Pathian kia loungal, kuan ahia khelhnate ngaidam thei?” chi in, a lungtang un a ngaihtuah uhi.

8Huan Jesu’n, a lungtang un huchibang a ngaihtuah uh chih a lungsim in a theipaha, a kiang uah, “Huai thu bangdia na lungtang ua ngaihtuah na hi ua? 9Mizaw kiang a, ‘Na khelhnate ngaihdam ahita,’ chih leh ‘na lupna la inla, khe in paita in,’ chih a koi ahia a gen nuamzaw? 10Himahleh leitung ah Mihing Tapa in khelhnate ngaihdam theihna a nei chih na theihna ding un” ahi, mizaw kiang ah: 11“Thou inla, na lupna la inla, na inn ah pai in, k’on chi” a chi hi.

12Huchi in amah a thou a, a lupna a lapah in, avek ua mitmuh in a paita hi; huchi in avek un lamdang a sa mahmah uh, hichibang himhim i mu ngeikei, chi in, Pathian a phat uhi.

Levi Sapna

(Matt. 9.9-13; Lk. 5.27-32)

13Huan a pawt nawn a dilgei ah a paita hi, mipi tengteng a kiang ah a vapai ua, aman thu a na hilh hi. 14A paikawm in, Levi, Alphai tapa, siahpiakna mun a tu a mu a, a kiang ah, “Honzuiin” a chi hi. A thou a a zuita hi. 15Huan hichi ahi a, Jesu’n Levi inn ah an a um a, siahkhawnmite leh mikhialte tampi in Jesu leh a nungzuite a umpih uhi, amah zuite tampi ahi uhi. 16Pharisaite leh laigelhmite’n Jesu’n mikhialte leh siahkhawnmite kiang a a nek a muh un, a nungzuite kiang ah, “Bangchidan ahia siahkhawnmite leh mikhialte kiang a a nek a a dawn?” a chi uhi.

17Jesu’n huai a za a, a kiang uah, “Mi chidamte’n daktor a kiphamoh kei ua, midamloute’n a kiphamoh zaw uhi; mi diktatte sam ding a hongpai ka hi kei a, mikhialte sam ding a hongpai ka hi zaw” a chi hi.

Anngawl Thu A Dotna

(Matt. 9.14-17; Lk. 5.33-39)

18Huan Johan nungzuite leh Pharisaite’n an a ngawl zel uhi. Amau a hongpai ua, Jesu kiang ah, “Bangdia Johan nungzuite leh Pharisaite nungzuite’n anngawl ua, nang nungzuite’n a ngolh samlouh uh?” a chi uhi.

19Jesu’n a kiang uah, “Moupite kiang a a pasal a omlai teng mou pite’n an a ngawl thei ua hia? A pasal ding a kiang ua a omlai teng a ngawl theikei ding uhi. 20Himahleh a pasal a kiang ua kipan pimang nite a hongtung ding a, huai ni chiang in zaw a ngawl ding uhi.

21Kuamah in puan lui puan tuikhai nailouh them in a thuap ngeikei uh; thuap le uh, thuap bit a sawmna lam uah a kai kek ding a, a thak in a lui a kai kek ding a, a hong kek semsem ding hi. 22Huan kuamah in uain thak, savun uain thawl lui ah a thun ngeikei, uain in savun thawl a phukham ding a, uain a bawbei ding hi, savun thawl mah leng; uain thak savun uain thawl thak ah a thun zaw uh” a chi hi.

Khawlni Thu A Dotna

(Matt. 12.1-8; Lk. 6.1-5)

23Huan hichi ahi a, Jesu khawlni’n buhlei ah a paisuak hi, a nungzuite’n a paikawm un buhvuite a khiak uhi. 24Pharisaite’n a kiang ah, “En dih, bangdia khawlni a hihsianglou hih ahi ua?” a chi uhi.

25Aman a kiang uah, “David leh a lawmte a taksap ua a gilkial lai ua a thilhih uh na sim kei ua hia? 26Abiathar siampu lianpen a hihlai a, Pathian inn a a lut a, siampute kia loungal in a nek sianglouh tanghou koihtuam a nek a, a lawmte kiang a a piaksam thu” a chi hi.

27Huan amahmah in, a kiang uah, “Khawlni zaw mihing adia bawl ahi, mihing bel khawlni adia bawl ahi kei hi. 28Huchi in Mihing Tapa zaw khawlni tung nangawn a Toupa ahi” a chi hi.

Currently Selected:

MARK 2: PAITBSI

Highlight

Copy