MARK 1

Baptispa Johan Leh A Thupuak

(Matt. 3.1-12; Lk. 3.1-18; Jn. 1.19-28)

1Pathian Tapa, Jesu Khrist Tanchinhoih kipat tungna. 2Zawlneite a gelh a hih bang in,

“Ngai dih, ka thangkou na ma ah ka sawl a, aman na lampi a bawlkhol ding;

3Gamdai a kikoupa aw in,

Toupa lamlian sial unla,

a lampite hihtang un” chi a a gelh bang in.

4Johan in gamdai ah a baptist a, khelhnate ngaihdamna ding a kisikna baptisma thugen in, a hongpawt hi. 5Judia gam a mi tengteng leh Jerusalem khua a mi tengteng a pawt ua, a kiang ah a pai ua, a khelhnate uh thupha tawi in Jordan lui ah, amaute a baptist zel hi.

6Johan sangawngsau mulpuan in a kivan a, a kawng savun kawnggak a gak a, a an khaukhup leh khuaizu ahi. 7“Ka nung ah kei sang a thupizaw a hong pailel ahi; kuna a khedap khau pheltak leng ka hi kei,” a chi hi. 8Ken tui in nou k’on baptist a; aman zaw Kha Siangthou in a hon baptist ding” chi in a gen hi.

Jesu Baptisna Leh Khemna

(Matt. 3.13—4.11; Lk. 3.21-22; 4.1-13)

9Huai nite in hichi a honghi a, Jesu Galili gam a Nazaret khua a kipan a hongpai a, Jordan lui ah Johan in a na baptist hi. 10Tui apan a hong pawttak in, van kihong leh kha vakhu bang a a tung a hongkum a mu hi. 11Huan van a kipan aw a hongpawt in, “Nang ka Tapa deihtak na hi a, na tung ah ka kipak mahmah” a chi hi.

12Kha in amah gamdai ah a sawlpah hi. 13Huchi in, Setan khem in gamdai ah ni sawmli a om a, gamsa lak ah a om a; angelte’n a nna a sepsak uhi.

Jesu Nasep Patna Ngamanmi Li Sapna

(Matt. 4.12-22; Lk. 4.14-15; 5.1-11)

14Johan mat a a om nung in, Jesu, Pathian lalgam Tanchinhoih gen in, Galili gam ah a hong paita hi. 15“A hun a hongtungta a, Pathian gam a hong naita; kisik unla Tanchinhoih gingta un” chi in.

16Galili dilgei a nawklai in Simon leh Simon unaupa Andru dil ah lenpai in a mu a; ngamanmi ahi him uhi. 17Jesu’n a kiang uah, “Honzui un, huchi in mihing man din k’on bawl ding” a chi hi. 18A len uh paisan in amah a zuipah uhi.

19Saulou a pai leh Zebedai tapa Jakob leh a unaupa Johan a mu a, huaite len bawlpha in long ah a om uhi. 20Huan aman amau a sampah a; a pa uh Zebedai leh kilohmi a goihte utoh long nusia in a zuita uhi.

Dawininpai Jesu Hihdamna

(Lk. 4.31-37)

21Huan Kapernaum khua ah a valut ua; khawlni’n kikhopnain ah a lut a, thu a hilh hi. 22laigelhmite banglou a, thuneitak a amau thu a hilh ziak in a thuhilh lamdang a sa mahmah uhi.

23A kikhopnain uah dawininpai mi khat a na om a; aman: 24“Nazaret Jesu, kou leh nang bang ahia i kizolhna om? Kou hon hihmang dia hongpai na hi maw? Nang k’on thei a, Pathian Misiangthou na hi” chi in, a kikou khia hi.

25Jesu’n a tai a, “Dai inla, asung a kipan hongpawt in” a chi hi.

26Dawinin in amah a engbawl a ngaihtak a kikou in asung a kipan a hongpawtta hi. 27Huan avek un lamdang a sa mahmah ua, huchi in, hiai bang ahia le! Sinsakna thak ahi ve! Dawininte nangawn thuneitak in thu a pia a, a thu a mang zel uh, chi in, a kihou uhi.

28Huan Galili leh a kim gam tengteng ah a tanchin a thangta hi.

Peter Zi Nu leh Mi Tampi Hihdamna

(Matt. 8.14-17; Lk. 4.38-41)

29Huan kikhopnain a kipan a pawt un, Jakob leh Johan toh Simon leh Andru inn ah a lutpah uhi. 30Huan Simon sungnu, khosik in a chi a na a, a na lum a; huchi in, a omdan Jesu a hilh pah uhi. 31Huan Jesu’n a khut a len in, a phong a; huchi in khosik in a nuseta a, a na uh a sepsak hi.

32Huan nitaklam a nitum nung in, damlou tengteng leh dawimatte a kiang ah a honpi uhi. 33A khomi tengteng kongkhak bul ah a hong omkhawm khiukheu uhi. 34Huan mi tampi natna chiteng a nate a hihdam a, dawi tampi a delhkhia a; dawite’n amah a theih ziak un a pau uh a phalkei hi.

Galili Gam Nasepna

(Lk. 4.42-44)

35Huan zingsang khovak ma tham in a thou a, a pawt a, gamdai mun ah a hoh a, huai ah a thum hi. 36Simon leh a lawmte’n a nung ah a zui uhi. 37Amah a vamuh un a kiang ah, “Mi tengteng in a hong zong uh” a chi uhi.

38Aman a kiang uah, “Maban khuate ah paini huai a leng thu ka gen theihna ding in; huai mah ka hong pawtsan ahi” a chi hi.

39Huchi in thuhilh a dawite delhkhe kawm in Galili gam tengteng a a kikhopnainte uah a lut hi.

Phak Hihdamna

(Matt. 8.1-4; Lk. 5.12-16)

40Huan a kiang ah phak a hongpai a, “Na utleh n’on hihsiangthou thei” chi in a ma ah khukdin in a ngen ngutngut hi.

41Aman a hehpih mahmah a, a sawka, a khoih a, “Ka ut hi, na siangthouta in” a chi hi. 42Huchi in, phakna in amah a nuse paha, a hong siangthouta hi. 43Jesu’n amah a kham bikbek kawm in a sawlkhe pah hi. 44“Kuamah kiang a bangmah genlou ding in pilvang in; himahleh siampu kiang ah vakilak inla, na kisiansakna ding in Mosi thilsehte lan in, mite’n a hon theihchetna ding un” a chi hi.

45Himahleh amah a pawt a, huai thu nakpitak a kikoupih in a thangzakta hi; huchi in Jesu a langtang in khua ah a lutthei nawnta kei a, gamdai mun ah a om zawta hi; huan munteng a kipan a mite a kiang ah a hongpai uhi.

Currently Selected:

MARK 1: PAITBSI

Highlight

Copy