MARK 4
4
Buhchithehpa Gentehna
(Matt. 13.1-9; Lk. 8.4-8)
1Huan tuipiau ah thu a hilh nawn hi. Mipi tampitak a kiang ah a hong kikhawm ua, huchi in, dil ah long ah a tuang a, a tu a, mipi tengteng tuipiau a leitung ah a om uhi. 2Huan gentehna zang in thil tampi a sinsak a, amah sinsakna dan in a kiang uah,
3“Ngaikhia unla, en dih ua; buhchithehpa buhchi theh ding in a kuan hi. 4Huan hichi a honghi a, a thehlai in a khen lampi sik ah a kia a, vasate’n a nezou uhi. 5A khen suangsilei ah a kia a; lei a sah louh ziak in a pou pah hi. 6Himahleh ni a hongsuah in haivuai in a hongom a, zung a neih louh ziak in a vuaimang uhi. 7A khen loulingnei lak ah a kia a, loupa a hong khang a, buhkungte a depmang a, a gahta kei hi. 8A khen lei hoih ah a kia a, a pou a, a khanglian a, a gah a; a leh sawmthum a leh sawmguk leh a leh za in a pung chiat uhi” a chi hi.
9Huan a kiang uah, “Kuapeuh zakna ding bil nei in za hen!” a chi hi.
Gentehna Thiltup
(Matt. 13.10-17; Lk. 8.9-10)
10Huan amah kia a omlai in a kim a omte leh sawmlehnihte’n gentehna thu a dongchian thak uhi. 11Aman a kiang uah, “Pathian gam thuguk zaw noute kiang a piak ahi a, pawlam mite ading in bel bangkim gentehna a gen ahi. 12Muh zaw a mu na ua, theih zaw a theisiam kei ding uh, huchilou in zaw a kihei nawn ding ua, ngaihdam a hong hikha ding uh” a chi hi.
Buhchithehpa Gentehna Hilhchetna
(Matt. 13.18-23; Lk. 8.11-15)
13Huan aman a kiang uah, “Hiai gentehna thu na theisiam kei umaw? Huchi a hih in bangchi’n gentehna thudangte na theisiam tuan ding ua? 14Buhchithehpa’n thu a theh ahi. 15Lamsik a thu theh hiai bang ahi uh; thu a zaktak un Setan kintak a hongpai in a lungtang ua thutheh a lakmangsak hi. 16Huchi bangmah in suangsilei a theh hiaite ahi uh; thu a zak phet ua kipaktak a pom pahte. 17Himahleh amau ah zung a neikei ua, sawtlou chik kia a om uh; huai nung in thu ziak a gimthuakna hiam sawina hiam a hongom phet in a kipukpah pah uhi. 18Huan midangte loulingnei lak a theh bang ahi uh; huaite’n thu a zata ua, 19himahleh khovel lunggulhnate, thildang duhgawlnate a honglut chiang in, thu a dep a, gahlou in a om hi. 20Huchi in lei hoih a kia hiaite ahi uh; thu za a, pom, a leh sawmthum, a leh sawmguk, leh a leh za a gahte ahi uh” a chi hi.
Khawnvak Apan Gentehna
(Lk. 8.16-18)
21Huan a kiang uah, “Mi’n khawnvak de in a koihna a koihlou in, lawh nuai hiam, lupna nuai hiam ah a koih ngei ua hia? 22Thanglou ding a im bangmah a om ngeikei a, langlou ding a sel bangmah a omsam kei hi. 23Kuapeuh zakna ding a bil nei peuh in za hen” a chi hi.
24Huan a kiang uah, “Na zak uh bang ahia, pilvang un; na tehna ngei mah ua tehsak in na om ding ua, a tamzaw bawn piak in na om ding uhi. 25Kuapeuh a nei piak behlap in om ding ua, kuapeuh a neilou a neihsun nangawn laksak in om ding uh” a chi hi.
Haichitang Apan Sinsakna
26“Pathian gam tuh min lei a chi a tuh bang ahi a chi hi. 27Zan chiang in a ihmu a, sun chiang in a thou zel a; chi pou in a na khang a, himahleh bangchi a pou a, khang ahia chih a theikei hi. 28Lei in amah in gah a honsuah a; a masapen in akung, huan avui leh avui ah atang hongom hi. 29Himahleh a gah a min chiang in, buhlak a huntak ziak in, kawite in a atpah uhi” a chi hi.
Ankam Tang Gentehna
(Matt. 13.31-32; Lk. 13.18-19)
30Huan “Pathian gam bang toh i tehpih dia? Ahihkeileh, bang gentehna in ahia i genteh ding? a chi hi. 31Ankam chi tangkhat lei a a tuh un, lei a chi tengteng sang in neupen mahleh, 32A tuh nung un a hongpou a, loupa tengteng sang in a honglian zawta a, hiang liantak a honnei a, huchi in tungleng vasate a lim ah a giak uhi, huchi mah bang ahi” a chi hi.
33Huan huchibang gentehna thu tampi in, a theihsiam theih khomkhom uh, a kiang uah a gen zel hi. 34Himahleh gentehna lou in zaw a kiang uah thu a gen ngeikei; amah nungzuite kiang ah a sim in bangkim a hilhchian zel hi
Huihpi Jesu’n Daisak
(Matt. 8.23-27; Lk. 8.22-25)
35Huai ni mah nitaklam a hong hih in, a kiang uah “Galkhat lam i kai ding uh” a chi hi. 36Huchi in mipite paisan in, a om ngeingei bang in, long ah a paipih pah ua, long dangte leng a kiang ah a om uhi. 37Huchi in huihpi thupitak a hongnung a, tuikihotte long ah a hong kihot lut zuazua hi, huchi in long a hong dimta hi. 38Amah lukham kham a ihmu in, longmei lam ah a om hi. Huan a phawng ua a kiang ah, “Heutupa, ka manthat uh khawksalou na hi maw?” a chi uhi.
39Amah a hongthou a, huih a tai a, dil kiang ah leng “Dai inla, om kinken in” a chi hi. Huan huih a tawp a, a hong daidide hi. 40Aman a kiang uah, “Bangchi a hichitel a lau na hi ua oi? Ginna neilou na hi umaw?” a chi hi.
41Huchi in lau petmah in a lau ua, “Hiai mi kua ahia le, huih leh dil nangawn in a thu a man uh?” a kichi uhi.
Currently Selected:
MARK 4: PAITBSI
Highlight
Share
Copy
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
