MATTHAI 28

Jesu Thohnawnna

(Mk. 16.1-10; Lk. 23.1-12; Jn. 20.1-10)

1Huan khawlni a bei in, ni sagihni masapen ding a phalvak in, Mari Magdalini leh Mari dang han ending in a kuan uhi. 2Ngai dih, nakpitak in zin a hongling a; Toupa angel van a kipan a hongsuk a, suang a hong khukkhia a, a tung ah a tuta hi. 3A mel omdan khophia bang ahi a, a puansilhte tuh vuk bang in a ngou hi; 4Amah a kihtak ziak un vengmite a ling ua, misi bang in a hong omta uhi.

5Angel in numeite a houpih a, a kiang uah, “Nou zaw lau kei un: Jesu, a kilhden uh na zong uh chih ka thei: 6Hiai ah a omta kei; a gen bang ngei in a thounawnta, a lupna mun en un, a chi uhi. 7Paimeng unla, nungzuite kiang ah, ‘misi lak a kipan a thounawnta hi; ngai dih uh, Galili gam ah na ma uah a pai; huai ah amah na mu ding uh’ chi in, hilh un. Ngai dih uh, k’on hilhta ahi” a chi hi.

8Huan lau leh kipak mahmah kawm in, han a kipan a pai mengmeng ua, a nungzuite hilh ding in a taita uhi.

9Huan ngai dih, Jesu’n amau a tuak a, “Chibai aw,” a chi hi. Huchi in, amau a khepek a len ua, a bia uhi. 10Jesu’n a kiang uah, “Lau kei unla, paita un, Galili gam a pai ding in ka unaute va hilh un; huai ah n’on mu ding uh” a chi chi in.

Hanvengte Thugen

11Huan a pailai un vengmi sepaih khenkhat khopi ah a va lut ua, thil omdan tengteng siampu liante kiang ah a va hilh uhi. 12Upate toh a kikhawm ua, a kihou zoh un, sepaihte kiang ah dangka tampi a pia uhi, 13“Zan a, ka ihmut kal un, a nungzuite a hongpai ua, amah a guta uh, chi unla, 14gamukpa’n huai a na zak leh amah leng i khem ding ua lunghimawh lou ding in i bawl na ke,” a chi uhi. 15Huchi in dangka a la ua, a hilh bang un a hihta ua; huchi in, tutan in huai thu Judate lak ah a genthang lai uhi.

Thounawn Jesu Leh Thupiak Gol

(Mk. 16.14-18; Lk. 24.36-49; Jn. 20.19-23; Nas. 1.6-8)

16Himahleh nungzui sawmlehkhatte Galili gam ah, Jesu’n tang a sehsak ah a hoh uhi, 17Amah a muh un a bia ua; khenkhat in a ginglah uhi. 18Huchi in, Jesu a kiang uah a hongpai a, amau a houpih a, “Lei leh van a thuneihna tengteng ka kiang a piak ahita. 19Huaiziak in, kuan unla, namchih apan nungzuite bawl unla, Pa, Tapa, leh Kha Siangthou min in baptist unla, 20Thu k’on piak tengteng zui ding in thuhilh un. Ngai un, kei tangtawn in, khovel tawppha in leng, na kiang uah ka om ding hi” a chi hi.

Currently Selected:

MATTHAI 28: PAITBSI

Highlight

Copy