MATTHAI 27
27
Pilat Maa Jesu Din Masakna
(Mk. 15.1; Lk. 23.1,2; Jn. 18.28-32)
1Huan zingsang a hong hih in siampu liante leh vantang upate tengteng Jesu that ding in a tungthu ah a kihou uhi. 2Amah a hen ua, a pi ua, gam ukpa Pilat kiang ah a pi uhi.
Judas Iskariot Sihna
(Nas. 1.18-19)
3Huan Judas a mansakpa’n Jesu siamlouh a tangsak uh chih a theih tak in a kisik a, dangka sawmthum siampu liante leh upate kiang ah a hontawi nawn hi. 4“Midik sisan ka khot thil ka hihkhial hi” a chi hi. Amau, “Huai kou a ding in bang a khawk dia? Nang na lohloh loh in” a chihsan uhi. 5Aman huai dangka Mun Siangthou ah a pailut a, paimang in a awklumta hi.
6Huan siampu liante’n huai dangka a la ua, “Hiai thohlawm bawm a koih a siangkei, sisan man ahi” a chi uhi. 7Huchi in a kihou ua, mikhualte vuina ding in belvelmi mun a leita uhi. 8Huaiziak in huai mun tutan in ‘Sisan mun’ a chi uhi.
9Huan zawlnei Jeremiah in a na gen, “Amah man ding a Israel tate lak a kuate hiam in a sak uh dangka sawmthum a lata uhi; 10Toupa’n honhilh bang in belvelmi mun man ding in a pia ua” chih a hong tangtungta hi.
Pilat Mai Ah Jesu Ding
(Mk. 15.2-5; Lk. 22.3-5; Jn. 18.33-38)
11Huan gamukpa ma ah Jesu a ding hi. Gamukpa’n, “Judate kumpipa na hi hia?” chi in, a dong hi. Jesu’n a kiang ah, “Hi e” a chi hi. 12Siampu liante leh upate’n a heklai un bangmah in a dawngkei hi.
13Huchi in, Pilat in a kiang ah, “A hon hekna zouzai uh na za ka hia?” a chi hi. 14Aman kamkhat lel in leng a dawng kei hi; huchi in gamukpa’n lamdang a sa mahmah hi.
Jesu Si Dia Thutanna
(Mk. 15.6-15; Lk. 23.13-25; Jn. 18.39—19.16)
15Huan gamukpa’n ankuangluini’n henta khat, a deihdeih uh, mipite ading in a pawtsak zel hi. 16Huailai in henta minthang, Barabba a chih uh a om hi. 17Huchi in, a hong kikhop un, Pilat in a kiang uah, “Kua zaw hon pawtsak leng na ut ua? Barabba hia, Jesu Khrist kichi?” a chi hi. 18Hazat ziak in amah a mansak uh chih a thei hi.
19Vaihawmna tutphah a a tutlai in, a zi in, “Hiai midik tung ah bangmah hih ken, tuni’n amah ziak in ka mang in thil tampi ka thuak hi” chi’n a thukhak hi.
20Huan siampu liante leh upate’n, Barabba nget a Jesu hih manthat ding in, mipite a thuzoh uhi. 21Gamukpa’n amau a houpih a, “Amau nihte a kua zaw hon pawtsak leng chi na hi ua?” a chi nawn hi.
22Amaute’n, “Barabba” a chi uhi. Pilat in a kiang uah, “Jesu Khrist kichi, bang ka chihta dia le?” a chi hi. Avek un, “Amah zaw Kros ah kilhden in om hen” a chi uhi.
23Aman, “Bang di’n maw? Bang a hihkhial a ahia?” a chi hi. Himahleh amau, “Kros ah kilhden in” chi in, a kikou vengvung uhi.
24Huchi in, Pilat in bangmah a hih theikei a, a hong buai deuhdeuh zaw ding chih a theih in, tui a la a, mipite ma ah a khut a sil a, “Hiai midik sisan ah ka siang e; noumau na lohloh un loh un” a chi hi.
25Huan mipi tengteng in, “A sisan zaw koumau tung ah leh ka tate uh tung ah om hen” chi in a dawng uhi.
26Huaikhit in Barabba a pawtsak a; Jesu a zep a, Kros a kilhden ding in a peta hi.
Sepaihte’n Jesu Sawisakna
(Mk. 15.16-20; Jn. 19.2-3)
27Huaikhit in, gamukpa’ sepaihte’n Jesu Inpi ah a pilut ua, a pawl ua mi tengteng a kiang ah a hong kikhawm uhi. 28A puante suahsak in, puan sandup a silhsak uhi. 29Linglukhu a phan ua, a khusak ua, a khut taklam in sialluang a tawisak ua; a ma ah a khukdin ua “Chibai, Judate kumpipa” chi in nuihza bawlna’n a nei uhi. 30Huan amah a chilsiat ua, sialluang laksak in, a lu a khen uhi. 31Nuihza bawlna dia a neihkhit un, puan a suahsak ua, amah puante a silhsak nawn ua, Kros a kilhden ding in a pita uhi.
Jesu Kilhdenna
(Mk. 15.21-32; Lk. 23.26-43; Jn. 19.17-27)
32Huan, a paikhiak lai un, Kurini khua a mi, a min Simon a mu ua; huai mi a Kros paw ding in a man uhi. 33Golgotha mun a hongtun un, huai tuh Luguh mun chihna ahi. 34Uain thuk, thilkha toh hel, dawn ding in a pia ua, himahleh a cheptak in a dawn nuam kei hi. 35Kros a a kilhden khit un, aisan in a puansilh a kihawm uhi. 36Huan huai ah a tu ua a vengta uhi. 37A hekna uh, “HIAI JUDATE KUMPIPA JESU AHI” chi a gelh, a lu tung ah a suang uhi. 38Amah toh, suamhat nih, a taklam ah khat a veilam ah khat a kilhden uhi.
39Huan mi vialvak peuh in a enghou ua, a lu uh sinkhum uhi, 40“Nang Pathian biakin hihsia a ni thum a lam nawnpa, kihihdam in; Pathian Tapa na hihleh Kros a kipan hong kumsuk tanla” chi in.
41Huchi mah bang in siampu liante’n, laigelhmite toh, enghou in, 42“Mi dangte hondampa, amah leh amah kihondam theilou pi in. Israelte kumpipa a hihngal leh tuin Kros a kipan hongkum leh a kei dia, huchi in amah i gingta mai ding. 43Pathian a muangna a ka, amah zaw a ut leh tuin hondam leh ake; Pathian Tapa ka hi, a chi ngal a” a chi uhi.
44Suamhat a kilhden un leng, huchi mah bang in a enghou hi.
Jesu Sihna
(Mk. 15.33-41; Lk. 23.44-49; Jn. 19.28-30)
45Huan dak gukna a kipan dak kua na tan in khua a hong mialvekta hi. 46Dak kuan a ding in, Jesu aw ngaihtak in, “Eloi, Eloi, lam a sabakthani?” chi in, a ki koukhia a, huai, “Ka Pathian, ka Pathian bangdia hon paisan?” chihna ahi.
47A kiang a ding khenkhatte’n huai a zak un, “Hiai mi’n Elijah sam ahi” a chi uhi. 48A lak ua mi khat kintak in a taipah a, spanji a la a, uain thuk ah a diahdim a, chiang ah a suang a, a dawnsak tou hi.
49Midangte’n, “Ngaihsak kei un, amah lakhe ding in Elijah a hong hiam i en ding” a chi uhi.
50Jesu ngaihtak in a kikou nawn a, a kha a khahta hi.
51Huan ngai dih, Pathian biakin puanzak a tunglam a kipan a nuailam tan in hong keksuakta a; zin a hongling a, suangpite khangkham in; hante a hong kihong hi. 52Misiangthou ihmusate sapum tampi leng kaihthoh in a omta uhi; 53Huaite a thohnawn nung in, han apat hongpawt in khaw siangthou ah a lut ua, mi tampi lak ah a kilakta uhi.
54Huan sepaih zaheutu leh a kiang a Jesu veng a omsamte’n, zinling leh thil omdante a muh un a lau mahmah ua, “Hiai mi Pathian Tapa ahi ngeingei” a chi uhi.
55Huai ah, numei tampi, a nna sepsak kawm zel a Galili gam a kipan a honzuite a om ua, gamlapi ah a en uhi. 56Huaite lak ah Mari Magdalini, Mari Jakob leh Joseph nu, Zebedai tapate nute a om uhi.
Jesu Vuina
(Mk. 15.42-47; Lk. 23.50-56; Jn. 19.38-42)
57Huan nitaklam a hong hih in, mihausa, a min Joseph Arimathai khua mi, a hongpai a, amah leng Jesu nungzui ahi sam hi. 58Huai mi Pilat kiang ah a vahoh a, Jesu luang a ngen hi. Pilat in piak ding in thu a pia hi. 59Huchi in Joseph in a luang a la a, puanmalngat siangtak in a tuam hi. 60A han thak, suang khuakkuak ah a sial hi; han kongkhak ah suang lianpi in a delh a, a paita hi. 61Huan huai ah Mari Magdalini leh Mari dang a om ua, han ma zawn ah a tu uhi.
Han Veng Ding a Thupiakna
62Huan a zing in huai tuh Kiginni zing ahi, siampu liante leh Pharisaite Pilat kiang ah a omkhawm kheukhou uhi. 63“Pu, huai mi khemhat in, a damlai in, ni thum nung in ka thounawn ding, a chih ka theigige uhi. 64Huchi in han ni thum ni tan a venghoih ding in thupia in; huchilou in zaw a nungzuite’n amah a va gukhe ding ua, vantang kiang ah, misi lak a kipan a thounawnta ahi, a chi kha ding uh; huchi in khemna nanung zaw amasa sang in a hoihkei zawsem ding” a chi uhi.
65Pilat in a kiang uah, “Vengmi sepaihte na nei ve ua oi; pai unla, na hihtheih bang un veng hoihsak ta unla” a chi hi.
66Huchi in vengmi sepaihte toh a vahoh ua, han a veng hoihsak ua, hansuang a chiamteh uhi.
Currently Selected:
MATTHAI 27: PAITBSI
Highlight
Share
Copy
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
