YouVersion Logo
Search Icon

MATTHAI 18

18
Kingaihniamna Hamphatna
(Mar 9.33-37; Luk 9.46-48)
1Huai laitak in Jesu kiang ah nungzuite ahong pai ua, “Van lalgam ah kua athupipen dia?” achi uhi. 2Huan ama'n naupang neuchik asam a; alak uah adingsak hi. 3“Chihtaktak in ka hon chi ahi, na lamdan ua, naupang neuchik bang na hong hih kei uleh, van-gam ah na lut kei hial ding uh. 4Huchi in kuapeuh hiai naupang neuchik bang a kingainiam, huai mi van-gam ah athupipen ding,” achi hi. 5Huan kuapeuh ka min ziak a hichibang naupang neuchik khat kipahpih keimah hon kipahpih ahi.
Midangte Hihpuk Mulkimhuai
(Mar 9.42-48; Luk 17.1-2)
6“Himahleh hiai hon gingta neuchikte lak a khat leng hihpuk, angawng ah buh gawizanna suang lianpi oksak in tuipi thuk lai ah khemang le uh, amah a ding in ahoihzaw ding hi. 7Puknate ziak in khovel tung agik hi, puknate bel om ding him ahi a; himahleh pukna omsakpa tung agik hi!
8“Huan na khut hiam na khe hiam in hon hihpukleh, tankhia inla, paimang in; khut nih leh khe nih nei a tangtawn mei a paih a na om sang in, piangsual hiam khebai hiam a hinna a lut nang ding in ahoihzaw hi. 9Huan na mit in hon hihpukleh khelkhia inla, paimang in; mit langnih nei a Gehenna mei a paih a om sang in, mit langkhat nei a hinna a lut nang a ding in ahoihzaw hi.
Belam Mang Gentehna
(Luk 15.3-7)
10“Hiai mineute lak a khat leng simmoh lou ding in pilvang un, a-angelte un van ah ka Pa van a om mel a-en gige uh chih ka hon hilh ahi. 11Mihing Tapa mangthangte zong ding a hong pai ahi him hi.
12“Bangchi na sa ua? Mi kuapeuh in belam za nei henla, alak ua khat vakmang taleh sawmkua-le-kuate nusia in, tang a pai in, amang pen azong kei dia hia? 13Chihtaktak in ka hon hilh ahi, amuh nawn zenzenleh sawmkua-le-kua vakmangloute tung ah sang in, tua belam tung ah akipak zaw ding hi. 14Huchi mah bang in hiai mineute lak a khat manthat na Pa uh van a om deihlam ahi kei hi.
Unau Thil Hihkhial Thuhilhna
15“Huan na unau in na tung a thil ahihkhelhleh pai inla, amah leh nang kia theih in akhelhna hilh in; ahon ngaihkhiakleh na unau zou na hi ding. 16Ahon ngaihkhiak keileh midang khat hiam nih hiam na kiang ah na pi dia, huchi in thu chiteng theihpihmi nih hiam thum hiam kam a hihkip a a-omtheihna ding in. 17Huan amau leng angaihkhiak nop kei laileh, saptuamte kiang ah tun in. Huan saptuamte leng angaihkhiak nop keileh amah tuh nang ding in Zentel leh siahkhonmi bang hi hen.
18“Chihtaktak in ka hon hilh ahi, leitung ah bangpeuh na hen uh, van ah hen ahi ding. Huan leitung a na phel uh, van ah leng phel ahi ding hi.
Tup Kibang A Thumna Gah
19“Chihtaktak in ka hon hilh nawn hi. Leitung ah na lak ua mi nih athilnget ua akithutuah uleh, ka Pa van a om hihsak in a-om ding uh. 20Mi nih hiam thum hiam ka min a akikhopna peuh uah alak uah ka om zel hi,” achi hi.
Ngaihdamdan Ding
21Huai lai in Peter ahong pai a, “Toupa, ka unau in bangzah vei ahia ka tung ah hihkhialleh ka ngaihdam ding? Sagihvei tan in ahi diam?” achi hi. 22Jesu'n akiang ah, “Sagihvei tan ka hon chi kei a, sagihvei mun sawmsagih tan,” ka hon chi zaw ahi.
Ngaidam Nuam Lou Sikha Gentehna
23“Huaiziak in van-gam tuh kuahiam asikhate kiang a asum thu saifel tum toh tehpih ahi. 24Huchi a sum thu hon sai pattak in, mi khat talent singkhat ba akiang ah ahon pi uhi. 25Huan piak ding aneih louh ziak in, apu in amah toh, azi toh, atate toh, aneih tengteng toh zuak a dit ding thu apia hi. 26Huchi in sikha in Toupa, ‘ka tung ah zahngai tadih inla, avek in ka hon pe ding, chi in bokkhup in abia hi.’ 27Huai sikhapa pu'n ahehpih mahmah a, akhah a, abat angaidamta hi.
28“Himahleh huai sikha apaikhia a, asikha hihpihte lak a khat amakhai zakhat ba ava mu a; amah aman a, na bat hon pia in, chi in agawlmek hi. 29Huchi in asikha hihpihpa'n bokkhup in, ka tung ah zahngai tadih inla, ka hon pe ding, chi in angen ngutngut hi. 30Himahleh a-ut kei a; abat apiak zoh masiah suangkul ah akhumta hi. 31Huchi in asikha hihpihte'n athilhih amuh un, poi asa mahmah ua, athilhih tengteng atoupa uh ahilhta uhi. 32Huaitak in atoupa'n amah asam a, akiang ah, sikha gilou, na hon nget ngutngut ziak a, na bat tengteng hon ngaidam ing a; 33k'on hehpih bang in nang leng na sikha hihpih na hehpih sam ding hilou hia? achi hi. 34Huchi in atoupa athangpaita a, abat tengteng apiak zoh masiah migawtte kiang ah apeta hi. 35Michih in na lungtangtak ua na unaute uh na ngaihdam kei uleh ka Pa van a om in leng huchi mah bang in na tung uah ahih sam ding,” achi hi.

Currently Selected:

MATTHAI 18: PAITBSI

Highlight

Share

Copy

None

Want to have your highlights saved across all your devices? Sign up or sign in