MATTHAI 18

Kingaihniamna Hamphatna

(Mk. 9.33-37; Lk. 9.46-48)

1Huailai tak in nungzuite Jesu kiang ah a hongpai ua, “Van gam ah kua a thupipen dia?” a chi uhi. 2Huan aman naupang neuchik a sam a; a lak uah a dingsak hi. 3“Chihtaktak in k’on chi ahi, na lamdan ua, naupang neuchik bang n’ong hih kei uleh, van gam ah na lut kei hial ding uh. 4Huchi in kuapeuh hiai naupang neuchik bang a kingainiam, huai mi van gam ah a thupipen ding a chi hi. 5Huan kuapeuh ka min ziak a hichibang naupang neuchik khat kipahpih keimah hon kipahpih ahi.

Midangte Hihpuk Mulkimhuai

(Mk. 9.42-48; Lk. 17.1-2)

6“Himahleh hiai hon gingta neuchikte lak a khat leng hihpuk, a ngawng ah buhgawizanna suang lianpi oksak in tuipi thuklai ah khemang le uh amah ading in a hoihzaw ding hi. 7Puknate ziak in khovel tung a gik hi; puknate bel om ding him ahi a; himahleh pukna omsakpa tung a gik hi.

8“Huan na khut hiam, na khe hiam, in hon hihpuk leh, tankhia inla, paimang in; khut nih leh khe nih nei a tangtawn mei a paih a om sang in, piangsual hiam khebai hiam a hinna a lut nang ding in a hoihzaw hi. 9Huan na mit in a hon hihpuk leh khelkhia inla, paimang in; mit lang nih nei a Gehenna mei a paih a omsang in, mit langkhat nei a hinna a lut nang ading in a hoihzaw hi.

Belam Mang Gentehna

(Lk. 15.3-7)

10“Hiai mineute lak a khat leng simmohlou ding in pilvang un, a angelte un van ah ka Pa van a om mel a en gige uh chih k’on hilh ahi. 11Mihing Tapa mangthangte zong ding a hongpai ahi him ahi.

12Bangchi na sa ua? Mi kuapeuh in belam za nei henla, a lak ua khat vakmangta leh sawmkua leh kuate nusia in, tang a pai in, a mang pen a zong kei dia hia? 13Chihtaktak in k’on hilh ahi, a muhnawn zenzen leh sawmkua leh kua vakmangloute tung ah sang in, tua belam tung ah a kipak zaw ding hi. 14Huchi mah bang in hiai mineute lak a khat manthat na Pa uh van a om deihlam a hi kei hi.

Unau Thil hihkhial Thuhilhna

15“Huan na unau in na tung ah thil a hihkhelh leh pai inla, amah leh nang kia theih in a khelhna hilh in; a hon ngaihkhiak leh na unau na zou ahi ding. 16A hon ngaihkhiak kei leh midang khat hiam nih hiam na kiang ah na pi dia, huchi in thu chiteng theihpih mi nih hiam thum hiam kam a hihkip a a om theihna ding in. 17Huan amau leng a ngaihkhiak nopkei lai leh, saptuamte kiang ah tun in. Huan saptuamte leng a ngaihkhiak nopkei leh, amah tuh nang ding in Jentel leh siahkhawnmi bang hi hen.

18Chihtaktak in k’on hilh ahi, leitung ah bangpeuh na hen uh, van ah hen ahi ding. Huan leitung a na phel uh, van ah leng phel ahi ding hi.

Tup Kibang A Thumna Gah

19Chihtaktak in k’on hilhnawn hi. Leitung ah na lak ua mi nih a thil nget ua a kithutuah uleh, ka Pa van a om hihsak in a om ding uh. 20Mi nih hiam thum hiam ka min a a kikhopna peuh uah a lak uah ka om zel hi” a chi hi.

Ngaihdam Ding Dan

21Huailai in Peter a hongpai a, “Toupa, ka unau in bangzah vei ahia ka tung ah hihkhial leh ka ngaihdam ding? Sagihvei tan in ahi diam?” a chi hi. 22Jesu’n a kiang ah, Sagihvei tan k’on chikei a, “Sagihvei mun sawmsagih tan,” k’on chi zaw ahi.

Ngaidam Nuamlou Sikha Gentehna

23“Huaiziak in, van gam kumpipa kuahiam a sikhate kiang a a sumthu saifel tum toh tehpih ahi. 24Huchi a sumthu honsai pattak in, mi khat talent sing khat ba a kiang ah a honpi uhi. 25Huan piak ding a neihlouh ziak in, a pu in amah toh, a zi toh, a tate toh, a neih tengteng toh zuak a dit ding thu a pia hi. 26Huchi in, sikha in Toupa, ‘ka tung ah zahngai tadih inla, avek in k’on pe ding, chi in khupboh in a bia hi.’ 27Huai sikhapa pu’n a hehpihta mahmah a, a khah a, a bat a ngaidamta hi.

28Himahleh huai sikha a paikhia a, a sikha hihpihte lak a khat a makhai za khat ba a va mu a; amah a man a, na bat honpia in, chi in a gawlmek hi. 29Huchi in a sikha hihpihpa’n khupboh in, ka tung ah zahngai tadih inla, k’on pe ding, chi in a ngen ngutngut hi. 30Himahleh a utkei a; a bat a piak zoh masiah suangkulh ah a khumta hi. 31Huchi in, a sikha hihpihte’n a thilhih a muh un, poi a sa mahmah ua, a thilhih tengteng a Toupa uh a hilhta uhi. 32Huaitak in a toupa’n amah a sam a, a kiang ah, sikha gilou, n’on nget ngutngut ziak a, n’on bat tengteng hon ngaidam ing a: 33K’on hehpih bang in nang leng na sikha hihpih na hehpih sam ding hilou hia? a chi hi. 34Huchi in a Toupa a thangpaita a, a bat tengteng a piak zoh masiah migawtte kiang ah a peta hi. 35Michih in na lungtang tak ua na unaute uh na ngaihdam kei uleh ka Pa van a om in leng huchi mah bang in na tung uah a hih sam ding” a chi hi.

Currently Selected:

MATTHAI 18: PAITBSI

Highlight

Copy