MATTHAI 17

Mellamdanna

(Mk. 9.2-13; Lk. 9.28-36)

1Huan ni guk nung in Peter, Jakob, leh a unau Johan a tuam in Jesu’n tang sangtak ah a paitouh pih hi. 2Huan a ma uah a mel omdan a hong lamdangta a; a mai ni bang in a hong tang a, a puansilh te vuk bang in a hong ngouta hi. 3Huan ngai dih, Mosi leh Elijah, amah kihoupih in a kiang uah a kilak uhi. 4Huan Peter in Jesu a houpih a, “Toupa, ei din hiai a om a hoih, na ut leh hiai ah aidakbuk thum ka bawl ding a; nang ading in khat, Mosi ding in khat, Elijah ding in khat” a chi hi;

5A genlai tak in, Ngai dih, mei ngoutak in amau a hon liahta a; ngai dih, mei a kipan aw in, “Hiai ka Tapa deihtak, ka kipahna mahmah ahi: amah thu ngai un” a chi hi.

6Huan nungzuite’n huai a zak un khupboh in a puk ua, a lau mahmah uhi. 7Jesu’n amau a hong khoih a, “Thou unla, lau kei un” a chi hi. 8Huan a dak khia ua, Jesu kia loungal kuamah a muta kei uhi.

9Huan tang a kipan a kumlai un, Jesu’n a kiang uah, “Mihing Tapa misi lak a kipan a thohnawn masiah na thilmuh uh kuamah hilhkei un” chi in thu a pia hi. 10Huan a nungzuite’n a kiang ah, “Laigelhmite’n, Elijah hongpai masa ding ahi, bangchidan a chi ahi ua?” chi in a dong uhi.

11Aman, “Elijah a hongpai ding him ahi, bangkim a siam hoih ding hi 12Himahleh k’on hilh ahi, Elijah zaw a hong paikhinta, amah a theikei ua, a tung ah a utut un a hihzawta uhi. Huchi mah bang in Mihing Tapa in leng a lak uah a thuaksam ding” a chi a, a dawng hi.

13Huaitak in, nungzuite’n, Baptispa Johan thu a kiang uah a gen ahi chih a hon theita uhi.

Pasal Naupang Dawimat Hihdamna

(Mk. 9.14-29; Lk. 9.37-43)

14Huan mipi kiang a hongtun un, mi khat a kiang ah a hongpai a, a ma a khukdin in, 15“Toupa ka tapa tung ah zahngai in, kaihvei ahi, a nak thuak telmai; tamveipi mei ah a puklut a, tamveipi tui ah leng a puknak hi. 16Na nungzuite kiang ah konpi a, a hihdam theikei uh” a chi hi. 17Jesu’n, “Ginna neilou leh khang genhakte aw, bang tan ahia k’on thuakzoh ding, amah ka kiang ah honpi un” chi in a dawng hi. 18Huan Jesu’n dawi a tai a, asung a kipan a pawt a; huai dak in naupang a damta hi.

19Huai zoh in, nungzuite a tuam in, Jesu kiang ah a hongpai ua, “Bang a chia kou delhkhe theilou ka hi ua?” a chi uhi.

20Aman a kiang uah, “Na gintak louh ziak un ahi. Chihtaktak in k’on hilh ahi, ankam tang khat bang ginna na neih uleh, hiai tang kiang ah, Hiai a kipan huai a pam ah va kisuan in, na chi ding ua, a kisuan mai ding; nou ding in hihtheih louh bangmah a omkei ding” a chi hi. 21Akoi abang hileh, hichibang zaw thumna leh anngawlna loungal in a paikhe kei ding hi.

Jesu’n A Sihna Ding Genkhol Nawn

(Mk. 9.30-32; Lk. 9.43-45)

22Galili gam a a omlai un, Jesu’n a kiang uah, “Mihing Tapa zaw mihingte khut a matsak in a om ding; a that ding ua: 23Ni thum ni’n kaihthoh in a om ding hi” a chi a, huchi in a lungkham mahmah uhi.

Tempul Siah Piakna

24Kapernaum khua a hongtun un, Pathian biakin sumkhonte Peter kiang ah a hongpai ua, “Na pu un biakin sum pe zel lou hia? a chi uhi, 25Aman, “Pezel e” a chi hi. Huan insung a a valut in, Jesu’n a kiang ah, “Simon, bangchi’n na ngai a? Lei a Kumpipate’n siah leh leiman sumte kua apan ahia a lak zel uh? A tate ua pan hia, mituam apan? chi in, a na gen tuh hi. 26Peter in, “Mituam apan” a chihtak in, Jesu’n a kiang ah, “Huchi ahihleh tate awl uh ahi vaw oi. 27Himahleh nang dil ah vahoh inla, ngakuai diah inla, nga a hongsuak masapen man in, a kam kek lechin dangka nih na mu ding; huaite la inla kei leh nang ading in a kiang uah pia in, huchilou in zaw amaute i hih lungkim kei kha ding,” a chi hi.

Currently Selected:

MATTHAI 17: PAITBSI

Highlight

Copy