MATTHAI 16

Chiamtehna Ngetna

(Mk. 8.11-13; Lk. 12.54-56)

1Huaizoh in Pharisaite leh Saddukaite a hongpai ua, amah ze-etna ding in van a kipan chiamtehna amaute ensak ding in a ngen uhi. 2Aman a kiang uah, “Nitaklam a hong hih in, khua a pha dia ading meisan a suak, na chinak uhi. 3Huan zingsang in, tuni’n khua se dia ading e, meisan a suak a, a niamkai, na chinak uh. ‘Van omdan na theisiam ngal ua, himahleh, hun chiamtehnate na theisiam theikei uhi.’ 4Khang gilou leh angkawmte’n chiamtehna a zong ua, himahleh, Jonah chiamtehna loungal a kiang uah chiamtehna piak a hi kei ding” chi in, a dawng hi. Huan amaute paisan in a pawtkheta hi.

Pharisaite Leh Sadukaite Silngou

(Mk. 8.14-21)

5Huan nungzuite galkhat lam a tun un tanghou a paw mangngilh ua, 6Jesu’n a kiang uah, “Pharisaite leh Saddukaite silngou lak ah kiveng unla, pilvang un” a chi hi.

7Amau, “Tanghou i puaklouh ziak uh eive” chi’n a kingaihtuah uhi.

8Jesu’n huai a thei a, “Ginglahte aw, bang a chia tanghou na neihlouh ziak ua kingaihtuah na hi ua? 9Tu nangawn in na lungsim un na thei naikei lailai umaw? Mi sang nga nek tanghou phel nga leh, a khamval uh bawmpi bangzah na dimsak zah uh na theigige kei ua hia? 10Mi sang li nek tanghou phel sagih leh, a khamval uh bawmpi bangzah hiam na luahdim uh chih theilou maw? 11Tanghou thu na kiang ua genlou in, Pharisaite leh Saddukaite silngou apan pilvang un, chih gen ka hizaw chih bang a chia theilou na hi ua?” a chi hi.

12Huaitak in tanghou silngou lak a pilvang ding in a sawlkei a, Pharisaite leh Saddukaite thuhilhna apan pilvang ding in amau a sawlzaw chih a theita uhi.

Peter In Jesu Hihna Phuankhiakna

(Mk. 8.27-30; Lk. 9.18-21)

13Kaisaria uk a Philippi mun a hongtun in Jesu’n a nungzuite kiang ah, “Mite’n Mihing Tapa kua ahi a chi ua?” chi in, a dong hi,

14Amau, “khenkhat in, Baptispa Johan ahi, a chi ua; khenkhat in, Elijah ahi, a chi ua; khenkhat in, Jeremiah hiam zawlnei kuahiam ahi” a chi uh, a chi uhi:

15Aman a kiang uah, “Ahihleh, nou kua ka hi n’on chi ua?” a chi hi.

16Simon Peter in, “Khrist Pathian Hing Tapa na hi” chi in a dawng hi.

17Jesu’n a kiang ah, “Simon, Bar Jonah, hampha chia; sa leh sisan in a hon theihsak na hi kei a, ka Pa van a om hon theihsak na hizaw hi. 18K’on hilh ahi, nang Peter na hi, hiai suangpi tung ah ka saptuam ka lamtou ding a, misi khaw kulh kongkhakte’n hiai a zoukei ding uh. 19Van gam tahbite k’on pe ding a, leitung ah bangpeuh na hen van ah leng hen ahi ding a, leitung ah bangpeuh na phel van ah leng phel ahi ding” a chi hi.

20Huaizoh in Khrist ahi chih kuamah hilhlou ding in nungzuite a chi bikbek hi.

Jesu’n A Sihna Leh Thohnawnna Ding Genkhol

(Mk. 8.31—9.1; Lk. 9.22-27)

21Huai nung in Jerusalem a a pai ding dan, upate, siampu liante, laigelhmite apan thil tampi a thuak ding dan leh hihlup a a om ding dan, ni thum ni a kaihthoh a a om ding dan Jesu’n a nungzuite a theisak panta hi.

22Huai phet in Peter in amah a pituam a; “Toupa, hi kei hen! Huaite na tung ah tung ngeikei hen!” chi in, a taihilh hi.

23Jesu a kihei a, Peter kiang ah, “Setan, ka nung ah pai in; kei a di’n pukna na hi; Pathian thilte ngaihtuahlou in mihing thilte na ngaihtuah zaw hi” a chi hi.

Nungzuihna Man Piakna

(Matt. 10.34-37; Mk. 8.34-38; Lk. 9.22-27)

24Jesu’n a nungzuite kiang ah, “Kuapeuh in a hon zuihnop leh amah ki mangngilh in, a Kros pua in honzui hen. 25Kuapeuh a hinna humbit ut in a tan ding a; kuapeuh keimah ziak a a hinna tan in a humbit ding hi. 26Min khovel a pum in nei henla, a hinna tan leh amah ading in bang a phatuam dia? Ahihkeileh min a hinna sik in bang a pethei dia?

27“Mihing Tapa a angelte toh, a Pa thupina a kizem a a hongpai ding ziak in. Huai hun chiang in michih a nasep bang un a dinchiat ding hi. 28Chihtaktak in k’on chi hi, hiai a ding akhente, Mihing Tapa a gam a hongpai a muh masiah uh, sihna chiamlou hial ding a om uh” a chi hi.

Currently Selected:

MATTHAI 16: PAITBSI

Highlight

Copy