MATTHAI 13

Buhchithehpa Gentehna Thu

(Mar 4.1-9; Luk 8.4-8)

1Huai ni'n inn a kipan Jesu apaikhia a, tuipi gei ah atu hi. 2Huan akiang ah mipi tampitak ahong kikhawm ua, huchi in long ah atuang a, atu a, mipi tengteng piautak ah adingh uhi. 3Gentehna in thu tampi akiang uah agen hi, “Ngai dih ua, buhchithehpa buhchi theh in akuan hi. 4Buhchi atheh lai in akhen lamsik ah akia a, vasate'n ane zou uhi. 5Akhen suangsilei lak ah akia a, lei asah louh ziak in hong pou pah hi. 6Himahleh ni asuah in haivuai in a-om a; zung aneih louh ziak in avuai maimah hi. 7Huan akhen loulingnei lak ah akia a, loupa hong pousang a; adepmangta hi. 8Akhen lei hoih ah akia a, khenkhat aleh za, khenkhat aleh sawmguk, khenkhatte aleh sawmthum in hong gah uhi. 9Kuapeuh bil nei in, za hen!” achi hi.

Gentehna Kizatna

(Mar 4.10-12; Luk 8.9,10)

10Huan nungzuite ahong pai ua, akiang ah, “Bangziak a gentehna a thu gen na hia?” achi uhi.

11Ama'n adawng a akiang uah, “Van lalgam thuguk noute theih phal ahi a, amau theih zaw phal ahi kei hi. 12Kuapeuh anei piak behlap ahi ding a, ahau ding; kuapeuh anei lou aneihsun nangawn laksak ahi ding hi. 13Huchi ahih ziak in akiang uah gentehna in thu ka gen ahi; ‘mu napi in amu kei nak ua, za napi in atheisiam kei nak uh.’ 14Isai thugenkholh atung uah atung hi;

‘Bil in zaw na za ding ua,

theih bel na theisiam kei ding uh;

muh zaw na mu ding ua,

theih bel na thei kei ding uh.

15Hiai chite lungtang ananggawpta, abilte uh angong a,

amitsi ua, huchi lou in zaw amit un amu ding ua,

abil un aza kha ding ua,

alungtang un atheisiam ding ua, ahong kik nawn kha ding ua,

amau ka na hihdam kha ding,’ ana chi hi.

16“Nou mitte zaw ahampha hi, amuh ziak in; na bil uh leng ahampha hi, azak ziak in. 17Chihtaktak in ka hon hilh ahi, zawlnei tampi leh midiktat tampi'n leng na thil muhte uh muh a-ut ua, himahleh amu kei uh; na thilzakte uh zak a-ut ua, himahleh aza kei uhi.

Buhchithehpa Gentehna Hilhchetna

(Mar 4.13-20; Luk 8.11-15)

18“Huaiziak in buhchithehpa gentehna thu za un. 19Kuapeuh in lalgam thu bil a azak a, atheihsiam keileh migilou hong pai in, alungtang a thehsa alaksak nak hi. Huai tuh lamsik a theh ahi. 20Suangsilei a theh bel, thu za a kipaktak a pom bang ahi. 21Himahleh amah ah zung a-om kei a, sawt louchik kia a-om a, thu ziak a gimthuakna leh sawina ahong omtak in apuk pah hi. 22Huan loulingnei lak a thehte tuh thu za a, himahleh khovel awlmohna leh hauhsakna khemna in thu adep a, gah lou in ahong om hi. 23Huan lei hoih tung a theh tuh thu bil a za a, theisiam ahi; huai tuh agah ngei a, khenkhat aleh za, khenkhat aleh sawmguk, khenkhat aleh sawmthum in apung,” achi hi.

Buhlem Gentehna

24Akiang uah gentehna dang agen nawn a, “Van lalgam tuh mi alou a chi hoih thehpa toh teh ahi. 25Himahleh mi a-ihmut kal in melma ahong pai a, buhlak ah buhlem atheh a, apaimang nawnta hi. 26Huan buh hong pou a, ahong vuih in, buhlem leng ahong kilang sam hi. 27Huchi in inn neipa sikhate ahong pai ua, akiang ah, Pu, na lou a chi hoih theh lou na hi maw? Buhlemte koi a kipan a hong om ahia? achi uhi. 28Ama'n akiang uah, melma in na theh ahi ve,” achi hi. Sikhate'n akiang ah ahihleh huaite va lakhawm le ung hoih na sa hia? achi uhi. 29Ama'n bel, “sa lou e, buhlem na lakkhawmna lam uah buhtak na botkhawm kha ding uh. 30Buh lak dong in poukhawm uheh; buhlak hun chiang in buh atte kiang ah, buhlem lakhawm masa phot unla, hal ding in lomgak un; buhtak pen bel ka buh inn ah seklut un, ka chi ding,” achi hi.

Ankam Chi Gentehna

(Mar 4.30-32; Luk 13.18-19)

31Akiang uah gentehna dang agen nawn a, “Van lalgam tuh mi'n ankam chi tang khat alak a, alou a atheh bang ahi. 32Huai chi laklak ah aneupen a; himahleh ahong pousang chiang in loupa lak ah alianpen a, sing hong hi a, huchi in tungleng vasate ahong pai ua, ahiang ah agiak uh,” achi hi.

Silngou Gentehna

(Luk 13.20-21)

33Akiang uah gentehna dang agen nawn a, “Van lalgam tuh numei in silngou anbuang tehna thum lak a abilh a, avek a athoh mateng aphum bang ahi,” achi hi.

Gentehna Zatna Ziak

(Mar 4.33-34)

34Jesu'n mipite kiang ah gentehna in huai tengteng agen a, gentehna lou in akiang uah bangmah agen kei hi. 35Zawlnei in,

“Gentehna in ka kam ka ka ding a,

leilung pian tung a kipat thil kisel ka genkhe ding,” chi a agen ahong tuntheihna ding in.

Buhlem Gentehna Hilhchetna

36Huai lai in mipite apaisan a, inn ah alut a, nungzuite akiang ah ahong pai ua, “Lou a buhlem gentehna thu hon hilhchian in,” achi uhi 37Ama'n adawng a, “Chi hoih thehpa Mihing Tapa ahi a; lou bel khovel ahi. 38Chi hoihte gam tate ahi ua; buhlemte migilou tate ahi. 39Melma buhlem thehpa diabol ahi a, buhlak hun khovel tawpna ding ahi; a-atte angelte ahi uhi. 40Huchi in buhlemte alakhawm ua mei a ahal bang un khovel tawpna ah a-om ding hi. 41Mihing Tapa in angelte asawlkhe ding a, gam a kipan hihkhialsakte leh thil hihkhialte tengteng akhawmkhe ding uh. 42Amaute haltuina mei ah apai ding ua, huai lai ah kah leh hagawi a-om ding hi. 43Huai hun chiang in midiktatte a Pa uh gam ah ni bang in atang ding uhi. Zakna ding a bil nei peuh in za hen!

Gou Phumguk Gentehna

44“Van lalgam tuh lou a gou phumguk bang ahi; mi'n huai mu in, asel nawn a, akipah ziak in aneih tengteng azuak a, huai lou aleita hi.

Tuikepsuang Gentehna

45“Huan van-gam tuh sumsinmi tuikepsuang hoihtak zongmi bang ahi nawn hi. 46Huan ama'n tuikepsuang manphatak khat amu a, aneih tengteng zuak in aleita hi.

Lenpi Phumguk Gentehna

47“Van lalgam tuh lenpi, tuipi a paih, chi chih tunkhawmna bang ahi nawn hi. 48Adimtak in agei ah akaikhia ua, atu ua, bawm ah ahoih teng alakhawm ua, ahoihloute apaih uh bang ahi. 49Khovel tawp hun chiang in huchibang mah in a-om ding, angelte ahong pawt ding ua, midiktatte lak ah migiloute akhenkhe ding uh. 50Huchi in haltuina mei ah apai ding ua, huai ah kah leh hagawi a-om ding,” achi hi.

Thil Lui Leh Thil Thak

51Jesu mah in akiang uah, “Huai tengteng na theisiam uhia?” achi a, amau akiang ah, “Thei e,” achi uhi.

52Huan ama'n akiang uah, “Huaiziak in laigelhmi van-gam thuhilh a om peuhmah, inn neipa, agoubawm a kipan a thil thakte leh thil luite pholhkhepa bang ahi,” achi hi.

Nazaret Jesu Adeih Kei Uh

(Mar 6.1-6; Luk 4.16-30)

53Huan hichi ahong hi a, Jesu'n huai gentehnate agen khit in huai a kipan apaita hi. 54A-omna kholam atung a, asinagogte uah amaute thu ahilh a, huchi in lamdang asa mahmah ua, “Hiai mi'n koi a kipan a hiai bang pilna leh hiai nasep thupi hihtheihnate amuh ahia? 55Hiai mi singlem bawlpa tapa hilou hia? Anu Mari kichi hilou hia? A-unaute Jakob, Joseph, Simon, Judas kichite hilou uhia? 56Hiai mi in koi a kipan a hiaite tengteng mu ahia? Asanggamnute leng i kiang ua om vek hilou uhia?” achi uhi. 57Huchi in atung ah alungkim kei uhi. Himahleh Jesu'n akiang uah, “Zawlnei ama kholam leh ama inn lam lou ngal ah pahtawi louh in a-om ngei kei,” achi hi. 58Agin louh ziak un huai ah nasep thupi dang tam ahih kei hi.

Currently Selected:

MATTHAI 13: PAITBSI

Highlight

Copy