MATTHAI 12

Khawlni Thu A Dotna

(Mk. 2.23-28; Lk. 6.1-5)

1Huchihlai in, Jesu khawlni’n buhlei kantan in a pai hi; nungzuite a gilkial ua, buhvuite khiak in, a neta uhi. 2Pharisaite’n huai a muh un, a kiang ah, “En dih, na nungzuite’n khawlni’n hihsianglou a hih uh” a chi uhi.

3Jesu’n a kiang uah, “David in a gilkial lai a a lawmte toh a thilhih uh na simkei ua hia? 4Huchi a Pathian inn a a lut a, amah leh a lawmte’n nek sianglouh, siampute kia neksiang tanghou koihtuam a nek thu uh? 5Ahihkeileh khawlni’n Pathian biakin a siampu omte’n khawlni a bohsiat un leng siamtang in a om uh chih danthu na simkei ua hia? 6Huchi a hih ngal leh, Pathian biakin sang a thupizaw hiai ah a om chih k’on hilh ahi. 7Himahleh ‘kithoihna deihlou in, zahngaihna ka deih’ chih a omdan na thei hile uchin, mi siamtangte siamlouh tangsaklou ding hive uchin. 8Mihing Tapa zaw khawlni Toupa ahi,” a chi hi.

Khutzaw Hihdamna

(Mk. 3.1-6; Lk. 6.6-11)

9Huan huai a kipan a pai a, a kikhopnain uah a valut hi. 10Ngai dih, mi khat khutzaw a na om a, amah a hektheihna ding un, “Khawlni a hihdam a siang hia?” chi’n Jesu a dong uhi.

11Aman a kiang uah, “Noute lak ah kuapeuh in belam khat nei unla, khawlni’n kawkhuk ah keta leh kua ahia len a kaikhelou ding? 12Belam khat sang in mihing khat bangchilel a manpha zaw ahia? Huaiziak in khawlni’n hihhoih a siang hi” a chi hi. 13Huaizoh in, huai mi kiang ah, “Na khut zan in” a chi hi, huchi in a zan a, a langkhat bang in a damsiangta hi. 14Pharisaite bel a pawt ua, amah a hihlup theihna dan ding uh ngaihtuah in a kihou uhi.

Pathian Sikha Tel

15Jesu’n huai thu a theih in huai mun a kipan in a kihemmang hi. Himahleh mitampi in amah a zui ua, a damloute a na hihdam vek hi. 16A tanchin genthang hetlou ding in a kiang uah a chi hi. 17Huai zawlnei Isai thugenkholh a tangtunna ding ahizaw hi:

18“En dih, ka sikha ka tel,

ka deihtak, ka lungsim in a pahtak mahmah,

a tung ah ka Kha ka koih dia, huchi in,

Jentelte kiang ah dik a vaihawmna a ensak ding hi;

19A selkei ding a, a kikou sam kei ding a,

kongzing ah kuamah in a aw a za sam kei ding uhi.

20Dik a vaihawmna a vualzohsak mateng sialluang kigawpsa a hihtan khekei ding a,

meivak kuang liakliak a hihmit sam kei ding hi.

21Amah min ah Jentelte’n lametna a ngah ding uh” a chi hi.

Setan Panpihna Hilou Pathian Nasep

(Mk. 3.20-30; Lk. 11.14-23)

22Huchihlai in dawimat mittaw pautheilou khat a kiang ah a honpi ua; aman a hihdam a, pautheilou hongpau in, a hon muthei ta hi. 23Huchi in mipi tengteng in lamdang a sa mahmah ua, “Hiai mipa, David Tapa hilou ahi maw?” a chi uhi. 24Himahleh Pharisaite’n huai a zakphet un, “Hiai mi’n dawite kumpipa, Beelzibul ziaklou in dawite a delhkhe kei ding” a chi uhi. 25Jesu’n amaute ngaihtuahte a thei a, a kiang uah, “Koi gam leng amah kidou a mangthang nak; koi khua hiam, inkuan khat leng amah kidou, a khosuak kei ding hi. 26Setan in Setan mah a delhkhiak in amah leh amah kidou hi ding hi a; a gam bangchi’n ading dia le? 27Huan kei Beelzibul ziak a dawite delhkhia ka hihleh, na tate un kua ziak in ahia leh a delhkhiak uh? Huaiziak in, amaute noute tung a thukhenmite ahi ding uhi. 28Himahleh, ken Pathian Kha ziak a dawite delhkhia ka na hihleh, Pathian gam na kiang uah hongtungta ahi ding hi.

29Huchi ahihkei ngal in, min mi hat a gak masak phot kei leh bangchi’n ahia mi hat inn a lut a, a sum a laksak theih ding? Huai nung in a inn a lok mai ding hi.

30Kuapeuh kei lam a panglou, hondou ahi; kuapeuh hon lakkhawm pihlou in a thehzak ahi. 31Huaiziak in k’on hilh ahi, mi a khelhna chiteng uah leh Pathian a gensiatna chiteng uh ngaihdam a hi ding ua: Kha hilhial a gensiatna ngaihdamsak ahi kei ding hi. 32Kuapeuh Mihing Tapa kalh, a kalhna uh ngaihdamsak ahi ding: kuapeuh Kha Siangthou hilhial kalh zaw huai a kalhna uh, tu damsung leh hun hongtung ding ah leng, ngaihdam a hi kei ding” a chi hi.

Sing Leh A Gah

(Lk. 6.43-45)

33“Sing hoih a gah leng a hoih na chih kei ngal uleh, sing sia a gah leng a sia, chi vanglak un: sing a gah a a kitheih ziak in. 34Gul suante aw, nou gilou napi in bangchi’n ahia thuhoih na gen theih ding uh? Lungtang a dimval kam in a genzel hi. 35Mi hoih in a goubawm hoih a kipan thil hoihte a hon lakhia a, migilou in a goubawm hoihlou a kipan thil hoihlou a hon lakhe zel hi.

36Huan k’on hilh ahi. Mite’n thuginalou a gen peuhmah uh huai thu tanchin mah vaihawm nichiang in a gen ding uhi. 37Na thu in siam a hon tangsak dia, na thu mah in siamlouh a hon tangsak ding hi” a chi hi.

Chiamtehna Ngetna

(Mk. 8.11-12; Lk. 11.29-32)

38Huailai in laigelhmite leh Pharisaite lak a mi kuate hiam in amah a houpih ua a kiang ah, “Heutupa, nang a kipan chiamtehna muh ka ut uh” a chi uhi. 39Aman a kiang uah, “Khang gilou leh angkawmte’n chiamtehna a zong ua, himahleh zawlnei Jonah chiamtehna loungal a kiang uah chiamtehna piak ahi kei ding hi. 40Jonah ni thum leh zan thum ngapi gilsung a a om bang in, Mihing Tapa ni thum leh zan thum lei gilsung ah a omsam ding hi. 41Ninevi khomite thukhen ni chiang in tulai khangte kiang ah ading sam ding ua, siamlouh a tangsak ding uh. Jonah thugen ziak in a kisik ua: ngai dih ua, Jonah sang a thupizaw hiai ah a om hi. 42Simlam kumpinu thukhen ni chiang in hiai khangte kiang ah a thou ding a, siamlouh a tangsak ding hi, Solomon pilna ngaikhe ding in kawlmong a kipan a hongpai ngal a; ngai dih ua, Solomon sang a thupizaw hiai ah a om hi!

A Kimlou A Kibawl Lauhuaina

(Lk. 11.24-26)

43“Huan dawinin mihing sung a kipan a pawt in, khawlna zong in tui omlouhna mun ah a vakvaka, a mu kei hi. 44Huan ‘ka pawtna inn mah ah ka kiknawn mai ding’ a chi a: a vatun leh a hawm a zephoihsa in a va mu hi. 45Huaitak in a vapai a, amah sang a gilou zaw dawi dang sagih a honpi a, huai mi sung ah a lut ua, a tengta uhi: huai mihing omdan nanung amasa sang in a hong hoihkei zaw hi. Tuabang mah in, tulai khang giloutakte tung a a hongom ding” chi’n a dawng hi.

Jesu Nu Leh A Sanggamte

(Mk. 3.31-35; Lk. 8.19-21)

46Mipite kiang a thu a genlai in ngai dih, a nu leh a unaute amah houpih tum in, inn pua ah ading uhi. 47Mi khat in a kiang ah, “Ngai dih, na nu leh na unaute nang hon houpih tum in inn pua ah ading nilouh uh” a chi hi.

48Aman a hilhpa kiang ah, “Ka nu kua ahia? Ka unaute leng kuate ahia ua?” chi in a dawng hi. 49Huan nungzuite lam a a khutzan in, “En un, ka nu leh ka unaute: 50Kuapeuh ka Pa van a om deihlam hihphot ka unau, ka sanggam nu leh ka nute ahi uh” a chi hi.

Currently Selected:

MATTHAI 12: PAITBSI

Highlight

Copy