MATTHAI 11

Baptispa Johan Misawlte

(Luk 7.18-35)

1Huan hichi ahong hi a, Jesu'n anungzui sawm-le-nihte thu apiak zoh in huai a pan in akhopite uah sinsak ding leh thugen ding in apaita uhi.

2Johan in suangkul sung a Khrist thilhihte ana zak in anungzuite sawl in akiang ah, 3“Hong pai dingpa na hi hia, ahihkeileh midang hungaih lai ding ka hi uhiam?” achisak hi.

4Huan Jesu'n akiang uah, “Pai nawnta unla, thil na muh uh leh na zak uh Johan kiang ah va hilh un; 5mittawte amit uh ahong vakta, khebaite khe in ahong pai ua, phakte ahong siangthouta ua, nangongte leng abil uh ahong vakta, misite leng kaihthoh in a-omta ua; mizawngte'n leng tanchinhoih hilh adongta uhi. 6Kuapeuh ka tung a lung hihlouhna mu lou ahampha hi,” chi in adawng hi.

7Huai mite apaitak un, Jesu'n mipite kiang ah Johan thu agenta hi, “Bang en ding a gamdai a paikhia na hi ua? Sialluang huih mut ling maw? 8Ahihkeileh bang en ding pen a paikhia na hita ua? Puannem silh maw? Ngai un, puannem silhte zaw kumpipate inn ah ei ve a-om uh. 9Ahihkeileh bangziak pentak in ahia na paikhiak uh? Zawlnei en ding in maw? Ahi tawk vo oi, ka hon chi ahi; zawlnei sang a leng thupizaw.

10“En dih, na ma ah ka thangkou ka sawl ahi,

ama'n na ma ah na lampite abawl ding chih atanchin agelh uh hiai mipa ahi.

11“Chihtaktak in, ka hon hilh ahi, numei suan lak ah baptispa Johan sang a thupizaw apiang kei; himahleh van-gam a mineupen amah sang in athupizaw hi. 12Baptispa Johan om a kipan tutan in van-gam in hiamgamna atuak nak, hiamgamte'n thagum in ala uhi. 13Zawlneite tengteng leh Dan thu in Johan ahong om tanpha in ana genkhol zel uhi. 14Na pom nop uleh, huai zaw Elijah hong pai dingpa mah ahi. 15Kuapeuh zakna ding a bil nei in za hen!

16“Himahleh hiai khangte bang toh ka tehpih dia? Naupang dawr mun a tu a, alawmte sam a, 17tamngai hon tumsak ung a, lam lou uchin a, kap huphup ung a, suun lou uchin a, chite bang ahi uh. 18Johan ahong pai a, ne in adawn kei a, dawi zawl achi uhi. 19Mihing Tapa ahong pai a, ne in adawn a, ‘En dih ua, an haipa, uain haipa, siahkhonte leh mikhialte lawm,’ achi uh. Hinapi in athilhih in pilna siam atan uh,” achi hi.

Gingta Lou Khopite Tunggikna

(Luk 10.13-15)

20Huan akisik louh ziak un, athil thupi hihtamna khopite atai hi. 21“Korazin, na tung agik e; Bethsaida, na tung agik e; noumau a thil thupi kihihte Tura leh Sidon a hih hileh, sai-ip puan silh a vut lak a tu in akisikta ding uhi. 22Himahleh ka hon hilh ahi, thukhen ni chiang in nou thuak ding sang in Tura leh Sidon khua thuak ding adan a-om zaw ding hi. 23Huan nang Kapernaum, van tan a tawisang na hi dia hia? Misikhua tan a paisuk ding na hita ve, nangmah a thil thupitak kihihte Sodom a hih hileh, tutan in a-om lai ding hi. 24Himahleh ka hon hilh ahi, thukhen ni chiang in na thuak ding sang in Sodom gam thuak ding adan a-om zaw ding,” achi hi.

Khrist A Khawlna

(Luk 10.21-22)

25Huchih lai in Jesu'n ahoupih a, “Pa aw, leitung leh van Toupa, nang mipil leh mibengvakte kiang ah hiai thu na iim a, naungekte kiang a na theihsak ziak in ka hon phat hi. 26Ahi, Pa, tua bang hih, nang ngaih in ahoih ahi. 27Ka Pa'n thil bangkim hon kemsakta; Pa lou in kuamah in Tapa athei kei; Tapa leh akiang ua Tapa in akitheihsak utnate kia lou ngal in kuamah in Pa athei kei hi.

28“Nou semgim leh puakgik po tengteng aw, ka kiang ah hong pai un, keima'n khawlna ka hon pe ding hi. 29Ka hakkol pua unla, kei a kipan zil un; thunuailut leh lungtang kingainiamtak ka hi; huchi in na kha ua ding in khawlna na mu ding uh. 30Ka hakkol puak anuam a, ka puakgik leng azang hi,” achi hi.

Currently Selected:

MATTHAI 11: PAITBSI

Highlight

Copy