MALAKI 1
1
1Israel kiang a Toupa kilakna Malaki in a muh:
Toupa’n Israel A Itna
2“Ka hon itta,” Toupa’n a chi. Nou bel, “Koilai ah ahia nang kou n’on ittak?” na chi uhi, “Esau, Jakob unaupa ahi kei maw? Hinapi in, Jakob ka it hi.” 3Himahleh Esau ka hua a, a tangsangte ka hihgawp a, a goutan gamdai sehalte kiang ah ka peta hi, Toupa’n a chi.
4Edom in, “Suk zawngkhal in i om ua, himahleh i kiknawn ding ua mun segawpsate i lam ding uh” chi mahleh, hichibang in sepaihte Toupa’n “A lam nawn ding ua, himahleh ka chimsak ding; mite’n amaute gitlouhna gam leh, mipi a tung ua tangtawn a Toupa hehna nam” a chi ding uhi.
5Huchi in na mitte un a mu dia, “Israel gamgi khen ah Toupa letsak in om hen” na chi ding uhi.
Toupa’n siampute A Salhna
6“Tapa in a pa a zahtak a, sikha in a pu; huchi a pa ka hihleh, kei zahtakna koi a om ahia?” Huchi a pu ka hihleh, kei kihtakna kaw om ahia? Sepaihte Toupa’n na kiang uah a chi, siampu ka min musitte aw. Nou koilai ah ahia na min ka muhsit uh? na chi uhi. 7Ka maitam tung ah tanghou sesa na lan ua, nou koilai ah ahia k’on hihnit uh? na chi uh. Toupa dohkan a simmohhuai, na chih na uah. 8Kithoihna ding a mittaw na lat un, gilou ahi kei maw? Khebai leh damlou na lat un, gilou ahi kei maw? Tuin na ukpipa kiang ah tawi in na tung ah a lungdam diam? Ahihkeileh nou hon deihsak diam?” sepaihte Toupa’n a chi.
9Huchi in tuin k’on ngen hi, i tung a a chitna na theihna ding in Pathian deihsakna ngen un. Hiai na khut ua kipan thilpiak toh nou hon deihsak diam? sepaihte Toupa’n a chi. 10A thawn a ka maitam tung a mei na tohlouhna ding un, na lak ua mi khat kongkhakte khak ding om leh aw; Sepaihte Toupa’n, “Nou ah kipahna ka neikei a, na khut ua kipan in thillat leng ka sangsam kei ding. 11Ni suahna a kipan ni tumna lam pha hial in leng Jentelte lak ah ka min a thupi hi, munchih ah ka min adin gimlim a kilan a, thillat siangthou; Jentelte lak a ka min a let ziak in, sepaihte Toupa’n a chi. 12Himahleh nou na hihnin ua, Toupa dohkan a nin a, huai a a gah toh a an nangawn a zahpihhuai na chih na uah. 13‘Ngai un, a chimtakhuai na e; na chilai ua, huan na hahchhiau khum uh, sepaihte Toupa’n a chi, hiamgam a lak gante n’on tawi ua, khebaite, damloute, huchibang in thillat na hontawi uhi; na khut ua kipan in hiai ka sang peuhmah ding hia?’ Toupa’n a chi hi. 14Himahleh a ganhon lak a a pa nei a, thuchiam a Toupa lak a thil demkai a kithoih, mikhempa hamsiat in om heh; Kumpipa thupi ka hi a, Jentelte lak ah ka min a lauhuai ngal a” sepaihte Toupa’n a chi.
Currently Selected:
MALAKI 1: PAITBSI
Highlight
Share
Copy
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
