MALAKI 2
2
1Tu in, nou siampute aw, “Hiai thupiak noute a ding ahi. 2Ka min pahtawi ding a, na ngaihkhiak louh ua, na lungtang ua na koih kei uleh, huchi in na tung uah hamsia ka tungsak ding a, na vualzawlnate uh ka hamsiatkhum ding, sepaihte' Toupa'n achi, ahi, lungtang a na koih louh ziak un, ka hamsiat khinta hi. 3Ngai un, noute ziak in na chi tuh ka sal ding a, na mai uah ek ka thehthang ding a, na kithoihna ek ngei uh; huchi in huai toh lakmang in na om ding uhi. 4Hiai thupiak, Levi toh ka thukhun a-omtheihna ding in, na kiang uah ka hon sawlta chih na thei ding uh, sepaihte' Toupa'n achi.
5“Hinna leh lungmuanna ka thukhun amah toh a-om hi, akihtak theihna ding in akiang ah amaute ka peta a, kei ahon kihta a, ka min azahtak mahmah hi. 6Akamsung ah thutak dan a-om a, diktatlouhna amuk ah akimu kei; lungmuanna leh tanna ah ka thu azui a, gitlouhna a kipan in mi tampi aheimangsak hi. 7Siampu mukte'n theihna akem un, akam uah dan azong ding uh ahi him hi; amah lah sepaihte' Toupa sawltak ahi ngal a.
8“Himahleh lampi a kipan pialsak in na om ua; tampi dan ah na kisuipuksak uhi; Levi thukhun na suseta uhi. 9Huaiziak in ka lampite na zuih louh dungzui un, dan a mite deihsak tuam na neih zawk ziak un, ke'n leng mipite tengteng ma ah zahpihhuai leh dai in ka hon bawlta hi,” sepaihte' Toupa'n achi.
Israel Lepchiahna
10I vek un pa khat i nei kei ua hia? Pathian khat in hon siam kei a hia? Bangziak a lepchiahtak a michih in i pipute uh thukhun hihnin a-unau siatna ding a hih i hi ua? 11Judah in lepchiahtak in ahihta a, Israel ah leh Jerusalem ah kihhuai hih in a-om hi, Judah in Pathian' mun siangthou it ahihninta a, theih louh pathian tanu akitenpihta hi. 12Toupa'n hiai thilhihpa, sinsakpa leh sinsak a ompa, Jakob puanin a kipan leh sepaihte' Toupa kiang a thillat lanpa asatkhe ding hi.
13Huan hiai na hih nawn uh; Toupa maitam khitui, kah leh thumna in na khuh ua, thillat alimsak nawn louh a, na khut ua kipan deihsakna toh san leng asan nawn louh tanpha in. 14Hinapi in lah, “Bangziak in maw?” achi uhi. Na tuailai zi, lepchiahtak a na bawl, na kithuahpihnu, na thukhun zi hinapi in, amah leh nang kikal ah Toupa theihpihpa ahih khit tak ziak in. 15Pathian in nihte sa khat in hon bawl kei maw? Khat in na kha hon bawlsak in, ahingsak kei maw? Bang achia khat? Pathian limsak chi azong ahi. Huaiziak in michih in atuailai zi lepchiahtak a hih lou ding in na kha thu uah pilvang un. 16Toupa Israel' Pathian in achi, koihmangna ka hua a, hiamgamna a puansilh khuh mipa ka mudah hi, sepaihte' Toupa'n achi. Huaiziak in michih in atuailai zi lepchiahtak a hih lou ding in, na kha thu uah pilvang un.
17Na thu un Toupa na hihgimta uh, koi ah ka hon hihgim ua ahia, na chi lai uhi; michih gilou hih Toupa mitmuh in ahoih a, huaite ah amah akipak hi na chihna uah leh vaihawmna Pathian koi a om hiam na chih nakna uah.
Currently Selected:
MALAKI 2: PAITBSI
Highlight
Share
Copy
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
