GENESIS 45

Joseph A Unaute Kiang ah A Kipuangkhia

1Huan, a kiang a dingte ma ah Joseph a kidek zouta kei a, “Mi tengteng ka kiang a kipan pawtkhesak vek un” chi’n, a kikou hi. Joseph a unaute kiang a a kigen sungteng a kiang ah kuamah ading kei uh. 2A kap lawlawih a, Aiguptate’n a za ua, Pharo inkuanpihte’n leng a za uhi. 3Joseph in a unaute kiang ah, “Joseph ka hi. Ka pa a damlai na maw?” a chi hi. Himahleh a unaute’n a dawng theikei ua, a ma ah buaitak in a omta uhi. 4Joseph mah in a unaute kiang ah, “Hehpih in honnaih un” a chi hi. Huchi in a vanaih ua, aman, “Na unaupa uh Joseph, Aigupta gam a lutpih dia na khot uh ka hi. 5Himahleh hiai a paiding a n’on khot ziak un lungkham kei unla, ki hehkhum tuankei un. Mite hinna hondam ding in Pathian in na ma ua honsawl masa ahi. 6Hiai kum nih sung hiai gam ah kial a keta a; kum nga in a samlai hi. Huai sung in leileh a omkei dia, buhlak leng a omkei ding. 7Tu nung khang om zel ding hawisak ding leh noute hotdamna thupitak a hingdam a k’on omsak theihna ding in Pathian in na ma uah a honsawl masa hi. 8Huchi in, hiai a honsawl nou na hi kei ua, Pathian ahizaw hi. Aman Pharo pa inn leh a inkuanpih tengteng heutu in leh Aigupta gam tengteng vaihawmtu in a hon bawlta hi.

9“Kintak in ka pa kiang ah vapai unla, a kiang ah, na tapa Joseph in hichi’n a chi. Pathian in Aigupta gam tengteng heutu in a hon bawlta a, ka kiang ah hong paisuk in, sawt hon halken. 10Huchi in, Gosen gam ah na teng ding a, ka kiang ngei ah na om ding; nang, na tate, na tute, na belamhonte, na bawnghonte leh na neih tengteng toh. 11Hiai ah keimah in ka honvak ding. Kial lah kum nga omlai ding ahi ngal a. Huchilou in zaw na genthei kha ding, nang leh na inkuanpihte leh na neih tengteng toh” honchi un.

12Ngai un, noumau mit ngei leh ka nau Benjamin mit ngei in keimah kam mahmah in a genlai na mu kilkel uhi. 13Aigupta gam a ka thupina tengteng thu leh na thilmuh tengteng thu uh ka pa na hilh ding ua; ka pa kintak in hiai ah n’on pisuk pah ding uh ahi” a chi hi.

14A nau Benjamin ngawng a kun in a kapta a; Benjamin leng amah ngawng a kun in a kapta hi. 15A unau tengteng a tawp a, a kahkhum chiat a, huaikhit in a unaute’n thu vantang a genpih uhi.

16Joseph unaute a hong uh chih thu thuthang Pharo inkawte’n a naza uhi. Huai in Pharo leh a sikhate a kipaksak mahmah hi. 17Pharo in Joseph kiang ah, “Na unaute kiang ah, huchi in hih in. Na gante uh buh pawsak unla, pawt unla, Kanan gam ah pai un. 18Na pa uh leh na inkuanpihte uh honpi unla, ka kiang ah hongpai un. Aigupta gam a thilhoihte k’on pe ding a, hiai gam a thil om hoihpente na ne ding uh. 19Thu k’on pia hi. Hichi’n hih un. Na ta neu chikchikte uh ading leh na zite uh ading Aigupta gam a kipan kangtalaite la unla, na pa uh pi ding in va kuan un. 20Na van uh leng ngaihtuah nuam dah un, Aigupta gam tengteng thil hoih peuhmah nou a ahi ngal a” a chi hi.

21Israel tate’n huchibang in a hih ua, Joseph in Pharo thupiak bang in kangtalaite a kiang uah a pia a, lampi a nekding leng a pia hi. 22Avek ua kiang ah puansilh kikhenna ding a pe chiat a; Benjamin kiang ngial ah houh dangka za thum leh puansilh kikhenna ding nga a pia hi. 23A pa kiang ah hiaite a khak hi: Aigupta gam a thil hoih pua sabiltung sawm leh lampi a, a pa ading buh leh tanghou leh nekding pua sabengtungnu sawm. 24Huchi in a unaute a sawlkhia a, a paita uhi. Aman a kiang uah, “Lampi ah kina lou ding in pilvang un” a chi hi.

25Aigupta gam a kipan a paitou ua, Kanan gam a a pa Jakob kiang a va tungta uhi. 26A kiang ah, “Joseph a hinglai a, Aigupta gam tengteng heutu ahi” chi in, a hilh uhi. A thugen uh a gintak louh ziak in, a lungtang a bahta hi.

27A kiang ua Joseph thugente a hilh ua; a tuanna ding kangtalai Joseph in a khakte a muh in Jakob lungtang a halhnawn hi. 28Israel in, “A hunta; ka tapa Joseph hingdam a na om ahi maw. Ka sih ma in amah ka va mu ding” a chi hi.

Currently Selected:

GENESIS 45: PAITBSI

Highlight

Copy