GENESIS 44

Nou Mang

1Huan, aman a inn kemmi kiang ah, “Huai mite ip in a puakzoh zahzah uh buh in dimsak inla, a dangka chiat uh a ip gong bul chiat uah koih in. 2Ka nou, huai dangka nou, a naupang penpa ip gong bul ah koih in, a buh man dangka toh” chi’n, thu a pia hi. Huchi in, aman Joseph thugen bang in a hihta hi. 3Khua a vaktakin amau a sabiltungte utoh a paisakta hi. 4Khua a kipan a paikhiak ua gamla a tunma un, Joseph in a inkemmi kiang ah, “Thou inla, huai mite va delh in. Na va phak chiang in a kiang uah, Bangchidana thil hoih, thil hoihlou a thuk na hi ua? 5Huai ka pu uain dawnna leh a aisanna mahmah hilou ahi maw? Hichibang na hih uh na gilou uhi” chi in, a chi hi.

6A delhpha a, huai thute a kiang uah a gen hi. 7Amau a kiang ah, “Pu, bangchidan ahia hichi thu na gen? Na sikhate’n huchibang thil ka hihlouh ding dan uh. 8Ngai in, ka ip gongbul ua dangka ka muhte uh leng Kanan gam a kipan na kiang ah k’on tawi ve ua oi. Bangchidan in na pu inn a dangka hiam dangkaeng hiam ka gu thei maizen ding ua? 9Na sikhate lak ah kuapeuh na muhna penpen si hen, kou leng ka pu uh sikha in ka om mai ding uh” a chi uhi.

10Aman, “Hi hen, na thu bangzel un hi hen. Himahleh kuapeuh k’on muhna penpen ka sikha in om hen. Nou ahihleh dembei na hi ding uh,” a chi hi. 11Huaitak in amau ipchiat uh kintak in lei ah a ngakhia ua, amau ipchiat a hong uhi. 12Aman a upapen ah apan a, a naupangpen pha in a zong a; Huchi in Benjamin ip ah nou a muta hi. 13Huaitak in a puansilhte uh a botkek ua, amau sabiltung chiat a pawsak nawn ua, khua ah a kiknawnta uhi. 14Judah leh a unaute’n Joseph inn a vapha ua; amah huai ah a na omlai hi. Huchi in a mai ah a khupboh chiat uh. 15Joseph in a kiang uah, “Bang thil ahi mai a na hih uh? Kei bang mi, aisan a siam teitei uh, chih na theikei ua hia?” a chi hi.

16Judah in, “Pu, na kiang ah bang ka genta ding ua? Bang k’on hilhta ding ua? Bangchibang in ka kigen vengta ding ua? Pathian in na sikhate tatlekna a mu kheta hi. Ngai in, pu, na sikhate ka hita mai uh. Kou leh a khut a nou a muhna pen uh leng” a chi hi.

17Aman, “Huchibang a ka hihlouh ding dan. A khut a nou a muhna pen kia ka sikha in a om ding a, nou zaw lungmuangtakin na pa uh kiang ah paitouta un” a chi hi.

Judah In Benjamin Dingin A Ngetsak

18Huaitak in, Judah in Joseph a vanaiha, “Pu aw, hehpih in, pu, kei na sikha, na bil a na zak ding in thu kam khat hon gensak inla, na hehna na sikha tung ah kuangsak ken. Nang lah Pharo bang hial na hita hi. 19Pu, nang, ‘Pa hiam unau hiam na nei uhia?’ chi’n, na sikhate na hondong hi. 20Pu, kou na kiang ah, ‘Pa putek tak leh a teklam a neih naupangchik, ka nei uh. Huai mi upa a sita a, a nu neih lak ah amah kia a omlai a, a pa’n lah amah a it mahmah hi’ ka chi uhi. 21Nang na sikhate kiang ah, amah pen ka mit a ka muh theihna ding in ka kiang ah hon pisuk un, na chi hi. 22Pu, kou na kiang ah, ka nau un a pa a nuse theikei ding; a pa paisan leh a pa a simai ding, ka chi uhi. 23Nang na sikhate kiang ah, ‘Na nautumpen uh n’on tonpih kei uleh, ka mel na mu nawn kei ding uh’ na chi hi.

24Hichi ahi a, na sikha ka pa uh kiang ka vatun un, Pu, na thu ka hilh uhi. 25Ka pa un, ‘Kuan nawn unla, buh tawmchik bek ei ading in va lei nawn un’ a chi hi. 26Kou, ‘ka hohsuk thei nawn kei ding uh. Ka nautumpen uh a hongding leh bel ka hohsuk ding ua, ka nautumpen uh a hong keileh huai mi mel mu theilou ding ka hi uh’ ka chi uh. 27Na sikha ka pa un ka kiang uah, ‘ka zi in tapa nih a hon neihsak, chih na thei uhi. 28A khat pen ka kiang a kipan a paikhia a, bohzan vek a om hingei ding ahi, ka chi hi. Huai nungsiah amah mulou vengveng ka hi. 29Huchi in, hiai mi leng ka kiang a kipan na pimang ua, tuahsia va tuak leh ka lu kang lungkham a hana tumsak ding na hi uh,’ a chi hi.

30Huchi in, ka nau in kou honzui lou a, na sikha ka pa kiang vatung leng, a hinna, ka nau uh hinna toh a kizop ziak in, 31hichi ahi ding a, naupang in a hon zuikei, chih a theih chiang in a si mai ding. Huchi in na sikhate’n na sikha ka pa uh lu kang lungkhamna a han a tumsak ding ka hi uhi. 32Na sikha in na kiang a ka honpi kiknawn kei leh, a mawh tangtawn in ka pa lak ah ka paw ding, chi’n, ka pa kiang ah ka nau uh tungtang thu ah a bultumpa in ka kibawlta hi. 33Huchi in, hehpih in na sikha ka nau uh sik in, Pu, na sikha in hon omsak inla, ka nau a ute zuitou sak in. 34Ka nau in hon zuilou in bangchi’n ka pa kiang ka paitou thei dia? A tung a siatna tung mu ding ka kei hiam” a chi hi.

Currently Selected:

GENESIS 44: PAITBSI

Highlight

Copy