GENESIS 46

Jakob Leh A Inkuan Aigupta Ah A Pai Uh

1Huan, Israel a neih tengteng toh a pawt a, Beer–sheba a tung a, a pa Isak Pathian kiang ah kithoihnate a lan hi. 2Pathian in zan a mengmuhna in Israel a houpih a, “Jakob, Jakob,” a chi hi.

Aman, “Hiai ah ka om,” a chi hi.

3Aman, “Kei Pathian, na pa Pathian ka hi. Aigupta gam a hohsuk lau ken. Huai ah chi thupitak in k’on bawl ding hi. 4Aigupta gam ah na kiang ah ka hong dia; k’on pitou nawn ngeingei ding, na sih chiang in Joseph in hon mitsi sak ding” a chi hi.

5Huchi in, Jakob Beer–sheba a kipan a pawt a; Israel tate’n a pa uh Jakob leh a ta neuchikchikte uh leh a zite uh tuanna dia Pharo in kangtalai a khakte ah a tuangsak uhi. 6Huchi in, Jakob leh a suan tengteng in Kanan gam a a lamkhiak uh, gante leh vante tawi in, Aigupta gam a tungta uhi. 7A tapate, a tupate, a tanute, a tunute leh a suan tengteng, Aigupta gam ah a lutpihta hi.

8Hiaite Israel suan Aigupta gam a lut, Jakob leh a tapate min ahi. Reuben, Jakob ta masa. 9Reuben tapate Hanok, Pallu, Hezron leh Karmi ahi uh. 10Simeon tapate: Jemuel, Jamin, Ohad, Jakin, Johar leh Kanan numei tapa Shaul ahi uh. 11Levi tapate: Gershon, Kohath leh Merari ahi uh. 12Judah tapate: Er, Onan, Shelah, Perez leh Zerah ahi ua; (Er leh Onan Kanan gam ah a sita ua) Perez tapate Hezron leh Hamul ahi uh. 13Issakar tapate: Tola, Puva, Job leh Shimron ahi uh. 14Zebulun tapate: Sered, Elon leh Jhaleel ahi uh. 15Hiaite tengteng Leah tapa, a tanu Dinah toh, Padan-aram gam a Jakob a neihsakte ahi ua; a tapate leh a tanu tengteng sawmthum leh thum ahi uh.

16Gad tapate: Ziphion, Haggi, Shuni, Ezbon, Eri, Arobdi leh Areli ahi uh. 17Asher tapate: Jimnah, Ishuah, Isui leh Beriah leh a sanggamnu uh Serah ahi uh. Beriah tapate: Heber leh Malkiel ahi uhi. 18Hiaite Zilpah Laban in a tanu Leah kiang a a piak tapate, Jakob a neihsak mi sawmlehguk ahi uhi.

19Jakob zi Rakil tapate: Joseph leh Benjamin ahi uh. 20Joseph in Aigupta gam ah tapa Manasseh leh Ephraim a nei a, huai mite On khaw siampu Potipher tanu Asenath in amah a neihsakte ahi uh. 21Benjamin tapate: Belah, Beker, Ashbel, Gera, Naaman, Ehi, Rosh, Muppim, Huppim leh Ard ahi uh. 22Hiaite Rakil tapa Jakob a neihsakte ahi ua; avek un sawmlehli ahi uh.

23Dan tapa Husim ahi. 24Naphtali tapate: Jahzeel, Guni, Jezer leh Shillem ahi. 25Hiaite Bilhah tapate Laban in a tanu Rakil kiang a a piak ahi uh. Hiaite Jakob a neihsak a; avek un sagih ahi uh.

26Jakob tapate zite simlouh in Jakob kiang a Aigupta gam a lut, a khal a pawt tengteng avek un sawmguk leh guk ahi uhi. 27Joseph in Aigupta gam a tapa a neihte nih ahi ua; Jakob inn kawte, Aigupta gam a lutte, sawmsagih ahi uhi.

Jakob Leh A Inkuan Aigupta Ah

28Jakob in Gosen gam lampi na kawkmuh ding in Joseph kiang ah Judah a hohmasa sak hi. 29Huchi in, Gosen gam ah a lutta uh. Joseph in a kangtalai a bawlkhol a, Gosen gam ah a pa dawn ding in a hohtou hi. A kiang ah a kigen a, a ngawng a kun in a kap nilouh hi. 30Israel in Joseph kiang ah, “Dam in na om a, na mel ka muh nawn ziak in tun zaw si ding in ka kimanta” a chi hi.

31Joseph in a unaute leh a pa inkuanpihte kiang ah, “Ka va hohtou dia, Pharo ka hilh dia, a kiang ah, ka unaute leh ka pa inkuanpihte, Kanan gam a omte ka kiang a hongtungta uhi. 32Amaute ganvulmi, belamchingmite ahi uhi. A belamhonte uleh a bawnghonte uh leh a neih tengteng uh a honpaw vek uhi, chi’n, ka vagen ding. 33Hichi ahi ding a, Pharo in nou a honsap a, bang nasem na hi ua? a honchih chiang in, 34Na sikhate, hon suangtute a kipan naupang chik ka hih lai ua pan in tutan ganvulmi ka hi uh, na chi ding uh. Huchi in, Gosen gam ah na tengthei ding uhi” a chi hi. Belamchingmite himhim lah Aigupta mite kihlam tak ahi uhi.

Currently Selected:

GENESIS 46: PAITBSI

Highlight

Copy