GENESIS 43

1Huan, huai gam ah kial a nakkiak mahmah hi. 2Hichi ahi a, Aigupta gam a kipan a buh puaktouh uh a nekgaih nung un, a pa un, a kiang uah, “Kuan nawn unla buh tawmchik bek ei ading in valei nawn un” a chi hi.

3Huchi in, Judah in a kiang ah, “Huai mi’n, na nau uh n’on tonpih kei uleh, ka mel na mu kei ding uh, chi’n, honkalh ngiungeu hi. 4Ka nau uh n’on zuihsak ding leh, buh k’on va leisak ding uh. 5N’on zuihsak keileh zaw, ka hohkei ding uh. Huai mi’n ka kiang uah, Na nau uh n’on tonpih kei uleh, ka mel na mu kei ding uh, a chita ngal a” chi’n a gen hi.

6Israel in, “Bangziak in ahia nau dang na neihlai tantan na hilh chitchiat uh? Kei adia hoihlou na hih uh?” a chi hi.

7Amau, “Huai mi’n, na pa uh hinglai hia? Unau dang na neilai uhia? chi’n, i tanchin leh i tanaute tanchin a hon dong hi. A hon thudot bangzel in ka hilh uhi. Na nau uh hon pisukun, a chi ding chih kuan a thei chitchiat dia?” a chi uh.

8Judah in a pa Israel kiang ah, “Ka nau uh hon zuisakin. Huchi in ka kisa ding ua, ka kuan ding uh. Kou leh nang leh ka ta neu chikchikte u leng silou a i hin theihna ding un. 9A tungtang thu keimah in bultum na ning. Ka khut a kipan mahmah ah amah honphut in. Amah na kiang a ka honpi kiknawn kei a, na ma a k’on dinsak nawn kei leh, a mawh tangtawn in ka paw ding hi. 10Om sawtlou hile ung, a nihveina hongtung nawn khinta ding hi ung” a chi hi.

11A pa uh Israel in a kiang uah, “Huchibang a hih vanglak leh hichi’n hih un. Na seng un hiai gam a thil hoih khenkhat singnai damdawi, khuaizu, gimnamtui, Murra, theihawksek leh makha gah, neukha chiat huai mi ading thilpiak tawisuk un. 12Dangka a mun nih in tawi unla, na ip gongbul ua a hon dangka piak nawn leng tawi nawn un; a muhkhelh ahi kha ding. 13Na nau u leng pi unla, thou unla, huai mi kiang ah va hoh nawn un. 14Na unau khat pen uleh Benjamin a hon khahsakna ding in Pathian bangkim hihthei in huai mi hon hehpihsak hen. Ka tate tan ahihleh tan ka himai kei ding hia” a chi hi.

15Huchi in, thilpiak a tawi ua, dangka leng a mun nih a tawi ua, Benjamin leng a pi uhi. A thou ua, Aigupta gam ah a hohsuk ua, Joseph ma ah ading nawn uhi. 16Joseph in Benjamin a kiang ua om a muhtak in, a inn kemmi kiang ah, “Huai mite inn sung ah pilut inla, sa gou inla, bawl in, huai mite’n sun chiang in ka kiang ah an a ne ding uh” a chi hi. 17Huchi in, aman Joseph thupiak bang in a hihta a; Joseph inn ah a pilutta hi.

18Joseph inn a pilut a, a om ziak un a lau ua, “I hoh masak lai a, i ip ua dangka hong kiknawnte ziak in eive a hon pilut uh. I tung ua siatna zong a, honsual in, ei leh i sabiltungte toh sikha dia hon mattum eive,” a chi uhi. 19Joseph inn kemmi kiang ah a va hoh ua, kongbul ah a houpih uh.

20“Pu aw, ka hong masak lai ua buh lei ding lel a hongsuk ka hi uh. 21Hichi ahi a, giahbuk ka tun un ka ipte uh ka hong ua, ngai in, ka dangka chiat uh ka ip gongbul uah a na om hi. Ka dangka uh a buk ngeingei in a na om a, huchi in ka hontawi uhi.

22Buh leina ding in dangka dang k’on tawi ua, ka dangka u lah kuan ahia ka ip ua koih ka thei ngalkei uh” a chi uh.

23Aman, “Lungmuangtakin om unla, lau kei un. Na Pathian, na pa uh Pathian in na ipte uah gou a honpia ahi maive. Na dangka ulah ka mungal a” a chi hi. Huchi in Simeon a kiang uah a hon pikhia hi.

24Huai mi in Joseph inn sung ah amau a pilut a, tui a pia hi. A khe uh a sil ua; a sabiltungte u leng an a pia hi. 25A thilpiak tawi uh Joseph sun an ne dia a hongpai ma in a na bawlkhol uh; huai ah an a ne ding uh, chihlah a za uhi. 26Joseph a inn a, a hong paitakin, a khut ua thilpiak om inn sung ah, a kiang ah a tawilut ua, leisi in a mai ah a kun chiat uhi. 27Aman a tanchin uh a dong a, “Na pa uh tanchin na gen uh, huai putek a damdam na hia? A hing lai hia?” a chi hi.

28Amau, “Na sikha ka pu uh a damlai hi, a hinglai hi” a chi uh. Huchi in a lu uh a kun sak ua, zahtakna a pia uhi.

29Amah a dak a, a nau Benjamin, a nu tapa a mu a, “Hiai na nautumpen uh, a tanchin na honhilh uh hia?” a chi hi. Amahmah in, “Ka tapa, Pathian in hon hehpih hen” a chi hi. 30Joseph in a nau a muh in a khase mahmah a, kintak in kahna ding mun a zongpah a, a dantan sung ah a lut a, huai ah a kap kheta hi. 31A mai a phiat a, a vapawt nawn a, a kidek teitei a, annek bawl un, a chi hi. 32Huchi in amah ading atuam in, amau ading atuam in, Aigupta mi a nekpihte ading atuam in a bawlta uhi. Aiguptate’n lah Hebrute a nekpih thei ngalkei ua; huchibang hihlah Aiguptate ading in thil sianglou ahi. 33Huchi in, a upapen tamasa a hihna bang in, a naupangpen nautumpen a hihna bang in Joseph ma ah a tu ua; huchi in lamdang a sa chiat uhi. 34Joseph in a ma a mite a kipan tantuan an a ban piaksaka, Benjamin tantuan houh amaute tantuan tengteng sang in a mun nga in a tam tuam hi. Uain a dawn ua, nuam a sa chiat uhi.

Currently Selected:

GENESIS 43: PAITBSI

Highlight

Copy