GENESIS 42

Joseph Unaute Buh Lei Dingin Aigupta Ah A Hoh Uh

1Huan, Jakob in Aigupta gam ah buh a om, chih a thei hi. Jakob in a tapate kiang ah, “Bangdia ki en maimah na hi ua?” a chi hi. 2Amahmah in, “Ngai un, Aigupta gam ah buh a om, chih ka za hi. Silou a i hinkhiak theihna ding in huai ah va hohsuk unla, huai a kipan ei ading in valei un” a chi hi. 3Joseph unau sawmte Aigupta a buhlei ding in a hohsuk uhi. 4Joseph nau Benjamin Jakob in a ute kiang ah a hohsak kei hi. Tuahsia a va tuak kha ding, a chi hi.

5Israel tapate mi hohte lak ah buh lei ding in a hoh ua; Kanan gam ah leng kial a ke ngal a. 6Joseph Aigupta gam tung ah heutu ahi a; amah huai gam mi tengteng kiang a buh zuakpa ahi. Joseph ute a hongpai ua, leisi in a mai ah a kun uhi. 7Joseph in a ute a na mu a, amau a na theilai hi. Himahleh a kiang uah midang bang in a kibawla, khauhtak in amau a houpih hi. A kiang uah, “Koi a kipan a hong na hi ua?” a chi hi. Amau, “Buh lei dia Kanan gam a kipan hongpai ka hi uh” a chi uhi.

8Joseph in a ute a theilai a, amau bel amah a theikei uhi. 9Joseph in amau tungtang thu, manga a matte a theikheta hi. A kiang uah, “Enkhemite na hi uh. Gam venlouhna munte en dia hong kuan na hi uh” a chi hi.

10Amau a kiang ah, “toupa, hilou e, na sikhate buh lei dia hong kuan ka hi uh. 11Mi khat ta vek ka hi ua, mi diktak ka hi uh. Na sikhate enkhemite ka hi zenzen kei uh” a chi uhi. 12Aman a kiang uah, “Ka taksang kei, gam venlouhna munte en dia hongpai hi mah uteh” a chi hi. 13Amau, “Kou na sikhate unau sawmlehnih, Kanan gam a om, mi khat tate ka hi uh. Ngai in, ka nautumpen uh tuin ka pa uh kiang ah a om hi. Khat pen ahihleh a om nawnta kei hi” a chi uhi. 14Joseph in a kiang uah, “Enkhemite na hi uh k’on chih na hi mahmah uhi. 15Hichibang a ettel in na om ding uh. Na nautumpen uh hiai a, a hongpai keileh Pharo hinna a kichiam in hiai a kipan na pawtkhe kei ding uh, k’on chi ahi. 16Nou ah thutak a om hia, omlou chetna ding in na lak ua khat sawl unla, na nau uh honpi hen. Nou bel hen in na om phot ding uhi. Huchilou in zaw Pharo hinna a kichiam in, enkhemite na hi mahmah uh, k’on chi ding” a chi hi. 17Huchi in avek un ni thum a tangsak chiat hi.

18A ni thum ni’n Joseph in a kiang uah, “Hichi’n hih le uchin na hing ding uh; Pathian ka lau hi. 19Midiktat na hih uleh na unau lak uah khat na suangkulh tanna in uah hen in om hen. 20Na nautumpen uh ka kiang ah honpi un. Huchi in na thu uh a tel dia, na sikei ding uh” a chi hi. Huchibang in a hihta uhi. 21Amau, “I nau tung a i thilhih uh mawh petmah i hi, hehpih dia a honnget ngutngut lai a, a lungtang mangbat dan mu napi a, i ngaihkhiak saknop louh uh. Huaiziak in hiai mangbatna in hon buak ahi” a kichi uhi.

22Reuben in, “Naupang tung ah thil hihkhial kei un, chi’n, na kiang uah ka gen kei maw? Na ngaikhe nuam kei ua ahi. Huaiziak in, ngai un, a sisan phu i tung ua lak ahi tave” chi’n, amau a dawng hi. 23A kal ua pauletmi a om ziak in Joseph in a thugen uh a thei chih a theikei uhi. 24Aman amau a lehngatsan a, a kapta hi. A kiang uah a hong kiknawn a, amau a houpih a, a lak ua pan Simeon a pituam a, a mitmuh un a henta hi.

Joseph Unaute Kanan Ah A Kiknawn Uh

25Joseph in a ipte uh buh a hihdim ding leh a dangkate uh a ip ua koih nawnchiat ding in leh lampi a nekding pe ding in thu a pia hi. Huchi in huchibang in a hihsakta hi. 26A buh uh a sabiltungte a pawsak ua, huai a kipan a pawtkheta uhi. 27A lak ua mi khat in a giahbuk ua a sabiltung an pedia a ip a hon leh, a dangka a muta hi. Ngai in, a ip gongbul ah a na om hi. 28A unaute kiang ah, “Ka dangka na koihnawn uh hi ve e. Ngai un, ka ipsung ah a na om hi” a chi hi. A lunglel ua, “Pathian in hichibang a eite a honbawl bangchidan a diam aw?” chi’n, ling kawm in a ki entuah uhi.

29Kanan gam a a pa uh kiang a hongtung ua, a tung ua thil tung tengteng a hilh uhi. 30“Huai mi, a gam heutupa un, khauhtak in a hon houpih a, enkhemite ding in a honkoih hi. 31Kou a kiang ah, mi diktak ka hi uh. ‘Enkhemite ka hi zenzen kei uh.’ 32Unau sawmlehnih ka hi ua, ka pa uh tapate ka hi vek uh. Khat a om nawn kei a, ka nautumpen uh tuin Kanan gam ah ka pa uh kiang ah a om” ka chi uhi. 33Huai mi, a gam heutupa un, ka kiang uah, “Hichi’n midiktak na hi uh chih k’on thei ding. Na unau khat uh ka kiang ah nusia unla, na inkuanpih kialte ading in buh pua unla, paita un. 34Na nautumpen uh ka kiang ah honpi un. Huchi in enkhemite na hi kei ua, midiktak na hi zaw uh, chih ka thei ding. Huchi in na unaupa uh k’on penawn dia, hiai gam ah sum na sinta ding uh” a honchi, a chi uhi.

35Hichi ahi a, a ipte uh a butkhiak lai un, ngai in, a dangka tunchiat uh a ip uah a na omchiat hi. Amau leh a pa un a dangka tunte uh a muh un a lau mahmah uhi. 36A pa uh Jakob in a kiang uah, “Noute’n ka tate hon tansak na hi uh. Joseph a om nawn kei. Simeon lah a om nawn kei, Benjamin nasan lah pimang na tum nawn uh. Hiai thil tengteng in honkiak khum eita ve” a chi hi.

37Reuben in a pa kiang ah, “Na kiang a k’on pi kiknawn kei leh ka tapa nihte that mai in. Amah ka khut ah hon kemsak inla, na kiang ah k’on pi kiknawn mai ding” a chi hi.

38Aman, “Ka tapa na kiang uah a hongsuk kei ding. A u a sita a, amah kia lah ahita ngal a. Na paina lam lak ah tuahsia tuak leh ka lu kang lungkhamna in han ah na tumsak ding uh” a chi hi.

Currently Selected:

GENESIS 42: PAITBSI

Highlight

Copy