GENESIS 41

1Huan kum nih vingveng nung in hichi ahi a, Pharo in mang a nei a; ngai in, luigei ah a na ding hi. 2Ngai in, bawngpi sagih hoihtak tak, thautak tak tui a kipan a hong pawtkhe tou ua, loupa nou lak ah a hongta uhi. 3Ngai in, bawngpi dang sagih kil theuthou, gawng gemgom a hong pawtkhe nawn ua, bawngpi dangte kiang ah luigei ah ading uhi.

Joseph In Pharo Mang Hilhchian

4Bawngpi kil theuthoute’n bawngpi hoihtak tak, thau taktakte a negai maimah uhi. 5Huchi in, Pharo a khanglou a, a ihmu nawn a, mang a nei nawn hi. Ngai in, buhkung khat ah a vui sagih lian pipi, hoih liahliah a hongom khia hi. 6Ngai in, huai nung in vui sagih ngat giuhgeuh suahlam huih in a nuai ek a hong omkhe nawn hi. 7A vui ngat giuhgeuhte’n a vui sagih lian pipi, hoih liahliahte a valhkhin maimah uh. Huchi in Pharo a khanglou a; ngai in, mang a na hi. 8A zing in hichi ahi a, a lungsim a buai mahmah a; mi a sawl a, Aigupta gam a mitkhialdawi siam tengteng leh mi pil tengteng a samkhawm hi. Pharo in a mang amau a na hilh a; himahleh Pharo mangte hilhchian thei kuamah a omkei uhi.

9Huchih lai in uain pia heutupen in Pharo kiang ah, “Tuni in ka khelhna ka thei khia hi. 10Khatvei Pharo a sikhate tung ah a heh a, huchi in vengmipawl heutu inn ah kei leh tanghou bawl heutupen a hon tangsak hi. 11Kei leh aman zan khat mang ka nei ua, mang khiakna tuam tuak ahi ka mat uh. 12Huai ah ka kiang uah vengmi pawl heutu sikha, Hebru mi, tangval khat a om a; amah ka hilh ua, aman ka mangte uh a hilhchianta hi. Ka mang bang tuaktuak un a hon hilhchet sak hi. 13Hichi ahi a, kei ka nasep mah a hon semsak nawn a, amah a khailumta hi” a chi hi.

14Pharo in Joseph a samsak paha, kintak in suangkul a kipan a pikheta uh. Amah a kimet ngil a, a puansilh a khek a, Pharo kiang ah a va lutta hi. 15Pharo in Joseph kiang ah, “Mang ka nei a, a hilhchian thei kuamah a omkei uh. Nang mang thu na theih leh na hilhchian thei chih na tungtang mi gen ka naza” a chi hi.

16Joseph in Pharo a dawng a, “Huai ahihleh kei a om ahi kei hi. Pathian in Pharo lungkimhuaitakin a dawng zaw ding” a chi hi.

17Pharo in Joseph kiang ah, “Ka mang in, ngai in, lui gei ah ka na ding hi. 18Ngai in, bawngpi sagih thau taktak, hoih pipi tui a kipan a hong pawtkhe tou ua, loupa nou lak ah a hongta uhi. 19Bawngpi dang sagih ginalou leh deihhuai lou leh gawng siatsuat, huchibang tel a hoihlou Aigupta gam tengteng a leng ka muh ngeilouh, a nung uah a hong pawtkhe tou nawn uhi. 20Bawngpi gawng siatsuat deih huailou pipite’n bawngpi sagih thautak tak hongpawt masate a negai maimah uh. 21A nekgaih khitnung un leng, a ne uh chih a kithei tuankei hi. A tunglai mah bang in deihhuailou tak in a om lailai uhi. Huchi in ka khanglouta hi. 22Ka mang in, ngai in, buh kung khat ah vui sagih lian pipi, hoih pipi a hong vuikhia hi. 23Ngai in, huai nung in vui sagih vuai ningniang, neuchik chik, suahlam huih in a nuai a hong vuikhe nawn hi. 24A vui ngat ngiungeute’n a vui sagih hoihtaktakte a valhkhit maimah uh ka mu hi. Mitkhialdawi siamte ka hilh a, himahleh a hon hilhchian thei kuamah a omkei uh” chi’n, a gen hi.

25Joseph in Pharo kiang ah, “Pharo mang khat ahi. Pathian in hihdia a kisak Pharo theisak ahi. 26Bawng sagih hoihtaktakte kum sagih ahi ua; vui sagih hoihtaktakte leng kum sagih mah ahi uh. Mang khat ahi. 27A nung ua bawng sagih tektaktak, deihhuailou taktak hongpawt khetoute kum sagih ahi ua, vui sagih a hawm ngen suahlam huih nuaite toh; huaite kial kum, kum sagih ding ahi. 28Hiai ahi Pharo kiang a ka gen. Pathian in hihdia a kisak Pharo kiang a theisak ahi. 29Ngai in, Aigupta gamsung tengteng ah niang leh tai a om kum, kum sagih a hongtung ding hi. 30Huai nung in kial kum, kum sagih a hongom nawn ding. Huchi in niang leh tai a omna Aigupta gam ah mangngilh vek ahita ding. Kial in gam a negawp vek ding hi. 31Niang leh tai kum honzui kial a thupi mahmah ding ziak in mite’n hiai gam hauhsaklai hun a thei nawnta kei ding uh;. 32Pharo mang nihvei a neihtuan sakna ahihleh hiai ziak ahi. Thilhih ding Pathian in a hihkip a, Pathian in a tungsak pah ding.

33Tuin Pharo in mi khat, teitak leh piltak zongkhia henla, Aigupta gam tung ah heutu in omsak hen. 34Pharo in hiai hih hen. Gam tung ah heutute sep henla, niang leh tai a om kum, kum sagih sung Aigupta gam buh mun nga a khen, mun khat zel kaikhawm hen. 35Amau huai kum hoih kum hongtung ding a buh tengteng kai khawm in Pharo nuai a om ding in khuate ah tunung a nek ding in buh sungkhawm henla, kholkhawm hen. 36Kial ziak a gam a manlouhna ding in, buh kial kum, kum sagih Aigupta gam a hongtun hun a ding in hiai gam adia kiginkholhna ahi ding” a chi hi.

Joseph Aigupta Ukpa A Bawl Ahi

37Huai thu Pharo leh a sikha tengteng in hoih a saklam tak uh ahi. 38Pharo in a sikhate kiang ah, “Hichibang Pathian kha omna mi i muzou ding ua hia?” a chi hi.

39Pharo mah in Joseph kiang ah, “Pathian in hiai tengteng hon theihsak ziak in, nang bang a tei leh pil himhim a omkei uhi. 40Nang ka inn kawte tung ah heutu in na om ding a, ka khua leh tui tengteng na thu bangzel in a om ding uh. mangtutphah a tut thu ah kia nang sang in ka lianzaw ding” a chi hi. 41Pharo mah in Joseph kiang ah, “En in, Aigupta gam tengteng tung ah heutu in k’on bawl hi” a chi hi. 42Pharo in a khut a kipan a min sawnna zungbuh a tolkhia a, Joseph khut ah a bunsak a, puanmalngat a bawl puansilhte a silhsak a, a ngawng ah dangkaeng khainiang a oksak hi. 43A kangtalai neih nihna ah a tuangsak a; a ma ah khukdin un, chi’n, mi a kikousak hi. Huchi in, Aigupta gam tengteng tung ah heutu in a bawlta hi. 44Pharo in Joseph kiang ah, “Kei Pharo ka hi, na thu lou in Aigupta gamsung tengteng ah kuamah in a khut uh hiam, a khe uh hiam a likkei ding” a chi hi. 45Pharo in Joseph min Zaphnath paneah a sa a; On khaw siampu Potipher tanu Asenath a zi ding in a pia hi. Joseph a pawt a, Aigupta gam a siksuak hi. 46Joseph Aigupta gam kumpipa Pharo ma a a dinlai in kum sawmthum a upa ahi. Joseph Pharo a kipan a pawt a, Aigupta gam tengteng a siksuak hi. 47Hauh kum, kum sagih sung, lei in buh tampi a tungsak hi. 48Aigupta gam a hauh kum, kum sagih a hongtung a, buh tengteng a dongkhawm a, huai buhte khuate ah a sungkhawmta hi. A kim a om khochih lou a buhte a sungkhawm chiat hi. 49Joseph in buh tampi tuipi piaunel zah bang in a sungkhawm venvon a, a sim leng a tawphial hi; simzoh vuallouh ahihtak ziak in.

50Kial hongtun ma in Joseph in tapa nih a nei a, huaite On khaw siampu Potipher tanu Asenath in a neihsakte ahi uhi. 51Joseph in a tapa masa min Manasseh a sa a; “Pathian in ka sepgimna leh ka pa inn sung mite tengteng a hon mangngilh sakta” a chi hi. 52A tapa nihna min Ephraim a sa a; “Pathian in ka gimthuakna gam ah chi a hon suangsakta” a chi hi.

53Hauh kum, kum sagih Aigupta gam a hongtung a beita hi. 54Kial kum, kum sagih ding, Joseph gen bang in a hongtung panta hi. Gamchih ah kial a hong keta a; Aigupta gamsung teng ah bel nekding a om hi. 55Aigupta gam a mi tengteng a kial tak un, Pharo kiang ah nekding ngen in a kikou uhi. Pharo in Aigupta mite kiang ah, Joseph kiang ah hoh unla; na kiang ua a gen peuhmah hih un, a chi hi. 56Leitung pumpi ah kial a keta hi. Joseph in sunkhawmna buhinte a hong a, Aigupta gam ah leng kial a nakkiak mahmah hi. 57Leitung pumpi a kial a nakkiak ziak in gamchih a mite buh lei ding in Aigupta gam ah Joseph kiang ah a hongzel uhi.

Currently Selected:

GENESIS 41: PAITBSI

Highlight

Copy