GENESIS 40

Joseph In Hentate Mang Letkhia

1Huan, huai thilkhit in hichi ahi a, Aigupta kumpipa uain pepa leh a tanghou bawlpa’n a pu uh Aigupta kumpipa a lungkim sakkei uhi. 2Pharo a sikha heutu nihte tung ah, a uain pia heutupen tung ah leh a tanghou bawl heutupen tung ah a hehta hi. 3Huchi in vengmi pawl heutu inn ah, suangkulh, Joseph hen a a omna ah, a tangsakta hi. 4Vengmi pawl heutu in amau Joseph a kemsak a, amau a na a sepsak ua, ni bangzah hiam tak a tang uhi.

5Suangkulh a hen a om, Aigupta kumpipa uain pepa leh tanghou bawlpa in zan khat mangkhiakna tuam tuak a nei uhi. 6A zing in Joseph a kiang uah a valut a, amau a hong mu ua, ngai in, a na lungkham mahmah uhi. 7Aman, “Bangchi na hi ua, tuni in lungkham mel paw natel u chia?” chi’n Pharo sikha heutu suangkulh a tangte a dong hi.

8Amau a kiang ah, “Mang ka neituak ua, hon hilhchiansak thei kuamah lah a om ngalkei a ahi” a chi uh. Joseph in a kiang uah, “Mang hilhchetnate Pathian a ahi ka hia? Hehpih in na a mang uh honhilh un” a chi hi.

9Huchi in, uain pia heutupen in a mang Joseph a hilh a, a kiang ah, “Ngai dih, ka mang in, ka ma ah grepgui a hongom hi. 10Grepgui ah ka thum a om a, a hong selnou ua, a hongpak ua, a pakbomte’n grep minte a hon omsak uhi. 11Pharo nou ka khut ah a hongom a; grep gahte ka lou a, Pharo nousung ah ka suk a, huai nou Pharo khut ah ka na pia” a chi hi.

12Joseph in a kiang ah, a hilhchetna hiai ahi. “Ka thumte ni thum ahi. 13Tu a kipan ni thum in Pharo in na lutang a domkang ding a, nna nasep mah a hon semsak nawn ding. A uain pepa na hihlai a, na piak ngeina bang in Pharo nou a khut ah na pe nawn ding. 14Himahleh na hong hamphat chiang in hon theigige inla, hehpih in hehpihna ka tung ah hon kilang sak inla, Pharo kiang ah ka tungtang hon gen inla, hiai in a kipan hon pikhia in. 15Hebrute gam a kipan mi’n a guk a, a hon gukmang uh ka hi a; hiai gam ah leng khuksunga a hon khumna ding in bangmah ka hih khial kei” a chi hi.

16Tanghou bawlpa in hilhchetna a hoih chih a theih in, Joseph kiang ah, “Ken leng mang ka nei a, ngai in, lawhbeu thum ka lu in ka na pua hi. 17Lawhbeu tungnungpen ah Pharo an, tanghou bawlpa bawl, chichih a na om hi. Huaite vasate’n lawhbeu ka lu a ka puaka kipan a na ne souhsouh uh,” a chi hi.

18Joseph in a dawng a, “Hiai a hilhchetna ahi. Lawhbeu thum ni thum ahi. 19Tu a kipan ni thum in Pharo in na pumpi a kipan na lutang a dom kang dia, singdawn ah a khai ding. Huchi in, vasate’n na sa a ne souhsouh ding uh” a chi hi.

20Hichi ahi a, a ni thum ni, Pharo pian champha ni’n, aman a sikha tengteng ading in Ankuang a lui hi. A sikhate lak a uain pia heutupen lutang a domkangta hi. 21Uain pia heutu pen uain pemi mah in a pangsak nawn a; Pharo khut ah nou a peta hi. 22Himahleh Joseph in amau a hilhchet bangtak in, tanghou bawl heutupen a khailumta hi. 23Himahleh, uain pia heutu pen in Joseph a theigige kei a, a mangngilhta hi.

Currently Selected:

GENESIS 40: PAITBSI

Highlight

Copy