GENESIS 39

Joseph Leh Potiphar Zi

1Huan, Joseph Aigupta gam ah a pisuk ua; Pharo nuai a heutu khat, vengtu pawl heutu, Aigupta mi, Potiphar in a hon pisuk Ishmaelte khut a kipan a leita hi. 2Toupa Joseph kiang ah a om a, amah mi lohching tak ahi a; a pu Aigupta mi inn ah a om hi. 3A pu in, Toupa a kiang ah a om a, a thilhih peuhmah Toupa’n a khut ah a lohchingsak, chih a thei hi. 4Huchi in Joseph in a pu deihsakna a mu a, a inn ah nna a semzel hi. Aman a inkuante tung ah heutu in a bawl a, a neih tengteng a khut ah a koihvek hi. 5Hichi ahi a, a inn leh a neih tengteng tung a heutu dia a bawl nungsiah Joseph ziak in Toupa’n Aigupta mi inn sung a vualzawlta hi. Inn lam leh gam lam a a neih tengteng ah Toupa’n a vualzawl hi. 6Huchi in a neih tengteng Joseph khut ah a koih a, a neih teng, a annek kia lou ngal a theipih kei hi. Joseph pianhoih leh melhoih tak ahi. 7Huai nung in hichi ahi a, a pu zi in Joseph a ngaih et a; “Hon luppih in” a chi hi. 8Himahleh a utkei a, a pu zi kiang ah, “Ka pu in hiai inn ah ka kiang ah bangbang a om a chih lah a thei ngalkei a, a neih tengteng ka khut ah a koihvek hi. 9Hiai inn sung ah kei sang a lian zaw kuamah a omkei. A zi na hih ziak in nang kia loungal, kei a kipan bangmah it a neikei hi. Bangchi’n hiai khelhna liantak hih in Pathian tung ah thil ka hihkhial thei dia?” a chi hi. 10Hichi ahi a, niteng in Joseph houpih zel mah leh amah luppih lamthu hiam, amah kiang a om lamthu hiam a limsak nuam kei hi.

11Huchih lai in hichi ahi a, a nna sem ding in inn sung ah a va lut a; inn sung ah mi himhim kuamah a omkei hi. 12Huchi in aman, “Hon luppih in” chi in a puansilh in a na man a, aman a puansilh a khut a nusia in a taikhia hi.

13Hichi ahi a, a puansilh a khut a nusia in a taikhia, chih a theihtakin, 14A inn a mite a sam a, a kiang uah, “En un, hon zahlaksak ding in Hebru mi khat i kiang ua honpi eita ve. Hon luppih tum in ka kiang ah a honglut a, Huchi in ngaihtak in ka kikouta hi. 15Hichi ahi a, aw suah a ngaihtak a ka kikou a zaktak in hiai ka kiang ah a puansilh a nusia a, a taikheta” a chi hi.

16Joseph pu a hongtun masiah a puansilh a kiang ah a na koih gige hi. 17A kiang ah hiai thu a na gen a, “Hebru sikha i kiang a na honpi in hon zahlaksak tum in ka kiang ah a honglut hi. 18Hichi ahi a, aw suah a ka kikou tak in hiai a puansilh ka kiang a nusia in a taikheta” a chi hi.

19Hichi ahi a, Joseph pu in a zi in a kiang a, “Na sikha in hichi’n a honbawl” chi a, a thugen a zak in, a hehna a kuang hi. 20Huchi in, Joseph pu in amah a pi a, suangkulh, kumpi suangkulhtangte khumna mun ah a khum a; huchi in suangkulh ah a omta hi. 21Himahleh Toupa Joseph kiang ah a om a, a tung ah a zahngai a, suangkulh vengmi a hehpih sak hi. 22Huchi in, suangkulh vengmi in suangkulh a tang tengteng Joseph khut ah a kemsakta hi. Huchi in, huai a, a hih peuhmah uh Joseph hih ahi. 23Toupa Joseph kiang ah a om a, a thilhih peuhmah Toupa’n a lohchin sak ziak in suangkulh vengmi in a khut a thil om himhim a enta kei hi.

Currently Selected:

GENESIS 39: PAITBSI

Highlight

Copy