लूकस 6
6
येसुस गे ख़न्न ऎख़ना उल्ला ही मइय्याँ अदिया र'ई
(मत्ता 12:1-8; मर 2:23-28)
1ओन ख़न्न ऎख़ना उल्ला नू येसुस ख़ल्ल गुट्ठी नू मन्नुम कालियस, अरा तंग्है चेलर बालन तोंखा तोंखा ख़ेक्खा ती रमद'आ रमद'आ मोक्खर।#व्य 23:25 2ख़ने जोक्को फरिसीर बाचर, “नीम एन्ने नलख एन्देरगे नन्दर एकदा ख़न्न ऎख़ना उल्ला ही नॆग ही बिड़दो र'ई?” 3अरा येसुस आरिन किर्त'अर बाचस, “नीम नेम्हा पुथी नू एन्देर पढ़चकर सुरता मल नन्दर का? इकला दाऊद बॆलस अरा तंग्है संगेर कीड़ा रहचर, ख़ने आस एन्देर नंजस?#1सामु 21:1-6 4आस धर्मेसी एड़पा नू कालरकी नैगस धर्मेस गे दाँड़े नंजका असमन होच्चस ती मोक्खस, अरा तंग्है संगेर गे हूँ चिच्चस, एकदन मॊख़ना मूसासी पॆसका नू नैगारिन अम्बरकी नॆका हूँ नॆग मल्ला।”#लौव्य 24:9 5अरा येसुस आरिन बाचस, “मनवा ख़द्दन एंगा हूँ एंग्है गने चॊंख़्र'उर गे ख़न्न ऎख़ना उल्ला नू एन्देर एन्देर नन्ना र'ई, अदही फैसला नना गे अदिया र'ई।”
येसुस ख़ैका ख़ेक्खा आलासिन कोड़े नन्दस
(मत्ता 12:9-14; मर 3:1-6)
6अउर ओन्टा ख़न्न ऎख़ना उल्ला नू येसुस गोड़हा एड़पा नू केरस ती सिखाब'आ हेलरस, अरा असन ओन्टा आलस रहचस आसी तीना ख़ेक्खा ख़ैकी रहचा। 7जोक्को फरिसीर अरा नॆग सिखाब'उर आसिन बदी ठेकाब'अना ही ताक नू मोका बेद्दना नू रहचर, का आस ख़न्न ऎख़ना उल्ला नू कोड़े नन्दस का मला। 8लिकिन आस आर ही जिया ता कत्थन अख़'आ लगियस। औंगे आस आ ख़ैका ख़ेक्खा आलासिन बाचस, “चो'आ ओर्मर ही मुन्दहारे इज'आ।” अरा आस इज्जस केरस। 9तहाँ येसुस आरिन बाचस, “ऎन निमन मेन्दन, ख़न्न ऎख़ना उल्ला नू मूसासी पॆसका लेक्खा एन्देर नन्ना बॆस हिके, दौ नन्ना का मलदौ नन्ना, नॆकअनिम कोड़े नन्ना ती आसिन बछाब'अना का कोड़े मल नन्ना ती आसिन खे'आ चि'अना?” 10ख़ने आस चरियो तरा आर ओर्मारिन ईरीयस ती आ आलासिन बाचस, “निंग्है ख़ेक्खन लमाब'आ।” आस अन्नेम नंजस अरा आसी ख़ेक्खा कोड़े मंज ख़च्चिया। 11ख़ने आर नगदे जंगारर ती तम्है मझी नू सलहा मना हेलरर का नाम येसुसी बिड़दो नू एन्देर ननोत।
तइरकर ही चाजना
(मत्ता 10:1-4; मर 3:13-19)
12अबड़ा उल्ला नू आस ओन्टा टुंगरी मइय्याँ गोहरार'आ केरस, अरा धर्मेस ती गोहरारना नू गोट्टा माख़ा पहा बाचस। 13अरा बिज्जिया ख़ने आस तंग्है चेलारिन मीख़ियस अरा आर ही ती बारा गोटंग आलारिन चज्जियस अरा आर गे तइरकर नामे चिच्चस। 14आर ईर हिकनर,
सिमॊन आसी नामे येसुस पतरस पिंजियस
अरा आसी भइय्योस अन्द्रेयस
अरा याकॊब
अरा आसी भइय्योस यॊहन
अरा फिलिप्पोस
अरा बरतोलोमैस
15अरा मत्तायोस
अरा तॊमस
अरा हलफैसी तंग्दस याकॊब
अरा यहूदीर ही छछिन्द सैना ता सिमॊन
16अरा याकॊबसी तंग्दस यूदस
अरा यूदस इसकारियॊत एकास ख़ॊख़ा येसुसिन धरताचस।
येसुस आलारिन सिखाब'अदस अरा कोड़े नन्दस
(मत्ता 4:23-25)
17तहाँ येसुस तंग्है बारा चेलर गने टुंगरी ती इत्तियस ती टोंका अड्डा नू इज्जस। आसी चेलर ही ओन्टा कोहाँ गोंहड़ा असन रहचा। अरा येरुसलॆम नगरे अरा यूदेया जिला ही नन्ना अड्डा अरा समुदर पिंडी ता नगरे तुरोस अरा सीदॊन ती बरचका ओन्टा कोहाँ गोंहड़ा हूँ असन रहचा। 18ईर आस ती मेना गे अरा तम्है रोगे ती उजगार'आ गे आसी गुसन बरचका रहचर। अरा नॆ मलदौ बॊलता गुट्ठी ती सतारका रहचर आरिन आस कोड़े नंजस। 19ओर्मर आसिन एंसड़'आ बेद्दा लगियर, एन्देरगेका आसी ती सवंग उरखरकी ओर्मारिन कोड़े ननालिया।
आसीस अरा भखना
(मत्ता 5:1-12)
20ख़ने येसुस तंग्हा चेलर तरा किर्रे ईरीयस ती बाचस,
“अना मलकारो धर्मेस निम्हा ती खुसमारदस,
एन्देरगेका धर्मेसी राजी निम्है दिम हवे।
21अक्कुन कीड़ा सार'उरो निम्हा ती धर्मेस खुसमारदस
नीम गा उड़तार'ओर।
अक्कुन चींख़ू आलारो
नीम गा अलखोर।
22मनवा ख़द्दस चड्डे आलर निमन छिंडोर अरा निमन अम्बोर चि'ओर अरा निमन हींड़'ओर अरा निम्है नामेन मलदौ ब'ओर ती खंडोर चि'ओर होले धर्मेस निम्हा ती खुसमार'ओस।#1पत 4:14 23आर इबड़न नन्नर ख़ने नीम खुसमार'अरकी रिझ्र'आ, एन्देरगेका मेर्ख़ा नू निमा ख़क्ख्र'ऊ इनाम कोहाँ र'ई। सुरता नना का आर ही पूरखर हूँ धर्मेसी कत्था तिंगुर गने एन्नेम ननालियर।#2इति 36:16; तइ 7:52
24लिकिन ओहरे नीम उरुब आलारो,
नीम गा निम्है उर्मी सुक्खे अरा रिझ ख़क्खा ख़चकर।
25ओहरे नीम अक्कु उड़तारका र'ऊ आलारो,
नीम गा कीड़ा सार'ओर।
ओहरे नीम अक्कु अलखू आलारो,
नीम गा दुक्खे सार'ओर अरा चींख़ोर।
26ओहरे निमन इकला ओर्मा आलर सहरारनर,
एन्देरगेका आर ही पूरखर हूँ ठक'ऊ धर्मेसी कत्था तिंगुर गने एन्नेम नना लगियर।
बैरिर गने चोन्हा
(मत्ता 5:38-48; 7:12)
27लिकिन एंग्है मिनू आलर निमन ऎन ब'अदन का तम्है बैरीरिन चोन्हा नना। निमन छिंडुर गे दौ नना। 28निमन सर्प'उर गे आसीस चि'अके। निमन हींड़ुर गे बिन्ती ननके। 29निंगन हींड़'आ गे निंग्है ओन्टा गल्लेन थपड़'उस गे नन्ना गल्लेन हूँ ऎदके। निंग्है बर्कन बच्चुस गे निंग्है अंगन हूँ हो'आ गे अमके छेक'आ। 30निंग्है गुसन ने'ऊ ओर्मर गे चि'आ। अरा निंग्है जिनिसन हो'उस ती अदिन ख़क्खा गे आसिन ढेवा अमके नना। 31आलर एकासे निमन नना नीम बेद्ददर, अन्नेम नीम आर गे नना।#मत्ता 7:12 32नीम तम्है चोन्हा ननुर ती लेका चोन्हा नन्दर होले धर्मेस ती एन्देर इनाम ख़क्ख'ओर? पपहर हूँ गा तम्है चोन्हा ननुरिन चोन्हा नन्नर। 33नीम तम्है दौ ननुर गने लेका दौ नन्दर होले एन्देर नफा मनो? पपहर हूँ गा अन्नेम नन्नर। 34नीम नहड़ा किर्त'अर चि'ओर ब'अरकी असरा ती नहड़ा चि'अदर होले नीम एन्देर इनाम धर्मेस ती ख़क्खोर? पपहर हूँ गा पपहर गे नहड़ा चि'अनर का फिन अउन्दम ख़क्खोम। 35औंगे अपन बैरीरिन चोन्हा नना अरा आर गे दौ नना। अरा ख़क्खना ही असरा मल ननरकी नहड़ा चि'आ। होले निमा गे बग्गे इनाम ख़क्ख्र'ओ, अरा नीम उर्मी ती मेच्छा नू र'ऊ धर्मेसी ख़द्दर लेक्खा मनोर। सुरता ननके का धर्मेस गा धन्यबाद मल नन्नुर अरा मलदौ आलर मइय्याँ हूँ सोग्गे ऎरदस। 36एकासे निम्है मेर्ख़ा ता बंगस निमन सोग्गे ईरू र'अदस अन्नेम नीम हूँ सोग्गे ईरू मना।
बदी अमा नना
(मत्ता 7:1-5)
37नीम नन्नारिन नेंवई अमा नना, होले नीम हूँ धर्मेस ती नेंवई मल नन्तार'ओर। नीम नन्नारिन बदी अमा टिड़'आ, होले नीम हूँ धर्मेस ती बदी मल टिड़तार'ओर। नीन नन्नर ही गुन्हन अम्बदय होले निम्है गुन्हा हूँ धर्मेस ती अम्बतार'ओ। 38चि'आ, होले निमा हूँ धर्मेस ती चीतार'ओ। धर्मेस निमा गे अरबा अरबा अरा नुकुच नुकच अरा बीजरना बेसे दौ जोखना ती निम्है कोरा नू चि'ओस। नीम एका जोखना ती जोख'ओर आ जोखना तिम निमा गे हूँ धर्मेस ती जोखतार'ओ।”
39येसुस ओन्टा जोक्खा ख़ीरी तिंगियस: “अन्धहस अन्धहासिन डहरे ऎद'आ ओंगोस का? मला। एन्ने ननोस होले इरबारिम गड्डी नू खत्र'ओर।#मत्ता 15:14 40चेलस तंग्है गुरुस ती कोहाँ मलदस। लिकिन एकास पखड़ मनोस आस गुरुस लेक्खा मनोस।#मत्ता 10:24,25; 13:16; 15:20 41नीन निंग्है ख़न्न ता चइलन मल थिथाब'अदय, लिकिन निंग्है भईसी ख़न्न ता कंटेन एन्देरगे ऎरदय? 42नीन निंग्है ख़न्न ता चइलन मल थिथाब'अदय ती निंग्है भईसिन ब'अदय, अना भई, ऎन निंग्है ख़न्न ता कंटेन ओथ्र'ओन चि'ओन, एन्ने एन्देरगे ब'अदय? अना उतुरमाड़ू, मुन्द निंग्है ख़न्न ता चइलन ओथ्र'आ, होले नीन निंग्है भईसी ख़न्न ता कंटेन ओथ्र'आ गे फरीफरी ऎरा ओंगोय।
एकन्ने मन्न अन्नेम ख़ंजपा
(मत्ता 7:17-20; 12:33-35)
43बने मन्न चिम्मो मल ख़ंज'ई, अरा पयहा मन्न ठोस ख़ंजपा मल ख़ंज'ई। 44उर्मी मन्न तंग्है तंग्है ख़ंजपा ती चिन्हर'ई, एन्देरगेका ख़ोप्पा ती अंजीर मल चोख़नर, अरा अच्च-ख़ोप्पा ती अंगुर मल चोख़नर।#मत्ता 12:33 45अन्नेम दौ आलस तंग्है दौ जिया ही दौ कुट्ठी ती दौ नलखन नन्दस, अरा मलदौ आलस तंग्है जिया ही मलदौ कुट्ठी ती मलदौ नलखन नन्दस। एन्देरगेका जिया नू एन्द्रा निन्दकी र'ई आदिम बई ती उरखी।#मत्ता 12:34
ऎंड़ मदहे एड़पा कम'ऊ आलर
(मत्ता 7:24-27)
46नीम एंग्है ब'अनन मल पॆस्रदर, होले हूँ एंगन अना उर्बायो, अना उर्बायो, एन्देरगे ब'अदर? 47एका ओर्तर एंग्है गुसन बरनर अरा एंग्है कत्थन मेन्नर ती अदिन अन्नेम नन्नर। ऎन निमन तेंग्गोन का आर नॆख'आ बेसे र'अनर। 48आर आसी बेसे र'अनर का एकास गड्डी अरख़ियस ती चचड़ी नू नेव नंजस ती एड़पा कमदस। बहड़ी बरचा ख़ने आ एड़पा नू लग्गिया लिकिन आद अदिन नुक'आ पोल्ला। एन्देरगेका आद चचड़ी नू नेव कमचका रहचा। 49लिकिन एका ओर्तर एंग्है कत्थन मेन्नर ती अदिन अन्नेम मल नन्नर। आर आसी बेसे र'अनर का एकास धूली नू बिगर नेव ही एड़पा कमचस। बहड़ी आ एड़पा नू लग्गिया ख़ने लॆम आद खत्तरा ती छित्ती छान मंजा केरा।”
Currently Selected:
लूकस 6: KURUXBSI
Highlight
Share
Copy
Want to have your highlights saved across all your devices? Sign up or sign in
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
