लू‍कस 5

पहिल चेलासी मॆख़तारना

(मत्ता 4:18-22; मर 1:16-20)

1उन्‍दुल येसुस गेन्नॆसरेत समुदर#5:1 ईद गलिलेया समुदर एन्ने हूँ बार'ई। ही पिंडी नू इज्जकाचस। आ बारी ओन्‍टा गोंहड़ा धर्मेसी कत्‍था मेना गे खतरना चो'अना बेसे आसी हेद्दे बर'आलिया। 2ख़ने आस समुदर ही पिंडी नू ऎंड़ गोट डोंगा इज्‍जका ईरयस। केंवटर अइय्या ती इत्तियर ती जल्‍ली गुट्ठिन नॊड़ालियर। 3येसुस अबड़ा डोंगा गुट्ठी ती ओन्‍टा नू अरगियस एकदा सिमॊनसी रहचा। अरा आसिन बाचस का पिंडी ती कटिक गुछा ब'आ। तहाँ येसुस डोंगा नू उक्‍कियस ती आलारिन सिखाब'आ हेलरस।#मत्ता 13:1,2; मर 3:9,10; 4:1

4एकाबारी आस तेंगा मुंजियस तहाँ सिमॊनसिन बाचस, “डोंगन ख़ोड़ख़ा नू हो'आ, अरा इंजो ल'आ गे जल्‍ली हेबड़ा।”

5सिमॊनस आसिन किर्त'अर बाचस, “अना उर्बायो, ऎम गोट्टा माख़ा लौच ईरकम, लिकिन एन्‍द्रा हूँ मल ख़क्‍खकम, अन्नु हूँ निंग्‍है ब'अना लेक्‍खा जल्‍ली हेबड़दन।”#यॊ 21:3 6एकाबारी आर एन्ने नंजर ख़ने नगदे इंजो ख़ोंड़चर ओन्‍द्रर का आर ही जल्‍ली चर्र'आ हेलरा।#यॊ 21:6 7ख़ने आर तंग्‍है संगेरिन नॆ नन्ना डोंगा नू रहचर आरिन ख़ेक्खा ती मीख़ियर का बर'अरकी एमन सहाड़ा नना। अरा आर बरचर ती दुयो डोंगा नू निन्‍दर का डोंगा मुलख़ा बेद्दालिया।

8सिमॊन पतरस इदिन ईरयस ती येसुसी ख़ेडमूली खत्तरस ती बाचस, “अना उर्बायो, एंग्‍है गुसले कला, एन्‍देरगेका ऎन पपहा आलन हिकदन, अरा निंग्‍है जॊगे मलकन।” 9एन्‍देरगेका एन्ने बग्‍गे इंजो बज्झरा, ख़ने आस गे अरा आसी गने नॆ नॆ रहचर आर गे नगदे अकबक मंजा। 10सिमॊनसी संगे नलख ननू जेबदयुसी तंग्‍दस याकॊब अरा यॊहनस हूँ अकबक मंजर। ख़ने येसुस सिमॊनसिन बाचस, “अमा एल्चा, नीन अक्‍कु ती एंग्‍है तरा आलारिन ओन्‍द्रना ही नलख ननोय।” 11अरा आर डोंगन पिंडी नू ओन्‍द्रर बरचर, अरा जम्मा जातन अम्‍बियर ती येसुस गने चॊंख़्रर।

येसुस खसरा रोगियासिन कोड़े नन्‍दस

(मत्ता 8:1-4; मर 1:40-45)

12येसुस ओन्‍टा पद्दा नू बरचस, असन ओन्‍टा कुड़गा खादी ती लिन्‍डरका आलस रहचस। एकाबारी आ आलस येसुसिन ईरयस ख़ने आस ख़ोलख़रस ती खत्तरस ती गोहरारस, “अना उर्बायो, एंगन कोड़े ननम चि'आ, ऎन गा अख़दन का निंग्‍है मने र'ई होले, नीन एंगन कोड़े नना ओंग्‍दय।”

13येसुस ख़ेक्खा ती आसिन ऎंसड़स#5:13 यहूदी आलर तम्‍है नॆग ही लेक्‍खा आर कुड़गा खादी आलारिन मल ऎंसड़'ओर। लिकिन येसुस आ नॆगन मन्ना गे मने मल नंजस। ती बाचस, “एंग्‍है मने र'ई का नीन कोड़े मना कला।” आ बारिम आसी खसरा रोगे कोड़े मंजा केरा। 14ख़ने येसुस आसिन बाचस, “नॆखा ती हूँ ई पत्त नू अक्‍कुन अमके तेंगा, लिकिन कला अरा निंगन नैगासिन ऎद'आ, औंगे आस निंगन जांच'ओस का खसरा रोगे निंग्‍है ती बोंगा केरा, अरा निंग्‍है सफा मन्ना ही पत्त नू मूसस एन्‍देर दाँड़े अरग'आ गे आनकादस, अदिन दाँड़े चि'आ। ईद आलर गे गोवाह मनो का नीन सफा मन्‍तारकादय।”#लौव्य 14:1-32

15लिकिन येसुसी पत्त ता कत्‍था अउर हूँ बीड़रा केरा। अरा गोंहड़ा गोंहड़ा येसुस ती मेना गे अरा तम्‍है बेमार ती उजगार'आ गे ख़ोड़रा। 16लिकिन येसुस उछिन्‍द अड्डा नू कालरकी बिन्‍ती नना लगियस।

येसुस लकवा बेमरहासिन कोड़े नन्‍दस

(मत्ता 9:1-8; मर 2:1-12)

17उन्‍दुल येसुसी सिखाब'अना बेड़ा फरिसीर#5:17 फरिसीर यहूदी ही समाज ता ओन यहूदी धरम खोंड़हा, नॆ मूसासी पॆसका, अरा मल लिखचका पुरखोती नॆग आबोन ख़ापुर। अरा नॆग सिखाब'उर असन उक्‍का रहचर। एकाबड़र गलिलेया जिला ही बग्‍गे पद्दा गुट्ठी ती अरा येरुसलॆम ती अरा यूदेया जिला ही नन्ना पद्दा ती बरचका रहचर। अरा कोड़े नना गे धर्मेसी सवंग येसुस गने रहचा। 18आ बारी जोक्‍क आलर ओन्‍टा लकवा बेमरहासिन खटी नू ओन्‍द्रर, अरा आर आसिन भितरी हो'अना ही अरा येसुसी मुन्‍दहारे उइय्‍ना ही चिताबुता नंजी ईरियर। 19लिकिन बग्‍गे गोंहड़ा ही चड्डे भितरी हो'आ पोल्‍लर, ख़ने आर मेसगा नू अरगियर ती जोक्‍क खपरन ताड़चर ती आसिन खटी रांगे येसुसी मुन्‍दहारे एत्ताचर चिच्‍चर। 20येसुस आर ही पत्त'अनन ईरयस ती बाचस, “अना आलायो, ऎन निंग्‍है पाप गुट्ठिन छमा नन्‍दन।”

21ख़ने नॆग सिखाब'उर अरा फरिसीर ताम ताम नू कछनख्र'आ हेलरर, “ईस नॆ तंग्‍है? ई आलस धर्मेसिन निंदा नन्‍दस। धर्मेसिन अम्‍बर नॆ पाप गुट्ठिन छमा नना ओंगोर?”

22लिकिन येसुस आर ही जिया ता कत्‍थन अक्‍खस ती आरिन बाचस, “नीम निम्‍है जिया नू एन्‍देरगे सोच'आलदर? 23‘निंग्‍है पाप छमा नन्‍तार'ई’ एन्ने ब'अना ‘चो'आ अरा कुद्दा ‍नुंगा’ एन्ने ब'अना ती सेब्‍बा हवे। एन्‍देरगेका आलर कोड़े मन्नन ऎरा ओंग्‍नर, लिकिन पाप छमा मन्नन ऎरा पोलनर। 24लिकिन ऎन ई आलासिन कोड़े नन्ना ती निमन ऎद'ओन का एंगा, मनवा ख़द्दन गे आलर ही पाप गुट्ठिन छमा नना गे हूँ ख़ॆख़ेल नू आकुस र'ई।” ख़ने आस लकवा बेमरहासिन आनियस, “ऎन निंगन ब'अदन, ‘चो'आ, निंग्‍है खटिन चेड़'अरकी एड़पा कला।’” 25आ आलस ओर्मर ही ऎथ्रना नू लॆम चॊचस, अरा एका खटी नू चूतकाचस अदिन चेड्डस ती धर्मेस गे ओहमा नन्नुम ईकनुम एड़पा केरस। 26ओर्मर अनचकरर केरर, अरा आर धर्मेसिन ओहमा नंजर अरा बग्‍गे इल्‍चनुम बाचर, “नाम इन्ना अकबक नलख गुट्ठिन ईरका र'अदत।”

लेबीसी मॆख़तारना

(मत्ता 9:9-13; मर 2:13-17)

27इदही ख़ॊख़ा येसुस बहरी उरखस अरा लेवी नामे ओन्‍टा मालगुजारी ऊज'उसिन मालगुजारी ऊज'ऊ एड़पा नू उक्‍का ईरियस। अरा येसुस आसिन बाचस, “एंग्‍है गने चॊंख़्र'आ।” 28होले आस जम्मा जातन अम्‍बियस ती चॊचस अरा आसी गने चॊंख़्रस।

29तहाँ लेवीस तंग्‍है एड़पा नू येसुस गे ओन्‍टा कोहाँ मदी चिच्‍चस। अरा असन बग्‍गे मालगुजारी ऊज'उर अरा नन्ना आलर हूँ आर गने मंडी ओना उक्‍का रहचर। 30ख़ने फरिसीर अरा नॆग सिखाब'उर आसी चेलारिन कुटमुटर'आ हेलरर ती बाचर, “नीम मालगुजारी ऊज'उर अरा पपहर गने एन्‍देर गे ओन्‍दर मॊख़दर?”#लूक 15:1,2

31येसुस आरिन किर्त'अर बाचस, “कोड़े दौ आलर गे बैधसी चाड़ मल्‍ला, लिकिन बेमरहर गे र'ई। 32अन्नेम ऎन नॆ तमन उजगो सोचनर आर गे म‍ला नॆ तमन पपहा बुझुरनर आरिन जियन किर्त'आ गे एड़'आ बरचका र'अदन।”

उपास नन्ना ही पत्त नू मेन्ना

(मत्ता 9:14-17; मर 2:18-22)

33फिन आर येसुसिन मेंजर, “यॊहनसी चेलर गा खनिम खनिम उपास नन्नर अरा गोहरारनर, अरा अन्नेम फरिसीर ही चेलर हूँ नन्नर। लिकिन निंग्‍है चेलर गा ओन्नर मॊख़नर।” 34येसुस आरिन बाचस, “नीम एका गूटी बेंजा जॊंख़स बरतियर गने र'अदस आरिन उपास नन्‍त'आ ओंग्‍दर का? 35लिकिन बेंजा जॊंख़स आर ती होत'अरना बेड़ा बर'ओ, अबड़ा उल्‍ला गुट्ठी नू आर उपास ननोर।”

36आस ऎनोटा जोक्‍खा ख़ीरी हूँ आरिन तिंगियस, “नॆ हूँ पुना किचरी ती ओन्‍टा कुटका चर्रनर ती पच्चा किचरी नू मल सट‍ई तुन‍ई, अन्‍ने आस नन्‍दस होले पुना एटर'ओ कालो अरा आद पच्चा गने मेल मल मॊख़ो। 37अरा नॆ हूँ पुना अंगुर रासी आबोन चपटा ही पच्चा कुड़वा नू मल निन्‍ददस उइय्‍दस, अन्ने नन्दस होले, पुना अंगुर रासी अमचूर मनो ती चपटा ही कुड़वन पलको चि'ओ, अरा अंगुर रासी बाह'ओ क'ओ अरा चपटा ही कुड़वा नठार'ओ क'ओ। 38औंगे पुना अंगुर रासी आबोन चपटा ही पुना कुड़वा नू निन्‍दना उइय्‍ना मनो। 39अरा नॆ हूँ पच्चा अंगुर रासिन ओन्‍दस ती पुना मल बेद्ददस, एन्‍देरगेका आस ब‍'अदस का पच्चा दिम बॆस र'ई।”

Currently Selected:

लू‍कस 5: KURUXBSI

Highlight

Copy