लूकस 7
7
सौ सैनर ही मुद्धासी पत्त'अना
(मत्ता 8:5-13; यॊ 4:43-54)
1येसुस इबड़ा कत्थन आलर गे तेंगा मुंजियस ती कफरनहूम नगरे केरस। 2असन रोमी सौ सैनर ही मुद्धासी ओन्टा बॆस बने जॊंख़स रहचस। आस बेमार ती खे'आ बेद्दा लगियस। 3आ सौ सैनर ही मुद्धस येसुसी हलन मेंजस ती यहूदी सेयान आलारिन आसी गुसन एन्ने ने'आ गे तइय्यस का आस बर'ओस ती एंग्है जॊंख़ासिन उजग'ओस। 4आर येसुस गुसन बरचर ती आसिन नगदे गोहरारर ती ब'आलियर, “नीन आस गे संगरा नना गे आस जॊगे र'अदस। 5एन्देरगेका आस नमन यहूदीरिन चोन्हा नन्दस, अरा एमा गे ओन्टा गोड़हा एड़पन कमचका र'अदस।” 6ख़ने येसुस आर ही गने केरस, लिकिन एड़पा अंड़सकम रहचस ख़ने, सौ सैनर ही मुद्धस तंग्है जोक्को संगेरिन आसी गुसन तेंगा गे तइय्यस, “अना उर्बायो, नीन दुक्खे अमा चॊद'आ, ऎन गा यहूदी मलना चड्डे ई जॊगे मलकन का नीन एंग्है एड़पा भितरी बर'ओय। 7अरा ऎन निंग्है हेद्दे बर'आ गे हूँ जॊगे मलकन, लिकिन ओन्टा कत्था लेका आना चि'आ होले एंग्है जॊंख़स उजगार'ओस। 8ऎन हूँ गा आकुस ही किइय्या ता आलन हिकदन अरा एंग्है आकुस किइय्या सैनर र'अनर। ऎन ओर्तोसिन ‘बरा’ ब'अदन होले आस बरदस अरा अउर नन्नासिन ‘कला’ ब'अदन होले आस कादस अरा एंग्है जॊंख़ासिन ‘नना’ ब'अदन होले आस नन्दस। ऎन पत्त'अदन का निंगा हूँ एन्ने आकुस र'ई।” 9येसुस इदिन मेंजस ती आसी पत्त नू अकबकरस। अरा आस तंग्है ख़ॊख़ा चॊंख़्र'ऊ गोंहड़ा आबोन ऎर'अरकी बाचस, “ऎन निमन ब'अदन का इस्राऎल नू हूँ एन्ने नन-यहूदीर ती एंग्है मइय्याँ पत्ताचका आलासिन ऎन मल ईरकन।” 10अरा तइय्का आलर एड़पा किर्रियर ती आ जॊंख़ासिन कोड़े मंजका ईरियर।
येसुस रड़ियाही ही ख़द्दासिन उज्जत'अदस
11अदही ख़ॊख़ा येसुस नाईन नामे ओन्टा नगरे नू केरस, आसी चेलर अरा कोहाँ गोंहड़ा आसी ख़ॊख़ा काला लगिया। 12आस नगरे ही फाटक गुसन अंड़सियस ख़ने, आलर ओन्टा केचका आलासिन चेड़'अरकी बहरी हो'आ लगियर। आस तंगियो ही ओन्टे लेका ख़द्दस रहचस। अरा आद रड़ीयाही रहचा। अरा आ नगरे ता ढ़ॆर आलर अदही गने रहचर। 13उर्बस अदिन ईरयस ख़ने आस गे अदही मइय्याँ सोग्गे लग्गिया, अरा अदिन बाचस, “अमय चींख़य।”, 14आस हेद्दे केरस ती सार आबोन एवंढरस#7:14 यहूदीर ही नॆग सार ही हेद्दे काला गे अरा एवंसड़'आ गे मल चि'ई। लिकिन येसुस अबड़ा नॆग नू चिहुट मल नंजस ती सार आबोन एवंसड़स।, ख़ने चिड़'ऊ आलर इज्जर केरर। अरा आस बाचस, “अना जॊंख़ायो, ऎन निंगन ब'अदन चो'आ।” 15ख़ने केचका आलस चॊचस, अरा ब'आ हेलरस। अरा येसुस आसिन तंगियो गे चिच्चस। 16ओर्मर गे इल्चका कोरचा केरा, अरा धर्मेसी ओहमा नंजर ती ब'आ लगियर, “नम्है मझी नू ओन्टा कोहाँ धर्मेसी कत्था तिंगुस बरचकादस, अरा धर्मेस तंग्है आलर मइय्याँ सोग्गे ईरकादस।” 17अरा येसुसी पत्त ता इबड़ा कत्था गोट्टा यूदेया जिला अरा अड्डे-बेड्डे ता उर्मी चक नू बींड़रा केरा।
येसुस अरा यॊहन नूड़रत'उस
(मत्ता 11:1-19)
18यॊहन नूड़रत'उस गे तंग्है चेलर येसुसी नंजका इबड़ा उर्मी कत्था ही हाल चिच्चर। ख़ने यॊहनस तंग्है ऎंड़ चेलारिन मीख़ियस, 19अरा येसुसिन इदिन मेना गे तइय्यस, “बर'ऊ मसीस#7:19 मसीस मने ‘धर्मेस तइय्योन एन्ने गच्छरका बॆलस।’ नीनिम हिकदय का महले एकअम नन्नारिन ऎम पाब ऎरोम का?”
20अबड़र येसुस गुसन बरचर ती आसिन बाचर, “यॊहन नूड़रत'उस एमन निंग्है गुसन इदिन मेना गे तइय्यस का, ‘बर'उस नीनिम हिकदय का, महले ऎम नन्नारिन पाब ऎरोम का?’” 21आ बेड़ा नुम येसुस कुदहा आलारिन बेमार अरा नुंजना गुट्ठी अरा मलदौ बॊलता गुट्ठी ती कोड़े ननालियस। अरा बग्गे अन्धहा आलारिन कोड़े नंजस। 22अरा येसुस आरिन बाचस, “नीम एन्देर एन्देर ईरकर अरा मेंजकर अदिन कला ती यॊहनसिन तेंगा चि'आ, अन्धहर ऎरनर अरा लेंगड़र ऎकनर अरा खसरा रोगियर सफा नन्तारनर अरा भइरा आलर मेनालनर अरा केचका आलर उज्जतारनर अरा कीड़र गे दौ कत्था तेंगतार'आ लगी।#यसा 35:5,6; 61:1 23अरा यॊहनसिन तेंगा, ‘एंग्है चड्डे एका ओर्तोस तंग्है पत्त'अना नू मल मूड़दस आस आसीस ख़क्खोस।’”
24यॊहनसी चेलर किर्रिम बिच्चियर अदही ख़ॊख़ा, येसुस यॊहनसी पत्त नू गोंहड़न ब'आ हेलरस, “नीम टोड़ंग नू एका बेसे आलासिन ऎरा केरका रहचकर? नॆखा सिखाब'अना ताका ती नुकुरना पोंड्रा बेसे र'ई आसिन का? 25महले एका बेसे आलासिन ऎरा केरका रहचकर? लेपलेपे किचरी अत्तका आलासिन का? मला, नॆ लेपलेपे किचरी अत्तनर आर बॆल एड़पा नू र'अनर। 26होले नीम एका बेसे आलासिन ऎरा केरका रहचकर? ओन्टा धर्मेसी कत्था तिंगुसिन का? हाँ, लिकिन ऎन निमन ब'अदन का यॊहन ओन्टा धर्मेसी कत्था तिंगुस ती कोहँस। 27ईसी पत्त नू नेम्हा पुथी नू एन्ने लिख्रकी र'ई,
‘ऎरा, ऎन एंग्है पैकासिन निंग्है ती मुन्द तइय्या लगदन,
आस निंग्है मुन्द निंगा गे डहरेन सपड़'ओस।’#मला 3:1
28ऎन निमन ब'अदन का जेतेक कुन्द्रका र'अनर, अबड़र नू यॊहनस ती कोहाँ नॆ हूँ मल्कर, लिकिन धर्मेसी राजी नू र'ऊ ओर्मर नू नॆ सन्नी ती सन्नी र'अदस, आस हूँ यॊहनस ती कोहाँ हिकदस।”
(29अरा ओर्मा आलर अरा मालगुजारी ऊज'उर हूँ येसुसी कत्थन मेंजर ख़ने, धर्मेसी कत्था मानिम ब'अरकी इंझ्रर। एन्देरगेका ईर मुन्द यॊहनस ती नॊड़रर। 30लिकिन फरिसीर अरा नॆग सिखाब'उर तमन यॊहनस ती नॊड़रत'आ गे मल चिच्चर, अदही चड्डे तमा गे धर्मेसी मने आबोन तरकूटी नंजर चिच्चर।)#मत्ता 21:32; लूक 3:12
31फिन येसुस बाचस, “नॆ यॊहनसी सिखाब'अना अरा एंग्है मेन्नर अबड़ा आलर ही पत्त नू तेंगदन। 32आर बजार नू बीचू खद्दर लेक्खा र'अनर, आर तम्है तम्है नू चिच्चियारनर ती ब'अनर का
‘ऎम निमा गे खुसमारना बंसरी ऊरचकम,
नीम मल नलकर,
ऎम भोकरारकम
नीम मल चींख़कर।’
33यॊहन नूड़रत'उस गा ओर्मर मॊख़ना ओन्ना-मॊख़ना लेक्खा मॊख़नुम अरा अंगुर रासी उन्नुम मल बरचकादस, लिकिन नीम ब'अदर का आसी मइय्याँ मलदौ बॊलता लक्की र'ई। 34अरा मनवा ख़द्दन ऎन बने उन्नुम मॊख़नुम बरचकादन। ख़ने नीम ब'अदर का ऎन पेट पोसा अरा उंखुस अरा मलगुजारी ऊज'उर अरा पपहर ही संगेन हवे। 35लिकिन एंग्है लूर मानिम ब'अरकी अदिन इंझरना ती नॆ ऎकनर आर ही उज्जना ओक्कना ती आद ईथर'ई।”
ओन्टा पपही मुक्का येसुसी ख़ेड्डेन नॊड़ना
36अक्कुन सिमॊन नामे ओन्टा फरिसीस येसुसिन तंग्है गुसन मंडी ओना गे मीख़ियस। ख़ने आस आ फरिसीसी एड़पा केरस अरा मंडी ओना गे उक्कियस। 37आ नगरे नू ओन्टा मलदौ मुक्का अक्खा का येसुस फरिसीसी एड़पा नू मंडी ओनालदस। होले आद नॆता पखना ही ओन्टा कुड़वा नू महमहरना इसुंगन ओन्द्रा बरचा। 38अरा येसुसी ख़ेड्डे गुसन ख़ॊख़ा इज्जा ती चींख़नुम, आसी ख़ेड्डेन ख़ंजलख़ो ती नूड़िया। अरा तंग्है कुक्कु ता चुट्टी ती चींचा हेलरा, अरा आसी ख़ेड्डेन घड़ी घड़ी चुंखिया ती अइय्या महमहरना इसुंगन नलबिया।#मत्ता 26:7; मर 14:3; यॊ 12:3
39येसुसिन मंडी ओना गे मीख़का आ फरिसीस तंग्है जिया नू सोच'आ हेलरस का, “ईस धर्मेसी कत्था तिंगुस रहचका होले अख़'ओस दने का आसिन ऎंसड़'आ लगी आद नॆ तंग्है अरा एकासे मुक्का हवे, अरा आद गा मलदौ आली हवे।” 40येसुस आसिन आना बिड़दस, “अना सिमॊन, एंगा निंगन ओन्टा कत्था ब'अना र'ई।” आस बाचस, “अना गुरु, ब'आ।” 41येसुस बाचस, “ओन्टा मड़वारीसी ऎंड़ आलर लगा मोक्का रहचर। ओर्तोस पाँच सौ अउर ओर्तोर पचास चांती ही ढिबा ही लगहर रहचर। 42आर गुसन लगन किर्त'आ गे एन्द्रा हूँ मल रहचा, ख़ने आस इरबर ही लगन अम्बियस चिच्चस। होले अबड़ा इरबर ती नॆ आसिन बग्गे चोन्हा ननो?” 43सिमॊनस आनाकिर्ताचस, “नॆखअय बग्गे लगा अम्बतार'आ केरा आसिम एन्ने सोचदन।” येसुस आसिन बाचस, “नीन ठौका बाचकय।”
44तहाँ येसुस आ मुक्का तरा ईरयस ती सिमॊनसिन बाचस, “ई मुक्कन नीन ऎरदय का? ऎन निंग्है एड़पा नू बरचकन, लिकिन नीन नम्है चाल लेक्खा एंगा एंग्है ख़ेड्डेन नॊंढ्र'आ गे अम्मु मल चिच्कय। लिकिन ईद एंग्है ख़ेड्डेन ख़ंजलख़ो ती नूड़िया अरा तंग्है चुट्टी ती चींचिया। 45नीन एंगन मल चुंखकय, लिकिन एकाबारी ती ऎन बरचकन आ बारी ती ईद एंग्है ख़ेड्डेन चोंखनन मल अम्बिया। 46नीन एंग्है कुक्कु नू इसुंग मल नलिबकय,#7:46 चुंगना, कुक्कु नू इसुंग नलब'अना हूँ आलर तंग्है एड़पा बर'ओ बारी मोंजरा नन्ना ही आर ही चाल हिके। लिकिन ईद एंग्है ख़ेड्डे नू महमहरना इसुंगन नलबिया। 47औंगे ऎन निंगन ब'अदन का इदही पाप बग्गे रहचा आद अम्बतारा केरा, एन्देरगेका ईद एंग्है मइय्याँ बग्गे चोन्हा नंजा। लिकिन नॆख'आ जुक्की अम्बतारा आर जुक्की चोन्हा नन्नर।” 48अरा येसुस आ मुक्कन बाचस, “निंग्है पाप अम्बतारा केरा।” 49ख़ने आसी गने मंडी ओना उक्काचर, आर ताम ताम नू बाचर का, “ईस नॆ तंग्है, पाप गुट्ठिन हूँ छमा नन्दस?” 50लिकिन आस आ मुक्कन बाचस, “नीन एंगन पत्ताचकय, औंगे धर्मेस निंगन नाड़ियस, कोड़े गने किर्रिम बि'अय।”
Currently Selected:
लूकस 7: KURUXBSI
Highlight
Share
Copy
Want to have your highlights saved across all your devices? Sign up or sign in
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
