लूकस 1
1
चिन्हा परछा
1ऎम पत्त'ऊ आलर ही मझी नू येसुसी नंजका नलखन लिख'आ गे बग्गे आलर मुन्द बरचर। 2एकदन ऒरे तिम इबड़ा कत्थन मेंजका आलर अरा धर्मेसी कत्थन तिंगू आलर एकासे ऎम पत्त'ऊ आलर गे तेंग्रा अन्नेम आर लिखचर। 3अना महोदय थेओफिलुस, ऎन हूँ अदन निंगा गे तरकूटी ती लिख'आ गे अंगेर नंजकन। ऒड़ तिम मंजका उर्मिन चिहुंक ती मेंजकन ख़ूजकन ती लिख'आलदन। 4इत्रु ती नीन अख़'ओय का निंगा गे सिखाबाचका कत्था गुट्ठी मानिम दिम हवे।
यॊहनसी कुन्द्रना ही मुन्द तेंग्ना
5यूदेया राजी ता बॆलस हॆरॊदॆसी परिया नू जकरियास नामे ओरोत नैगस रहचस। आस अबियास नैगासी गोंहड़ा ता रहचस, अरा आसी आली एलिसबेत हूँ आरॊन#1:5 आरॊन इस्राऎल आलर ही पहिल नैगस, अरा ईस मूसासी तंग्ड़िस। नैगासी बनस ता रहचा।#1इति 24:10 6आर इरबर धर्मेसी ऎरना नू उजगो रहचर, अरा उर्बासी उर्मी पॆसका अरा नॆग गुट्ठी नू बने ईकुर रहचर। 7लिकिन आर ही ख़द्द-ख़र्रा मल रहचर, एन्देरगेका एलिसबेत बंझली रहचा, अरा आर इरबर हूँ पच्चिका केरका रहचर।
8उन्दुल जकरियासी गोंहड़ा येरुसलॆम मन्दिर नू नलख ननू ऊसरी नू जकरियास हूँ धर्मेसी मुन्दहारे नैग नलख ननालियस। 9ख़ने नैगर ही चाल लेक्खा चिठी टिड्डर। ख़ने धर्मेसी मन्दिर नू उर्बासी नेम्हा अड्डा नू कालरकी धूप कुहड़'अना दाँड़ेन अरग'आ गे जकरियासी नामे नू चिठी उरखा। 10दाँड़े अरग'अना बेड़ा नू आस नेम्हा अड्डा नू कोरचस, अरा ऒड़ लग्गा गे ख़ॊंड़रका बग्गे आलर बहरी बिन्ती ननालियर।
11तहाँ आस गे ओन्टा उर्बासी पैकस गोड़हा ही तीना पक्खे इज्जका ऎथ्रस। 12जकरियास आसिन ऎर'अरकी अकबकरस अरा आस गे इल्चिक'आ कोरचा केरा। 13पैकस गा आसिन बाचस, “अना जकरियास अमा एल्चा, धर्मेस निंग्है गोहरारनन मेंजकादस। औंगे निंग्है आली एलिसबेत निंगा गे ओन्टा ख़द्दासिन नेब्बो, अरा नीन आसी नामे यॊहन पिंजके। 14निंगा खुसमारना अरा रिझ्रना मनो, अरा आसी कुन्द्रका ती बग्गेम आलर नगदे खुसमार'ओर। 15आस उर्बासी ऎरना नू कोहाँ आल मनोस। आस अंगुर रासी महले अउर नन्ना निसा मलम ओनोस। आस तंग्है अयंग ही ओदर तिम नेम्हा बॊलतस ती निन्द्रका र'ओस।#गन 6:3 16आस नगदे इस्राऎल आलारिन आर ही धर्मेस उर्बस तरा किर्त'ओस। 17आस धर्मेसी कत्था तिंगू एलियसी बॊलता अरा सवंग गने उर्बासी मुन्द ऎकोस, का अयंग बंग्गर ही जियन आर ही ख़द्दर तरा किर्त'ओस अरा पॆसका मल मिनू आलारिन उजगो ईकुर ही बुझुरना नू किर्त'ओस। एन्ने उर्बासी बरना गे जॊगे आलारिन सपड़'ओस।”#मला 4:5-6
18तहाँ जकरियास पैकासिन मेंजस, “ऎन पच्चिका र'अदन अरा एंग्है आली हूँ पच्चकी किरकी र'ई। होले ऎन इदन एकासे पत्त'ओन का ईद मनो?”
19ख़ने पैकस बाचस, “ऎन धर्मेसी छमहे नू इज्जका र'ऊ गबरिऎल हिकदन। ऎन निंग्है गने कछनख्र'आ गे अरा निंगन ई दौ कत्थन तेंगा गे तइरका र'अदन।#दानि 8:16; 9:21 20अक्कुन नीन गा एंग्है कत्था गुट्ठिन मल पत्ताचकय, औंगे इदही मन्ना उल्ला गूटी नीन कोन्दा र'ओय, अरा कछनख्र'आ पोल्लोय। लिकिन एंग्है बाचका कत्था तंग्है बेड़ा नू मनो।”
21बहरी नू आलर जकरियासी पाब ऎरालियर, अरा आर हैकटरर का आस धर्मेसी मन्दिर नू एन्ने घड़ही एन्देरगे ननालदस। 22आस बहरी उरखस ख़ने आर गने कछनख्र'आ पोल्लस। आस आरिन टेवाँ बा'आ हेलरस, ख़ने आर अक्खर का ईस धर्मेसी मन्दिर नू देखार ईरकादस। अरा आस कोन्दा मंजस केरस। 23इकला धर्मेसी मन्दिर नू आसी नैग नलख नन्ना ही हप्ता पूरचा, ख़ने आस तंग्है एड़पा किर्रिम बिच्चियस।
24इबड़ा उल्ला गुट्ठी ही ख़ॊख़ा आसी तंग्आली एलिसबेत ओत्थाऎख़ मंजा। आद पांच महिना गूटी तम्है एड़पा ती बहरी मल उरखा। एन्देरगेका आद इदन ब'ओ होले आलर अदही ब'अनन मल पत्त'ओर। 25आद तंग्है ती बाचा, “उर्बस दिम एंगा गे इदन नंजस। आलर नू एंग्है लज्जेन मेट'अरकी आस ई बेड़ा नू एंग्है मइय्याँ सोग्गे ईरियस।”
येसुसी कुन्द्रना ही मुन्द तेंग्ना
26एलिसबेत ही ओत्थाऎख़ मंजका ही छे महिना नू गलिलेया जिला ही नासरेत पद्दा नू धर्मेस गबरिऎल पैकासिन ओन्टा डिंडा पेल्लो हेद्दे तइय्यस। 27अदही यॊसॆफ नामे दाऊद बॆलासी बनस ता ओन्टा आलस गने पाही मंजकीचा। आ डिंडा पेल्लो ही नामे मरियम रहचा।#मत्ता 1:18 28मेर्ख़ा पैकस अदही हेद्दे केरस ती बाचस, “कोड़हे आसीस ख़क्खू निंगन ऎन मोंजरा नन्दन। उर्बस निंग्है गने र'अदस।”#1:28 जोक्को ख़ेक्खा ता लिख्रका पच्चा पुथी गुट्ठी नू “नीन मुक्कर नू तकदीर हिके” एन्ने जोड़रकी र'ई।
29मरियम गा पैकासी ई कत्थन मेंजा ती नगदे अकबकरा अरा आद सोच'आ हेलरा का, “ईद एका लेक्खा परिछ'अना हवे?” 30ख़ने पैकस अदिन बाचस, “अनय मरियम अमय एल्चय, धर्मेस निंग्है ती रिझ्रदस। 31ऎरय! नीन ओत्थाऎख़ मनोय अरा नीन ओन्टा कुक्को ख़द्दासिन नेब्बोय। आसी नामे येसु पिंजके।#मत्ता 1:21 32आस उर्मी ती कोहाँ मनोस, अरा उर्मी ती कोहाँ धर्मेसी तंग्दस बातार'ओस। धर्मे उर्बस आसी पूरखा दाऊद बॆलासी लेक्खा आसिन राजी ननू कम'ओस।#2सामु 7:12,13,16; यसा 9:7 33आस याकॊबसी बनस ता आलारिन मुंजामलका गूटी राजी ननोस, अरा आसी राजी कहियों माल मुंज्र'ओ।”
34ख़ने मरियम पैकासिन बाचा, “एन्ने एकासे मनो, ऎन गा डिंडा र'अदन?”
35पैकस बाचस, “नेम्हा बॊलतस निंग्है मइय्याँ बर'ओस, अरा उर्मी ती कोहाँ धर्मेसी सवंग निंग्है मइय्याँ ऎख़ ननो। औंगे एका बॊलॊ ख़द्दस कुन्द्र'ओस आस नेम्हा मनोस, अरा आस धर्मेसी तंग्दस बातार'ओस। 36ऎरय, निंग्है पाहिनी एलिसबेत, एकाद बंझली बातारकीचा, आद हूँ पच्चना बेड़ा नू ओन्टा ख़द्दासिन नेब्बो, आद अक्कु ओत्थाऎख़ मनरकी छे महिना मंजकी र'ई। 37धर्मेस गा इन्द्रिइम हूँ नना ओंग्दस।”#उत्प 18:14
38ख़ने मरियम बाचा, “ऎन गा उर्बासी जॊंख़ पेल्लो हिकदन, एंगा गे निंग्है बाचका कत्था लेक्खा मनन नेकअन।” ख़ने पैकस असलेक किर्रिम बिच्चियस।
मरियम अरा एलिसबेत भेंटारना
39अबड़ा उल्ला नू मरियम सपड़ारा अरा लॆम यूदेया ही परता राजी ता ओन्टा नगरे नू केरा। 40असन आद जकरियासी एड़पा नू केरा अरा एलिसबेत आबोन परिछाचा। 41एकाबारी एलिसबेत मरियम ही परिछ'अनन मेंजा, ख़नेम ख़द्द अदही ऒदर नू उदकारा, अरा एलिसबेत नेम्हा बॊलतस ती निन्दिया केरा। 42अरा आद अकबकरनुम जॊरसरिया चिच्चियारनुम बाचा, “नीन मुक्कय नू तकदीर आली हवे, अरा नीन नेब्बोय आ ख़द्द हूँ तकदीर हवे। 43एंग्है उर्बासी तंगियो नीन एंग्है गुसन बर'आ गे ऎन ई बग्गे सोग्गे ख़क्खिय'अन। 44निंग्है परिछ'अना कत्था एंग्है ख़ेबदा नू मेन्द्रा ख़ने एंग्है ऒदर नू र'ऊ ख़द्द रिझ ती उदकारा। 45नीन तकदीर आली हवे, एन्देरगेका नीन पत्ताचकी का उर्बस निंग्है गुसन बाचका कत्था अन्नेम मनो।”
मरियम ही डंडी
46ख़ने मरियम बाचा,#1सामु 2:1-10
“एंग्है जिया उर्बासी ओहमा ननी।
47एंग्है बॊलता एंग्है बछाब'ऊ धर्मेस नू रिरयार'ई।
48एन्देरगेका आस तंग्है जॊंख़ पेल्लो एंग्है किइय्या ता दसन सोग्गे ती ईरियस।#1सामु 1:11
औंगे अक्कु ती उर्मी जुग ता आलर एंगन तकदीर आली ब'ओर।
49एन्देरगेका सवंग उय्युस धर्मेस एंगा गे कोहाँ कोहाँ नलख नंजकादस।
आसी नामे नेम्हा र'ई।
50अरा नॆ आसिन एल्चनर, आर ही मइय्याँ
आस जुग जुग गूटी सोग्गे ऎरदस।
51आस तंग्है सवंगिय ख़ेक्खा ती कोहाँ नलख नंजकादस।
आस तम्है जिया नू मोठाई सोच नू र'उरिन छितिर बितिर नंजस।
52राजी ननू आलारिन तंम्है गद्दी ती टिड्डस चिच्चस,
अरा लुदऊ जिया आलारिन कोहाँ नंजस।#अयु 5:11; 12:19
53आस कीड़ारिन दौ जिनिस ती उड़ताचस,
अरा उरुब आलारिन नीदी ख़ेक्खा ओथ्रस चिच्चस।
54-55आस नम्है पूरखर गे नंजकादस,
अन्नेम अब्राहमस अरा आसी बनसर गे
हुल्लो गूटी सोग्गे ऎरा गे सोच्चस।”#उत्प 17:7
56मरियम एलिसबेत गने मलागूटी तीन महिना रहचा, अरा ख़ॊख़ा नू तंग्है एड़पा किर्रिया।
यॊहन नूड़रत'उसी कुन्दुरना
57एलिसबेत ही उल्ला अंड़सिया ख़ने आद ओन्टा कुक्को ख़द्दासिन निब्बिया। 58उर्बस आद मइय्याँ बग्गे सोग्गे ईरकादस, इदन अदही अरबर-परबर अरा पाहियर मेंजर अरा अदही गने खुसमारर।
59आर ही अरबर-परबर अरा पाहियर ख़द्दासी आठ उल्ला नू खतना#1:59 यहूदी धरम नू ख़द्दर कुन्द्रका ही आठवाँ उल्ला नू कुक्को ख़द्दारिन नॆत ही सुध मना गे अरा आर धर्मेसी मन्नन ऎद'आ गे खतना नन्नर। इय्या ख़द्दर ही उम्बुलना ही टीप ता चपटन खंडनर। नॆत गे बरचर। आर ख़द्दस गे तम्बासी नामे ती जकरिया पिंजा गे सोच्चर।#लौव्य 12:3 60लिकिन ख़द्दासी तंगियो बाचा, “मला, ईसी नामे यॊहन पिंजना मनो।” 61ख़ने आर अदिन बाचर, “निंग्है पाहियर नू गा नॆखय हूँ एन्ने नामे मलकी।”
62ख़ने आर ख़द्दासी तम्बासिन चिन्हा ऎद'अरकी मेंजर का, “आसी नामे एन्देर पिंजा बेद्ददय?” 63आस लिखना ही पट्टियन ने'अरकी लिखचस चिच्चस, “आसी नामे यॊहन” अरा ओर्मर अकबकरर। 64लेथेम आस कछनख्र'आ हेलरस, अरा आस धर्मेसी ओहमा नना हेलरस। 65आर ही उर्मी अड्डे-बेड्डे ता आलर नू इल्चका कोरचा केरा। अरा यूदेया ही परता राजी उर्मी नू इबड़ा उर्मी कत्थन आलर कछनख्र'आ हेलरर। 66अरा इदन मिनू आलर अकबकरर ती बाचर, “ईस परदोस होले ई ख़द्दस एकासे मनोस?” एन्देरगेका आर अक्खर का उर्बासी सवंग आसी गने रहचा।
जकरियासी डंडी
67आ ख़द्दासी तम्बस जकरियास नेम्हा बॊलतस ती निन्दियस ती धर्मेसी कत्थन मुन्द तेंगा हेलरस।
68“इस्राऎल ही धर्मे उर्बस गे ओहमा मनन नेकअन,
एन्देरगेका आस तंग्है आलारिन नाड़ा गे बरचकादस।
69आस तंग्है जॊंख़स दाऊद बॆलासी बनस ती
ओन्टा सवंगिय नाड़ुसिन तइय्कादस।
70आस तंग्है नेम्हा धर्मेसी कत्था तिंगुर ती हुल्लो नू बाचकाचस का
71नम्है बैरिर अरा नम्है धोकहर जम्मेर ही ख़ेक्खा ती नमन नाड़ोस,
72अरा तंग्है नेम्हा गच्छरकन सोच'अरकी
नम्है पूरखर मइय्याँ सोग्गे ईरकादस।
73आस नम्है पूरखा अब्राहमस गे किरया मॊख़रकी,
74नम्है बैरिर ही ख़ेक्खा ती नाड़ोस,
75अरा नम्है उज्जना उल्ला गूटी आसी मुन्दहारे
नेम्हा अरा उजगो नू बिगर इल्चका ती
सुसर'आ गे सवंग चि'ओस।
76अना एंग्है ख़द्दायो,
नीन उर्मी ती कोहाँ धर्मेसी कत्था तिंगू आल बार'ओय,#मला 3:1
एन्देरगेका नीन उर्बासी डहरेन सपड़'आ गे आसी मुन्द ऎकोय।
77नीन आसी आलर गे तम्है पाप छमा मन्ना ती
नाड़रना ही लूर चि'ओय।
78नम्है धर्मेसी कोहाँ चोन्हा ती
नमा गे मेर्ख़ा ती नाड़ुस बर'ओस।
79ऊख़ा नू उज्जुरिन अरा खे'अना ही एलचना नू र'उरिन बिल्ली ऎद'आ गे
अरा नम्है कोड़े ही डहरे नू ऎकत'आ गे आस बर'ओस।”#यसा 9:2
80आ ख़द्दस परदनुम अरा बॊलता नू बड़ियर मन्नुम केरस। अरा आस इस्राऎलर नू अरगी ऎथ्रना गूटी टोड़ंग नू रहचस।
Currently Selected:
लूकस 1: KURUXBSI
Highlight
Share
Copy
Want to have your highlights saved across all your devices? Sign up or sign in
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
