लूकस 2
2
येसुसी कुन्द्रना
(मत्ता 1:18-25)
1अबड़ा उल्ला नू कैसर अगुस्तुस तरती पॆसका उरखा का रोमी आकुस ही किय्या अबड़ा उर्मी राजी ता आलर तम्है नामे लिखर'ओर। औंगे सरकार आर ही ती टेकस ऊज'आ ओंगो। 2कुरॆनियुस सीरिया चक ही राजीख़ापुस र'ओ बारी मंजका पहिल नामेन लिखरना#2:2 नामेन लिखरना (जनगंना) मने आलारिन अरा आर ही खुर्जी दरा अड्डो मेक्खोन गन्ना। ईद रहचा। 3ख़ने ओर्मा आलर तम्है नामे लिखर'आ गे तम्है तम्है पूरखर ही नगरे केरर।
4यॊसॆफस हों गलिलेया जिला ता नासरेत नगरे ती यूदेया जिला ता दाऊद बॆलासी ओक्करका नगरे बॆतलहेम#2:4 बॆलस दाऊदसी कुन्द्रका परदका नगरे। केरस, एन्देरगेका आस दाऊदसी बनस ता रहचस। 5आस तंगा सौदाचका मरियम गने नामे लिखर'आ गे केरस एकदा ऒत्थाऎख़ रहचा। 6-7आर बॆतलहेम केरर ख़ने आर गे धरमसाला नू कुठली मल ख़क्खरा। औंगे आर गोयसाली नू रहचर। आर ही असन र'अनुम मरियम ही उल्ला अंड़सिया। आद तंग्है जेट्ठा ख़द्दासिन निब्विया। आर ख़द्दासिन किचरी नू पुज्जियर ती चरनी नू कीदर।
महरर येसुसी पत्त नू मेन्ना
8आ माख़ा आ चक नू महरर टोंका नू तम्है भेंडो गोंहड़ा गुट्ठिन ख़ापालियर। 9आचका उर्बस ती ओन्टा पैकस आर गे ऎथ्रस, अरा उर्बासी महबा ही बिलचना महरर ही ओनबेंड़र'आ बिल्चिया। अरा आर नगदे इल्चियर। 10ख़ने मेर्ख़ा पैकस आरिन बाचस, “अमा एल्चा, ऎरा, ऎन निमा गे दौ कत्थन मेन्त'आलदन का आद ओर्मा आलर गे कोहाँ खुसमारना र'ओ। 11इन्ना दाऊद बॆलासी नगरे नू निमन बछाब'उस कुन्द्रकादस, आसिम मसी#2:11 मसी मने ‘धर्मेस तइय्योन एन्ने गच्छरका बॆलस।’ उर्बस। 12निमा गे इदही एन्ने चिन्हा मनो। नीम ख़द्दासिन किचरी नू पोजोरका अरा चरनी नू कीदरका ख़क्खोर।” 13ख़नेम आचका ही आ पैकस गने मेर्ख़ा पैकर ही ओन्टा ख़ोंड़हा ऎथ्रर ती धर्मेसी ओहमा नंजर ती बाचर,
14“मेर्ख़ा नू धर्मेसी महबा मनन,
अरा ख़ॆख़ेल नू नॆ धर्मेसिन खुसमारत'अनर
अबड़ा ओर्मर गे सान्ति मनन।”
15मेर्ख़ा पैकर आर ही गुसते मेर्ख़ा किर्रिम बिच्चियर ख़ने महरर ताम ताम बाचर, “गुचा, नाम बॆतलहेम क'ओत ती ई मंजका कत्थन ऎरोत एका पत्त नू उर्बस नमन तिंकादस।” 16आर लॆम नगरे नू केरर अरा मरियम अरा यॊसॆफसिन अरा चरनी नू कीदरका आ बॊलॊ ख़द्दासिन ईरयर। 17महरर आसिन ईरका ख़ॊख़ा असन एन्देर एन्देर मंजा अरा ख़द्दासी पत्त नू मेर्ख़ा पैकस आरिन एन्देर एन्देर तिंगियस अदिन ओर्मारिन तिंगियर। 18महरर ही इबड़ा कत्था गुट्ठिन मेंजर आर ओर्मर अकबकरर। 19लिकिन मरियम इबड़ा जम्मा कत्था गुट्ठिन तंग्है जिया नू अरबिया उइय्या ती सोच'आलिया। 20एकासे आर ही ती बातारकी रहचा, अन्नेम महरर जम्मन ईरयर अरा मेंजर ती धर्मेसी महबा अरा ओहमा नन्नुम किर्रियर केरर।
धर्मेसी मन्दिर नू बॊलॊ येसुसिन हो'अना
21ख़द्दासी आठ उल्ला पूरचा ख़ने नैगर ती आसी खतना नन्ताचर अरा आसी नामे येसु पिंजियर। ई नामे दिम आस मरियम ही ऒदर नू मन्ना ही मुन्द मेर्ख़ा पैकस तिंकाचस।#लौव्य 12:3; लूक 1:31
22मूसासी नॆग ही लेक्खा इकला आर ही सुध मन्ना ही बेड़ा अंड़सिया, ख़ने आर ख़द्दासिन येरुसलॆम मन्दिर होच्चर का उर्बस गे आसिन सोंप'ओर। 23(एकासे का उर्बासी नॆग नू लिखचका र'ई, “उर्मी जेट्ठा ख़द्दस उर्बस गे नेम्हा मनोस।”#निर्ग 13:2,12) 24अउर हूँ आर उर्बासी नॆग लेक्खा “पंड़की ही ओन जोड़ा महले पेरवाँ ही दुई गोट ख़द्द”#लौव्य 12:6-8 ओन्द्रर ती दाँड़े नंजर।
धर्मेसी कत्था तिंगुस सुमेयॊन
25आ बेड़ा येरुसलॆम नू सुमेयॊन नामे ओन्टा पचगी रहचस। आस उजगो अरा भगती आलस रहचस। आस इस्राऎल ही नाड़रनन ओन्द्र'उसी पाब ऎरालियस। अरा नेम्हा बॊलतस आसी मइय्याँ रहचस। 26नेम्हा बॊलतस आसिन एन्ने बाचकाचस का एका गूटी आस उर्बासी मसीसिन माल ऎरोस आ गूटी आस मल खे'ओस। 27आस बॊलतासी कड़हाब'अना ती आउलम धर्मेसी मन्दिर नू बरचस। एकाबारी तंग्यो तम्बा ख़द्द येसुसिन नॆग ही चाल लेक्खा उर्बस गे सोंप'आ गे धर्मेसी मन्दिर भितरी ओन्द्रर। 28सुमेयॊनस ख़द्दासिन पक्कियस ती धर्मेसी ओहमा नंजस ती बाचस,
29“अना उर्बायो, नीन एंगन निंग्है जॊंख़ासिन
निंग्है आनका कत्था लेक्खा
अक्कु ऎन सान्ति ती खे'ओन।
30एन्देरगेका एंग्है ख़न्न निंग्है नाड़ुसिन ईरकी र'ई,
31नीन आसिन ओर्मा आलर गे सपड़ाचकय।
32ईस नन-यहूदीर गे धर्मेसिन दहदर नन्ना ही बिल्ली
अरा निंग्है निज आलर इस्राऎल गे महबा आबोन ओन्द्र'ओस।”#यसा 42:6; 49:6; 52:10
33आसी तंगियो तम्बा आसी पत्त नू बाचका कत्थन मेनरकी अकबक मंजर। 34फिन सुमेयॊनस आर गे आसीस चिच्चस, अरा तंगियो मरियम आबोन बाचस, “ऎरय, धर्मेस ई ख़द्दासिन इस्राऎल नू बग्गे आलारिन धर्मेस ती खत्तरत'आ गे अरा बग्गे आलारिन खुसमारत'आ गे चज्जियस। ईस धर्मेस ती ओन्टा चेताब'अना ही चिन्हा र'ओस, लिकिन बग्गे आलर ईसिन हींड़'ओर। 35औंगे बग्गे आलर ही जिया ही मलदौ सोच गुट्ठी दहदर मनो। अरा आलर आसिन भयभयान सस्ती ननोर, आद ओन्टा तलवार निंग्है जियन आरपार उम्पना बेसे र'ओ।”
धर्मेसी कत्था तिंगू आली हन्ना
36हन्ना नामे ओन्टा धर्मेसी कत्था तिंगू आली हूँ धर्मेसी मन्दिर नू रहचा। आद आसॆरसी गोतोर नू फनुऎलसी तंग्दा रहचा। आद नगदे पच्चकी किरकी रहचा। आद बेंज्रका ख़ॊख़ा तंग्आलस गने सात बछर लेका र'आ उंकी रहचा। फिन आस केच्चस केरस। 37तहाँ आद चौरासी बछर ती रड़ियाही रहचा। आद धर्मेसी मन्दिरन कहियों मल अम्बालिया। आद उल्ला माख़ा उपास अरा बिन्ती नन्नरकी धर्मेसी महबा ननालिया। 38आद हूँ आ बेड़ा नू असन बरचा ती धर्मेसी ओहमा नना हेलरा। अरा आद नॆ येरुसलॆम ही बछरना ही पाव ऎरालियर अबड़र ती ख़द्दस येसुसी पत्त नू कछनख्र'आ हेलरा।
39ख़ने यॊसॆफ अरा मरियम उर्बासी नॆग लेक्खा जम्मन मुंजा ख़च्चियर ती गलिलेया जिला ही तम्है पद्दा नासरेत किर्रियर।#मत्ता 2:23 40ख़द्द येसुस परदनुम अरा सवंगिय मन्नुम केरस। अरा आस लूर ती बड़ियर मन्नुम केरस। अरा धर्मेसी मया हूँ आसी गने रहचा।
धर्मेसी मन्दिर नू ख़द्द येसुस
41येसुसी तंगियो तम्बा चानुम कट्टना परब#2:41 यहूदीर ही ओन्टा परब। इस्राऎल आलर मिसर राजी ती उरखना ही मुन्द माख़ा धर्मेसी पिटना पैकस आरिन कट्टरकी मिसर राजी ता आलर ही जेट्टा ख़द्दारिन पिटियस। इदन यहूदीर कट्टना परब मन्नर। नू येरुसलॆम कालालियर।#निर्ग 12:1-27; व्य 16:1-8 42इकला येसुस बारा बछर ही रहचस ख़ने, आर तम्है चाल लेक्खा परब गे येरुसलॆम केरर। 43परब गुदरारका ती आर एड़पा किर्रा हेलरर। येसुस गा येरुसलॆम नू रही केरस। इदन तंगियो तम्बा बल्ला लगियर। 44आर सोच'आ लगियर का आस तम्है संगेर गने र'अस। आर उन्दुल ही डहरे ईक्काचर। अदही ख़ॊख़ा आर आसिन तम्है पाहियर नू अरा तम्है संगेर नू बेद्दा हेलरर। 45लिकिन आस मल ख़क्खरस, ख़ने आर बिद्दनुम बिद्दनुम येरुसलॆम किर्रियर। 46तिसर उल्ला नू आर आसिन धर्मेसी मन्दिर नू यहूदी सिखाब'उर गने ओक्करकी आर ती कत्था मेन्ना अरा आरिन प्रसन मेन्ना ख़क्खियर। 47ऎ बग्गे आलर येसुसी कत्थन मेनालियर आर आसी बुझुरना ती अरा आसी उत्तर चि'अना ती अकबकरर केरर। 48येसुसी तंगियो तम्बा आसिन ईरियर ती अकबकरर। अरा आसी तंग्यो आसिन बाचा, “अना ख़द्दायो, नीन एम्है गने एन्देरगे एन्ने नंजकय? ऎरा, निम्बस अरा ऎन हेन्दो मंजकम ती निंगन बेद्दा लिक्कम।” 49येसुस आरिन बाचस, “नीम एंगन एन्देरगे बेद्दालिक्कर? नीम बल्दर का एंगा एम्बासी एड़पा नू र'अना दिम र'ई?” 50लिकिन एका कत्थन येसुस आरिन बाचस अदिन आर मल बुझ्रर। 51तहाँ आस आर ही गने नासरेत किर्रियस, अरा आर ही आकुस नू रहचस। लिकिन तंगियो इबड़ा जम्मा कत्थन तंग्है जिया नू उइय्या। 52येसुस लूर अरा परदनुम उसुगनुम केरस। अरा आलर आसिन पत्तारर अरा धर्मेस आस ती खुसमरस।#1सामु 2:26; नीति 3:4
Currently Selected:
लूकस 2: KURUXBSI
Highlight
Share
Copy
Want to have your highlights saved across all your devices? Sign up or sign in
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
