मरकुस 16

येसुसी उज्‍जा चो'अना

(मत्ता 28:1-8; लूक 24:1-12; यॊ 20:1-10)

1ख़न्न ऎख़ना उल्‍ला मुं‍जरा, ख़ने मरियम मगदलेनी अरा याकॊबसी तंग्‍यो मरियम अरा सलोमी गमगमरना इसुंग अरा गमगमरना जिनिस ख़ीन्‍दियर। इदगे का आर कालरकी येसुसी मॆद नू नलभा#16:1 एन्ने नन्ना यहूदीर ही चाल हवे। ओंगोर। 2आर हप्‍ता ही पहिल उल्‍ला एतवार पैरी, बीड़ी अरगो बारी मसड़ा तरा केरर। 3-4अरा डहरे नू ताम तामिम कछनख्र'आलियर, “नमा गे मसड़ा ही बली ता पखनन नॆ ताड़'ओ?” आ पखना नगदे कोहाँ रहचा। लिकिन आर अंड़सियर ती उर्दका पखनन ताड़रका ईरियर।

5आर मसड़ा ही भितरी केरर, ख़ने ओन्‍टा जॊंख़ासिन पं‍डरू किचरी अत्तका तीना चोक्‍ख उक्‍का ईरियर ती इल्चियर। 6आ पैकस आरिन बाचस, “अमा एल्चा, नीम क्रुस नू ठोकचका नासरेत ता येसुसिन बेद्ददर। आस इसन मलकस। आस केचका ती उज्‍जा चॊचस। आसी कीदका अड्डन ऎरा। 7अक्‍कुन नीम कला, चेलारिन अरा पतरसिन तेंगा का आस निमन ती मुन्‍द गलिलेया कालालदस, असन नीम आसिन ऎरोर, एकासे आस केचका मुन्‍द निमन बाचकाचस।”#मत्ता 26:32; मर 14:28

8आर मसड़ा ती उरखर ती बोंगर केरर, एन्‍देरगेका आर अकबकरर अरा इलचका ती बुदिरियर केरर। औंगे आर इलचका ती नॆकन हूँ एन्‍देर हूँ मल बाचर।

येसुस आसी संगेर गे ऎथ्रदस

(मत्ता 28:9,10; यॊ 20:11-18; लूक 24:13-35)

[9हप्‍ता ही पहिल उल्‍ला एतवार ख़ॆर चींख़ना बेड़ा येसुस केचका ती उज्‍जा चॊचस, अरा आस मुन्‍द मरियम मगदलेनी गे ऎथ्रस, अदही म‍इय्‍याँ ती सात गोटंग नादन आस ओथ्रकाचस। 10आद कालरकी आसी चेलारिन इदन तिंगिया, नॆ चींख़ा ओलख़ालियर। 11एकाबारी आर मेंजर का येसुस उज्‍जा चॊचस अरा आसिन आद ईरिया, लिकिन आर इदन मल पत्ताचर।

12अदही ख़ॊख़ा येसुस तंग्है दुई झन संगेर पद्दा तरा कालालियर ख़ने, आर गे ऎथ्रस, लिकिन आर आसिन चिन्‍ह'आ पोल्‍लर। 13आर किर्ररकी बछरकर गे इदन तिंगियर। लिकिन आर आरिन मल पत्ताचर।

येसुस चेलारिन आनदस

(मत्ता 28:16-20; लूक 24:36-49; यॊ 20:19-23; त‍इ 1:6-8)

14ख़ॊख़ा अबड़ा ग्यारा चेलर मं‍डी ओना गे उक्‍कियर, ख़ने येसुस आर गे ऎथ्रस। अरा आर ही जिया मल भेदना अरा मल पत्त'अना ही चड्डे आस आरिन केप्‍पस। एन्‍देरगेका आर आसी उज्‍जा चॊचका ही ख़ॊख़ा आसिन ईरकारिन मल पत्ताचर।

15अरा आस आरिन आनियस,#त‍इ 1:8 “सौंसे ख़ॆख़ेल नू कला अरा उर्मी आलर गे दौ कत्‍थन मेन्‍त'आ। 16नॆ पत्त'अरकी एंग्‍है नामे नू नॊड़र'ओस आसिन धर्मेस बछाब'ओस। अरा नॆ मल पत्त'ओस आसिन धर्मेस दंडे चि'ओस। 17अरा पत्त'उर गे इबड़ा चिन्‍हा मनो: आर एंग्‍है आकुस ती नादन ओथ्र'ओर, पुना पुना भखा कछनख्र'ओर। 18आर नेर्रेन धर'ओर अरा महुरन ख़प्‍पोर होले हूँ आर एन्‍देर हूँ मल मनोर। अरा आर बिमरहर म‍इय्‍याँ ख़ेक्खा उइय्‍योर होले आर कोड़े मनोर कालोर।”

धर्मेस येसुसिन मेर्ख़ा हो'अदस

(लूक 24:50-53; त‍इ 1:9-11)

19ख़ने उर्बा येसुस आर ही गने कत्‍था कछनख्रका ही ख़ॊख़ा धर्मेस येसुसिन मेर्ख़ा होच्‍चस, अरा आस धर्मेसी तीना चोक्‍ख उक्‍कियस।#त‍इ 1:9-11 20अरा चेलर उरखरकी उर्मी अड्डा नू दौ कत्‍थन मेन्‍ताचर। अरा उर्बस आरिन अकबक नलख नन्‍त'अना नू आर ही गने नलख ननालियस। इबड़ा नलख गुट्ठी ई कत्‍थन मानिम साबित नंजा।] आमेन।

Currently Selected:

मरकुस 16: KURUXBSI

Highlight

Copy