PHILIPPI 4
4
Ki jingsneng
1Kumta te, ko parabangeit jong nga, haduh katno phi long kiba ieit ïa nga bad haduh katno nga la sngewtmang ïa phi! Haduh katno phi pynkmen ïa nga, bad haduh katno nga sngewsarong namar jong phi! Kane te, ko ki parabangeit ba-ieit, ka long kumno phi dei ban ïeng skhem ha ka jingim jong phi ha U Trai.
2Nga sngewbha ban kyrpad ïa ka Ïuodia bad ka Suntukhi, ban pyrshang ban ïamynjur kum shi para ha U Trai. 3Bad ïa phi ruh, ko paralok baïaineh jong nga, nga kwah ïa phi ban ïarap ïa kine ki kynthei; naba ki la trei shitom lem bad nga ban pynsaphriang ïa ka gospel, ryngkat bad u Klemen, bad baroh kiwei pat ki para nongïatrei lem jong nga, kiba ki kyrteng jong ki, ki don ha ka kitab jong kiba im jong U Blei.
4Ai ba phin shadkmen borabor ha U Trai; nga ban biang ïa ka: To ïakmen.
5To pynpaw ïa ka jinglong jemnud sha uwei pa uwei baroh. U Trai u la jan wan. 6Wat khuslai shaphang kaei kaei, hynrei ha ki jingduwai jong phi baroh, to pan na U Blei ïa kaei kaba phi donkam, da pan borabor na u da ka dohnud kaba sngewnguh. 7Bad ka jingsuk U Blei kaba palat ïa ka jingshemphang briew baroh, kan ri jai jai ïa ki dohnud jong phi, bad ïa ki jingmut jong phi ha U Khrist Jisu.
8Ha kaba wai noh, ko parabangeit jong nga, to pyndap ïa ki jingmut jong phi da kito kiei kiei kiba bha bad kita kiba dei ïaroh: Kiei kiei kiba shisha, kiba donburom, kiba beit, kiba khuid, kiba itynnat, bad kiba donburom. 9Pyntreikam ïa kaei kaba phi la nang bad ïohpdiang na nga, na ki ktien jong nga bad ki kam jong nga. Bad U Blei uba ai ha ngi ka jingsuk, un long lem bad phi.
Ki jingai khublei na ka bynta ka jingai sngewbha
10Ha ka jingim jong nga ha U Trai ka long ka jingkmen kaba khraw ïa nga ba hadien ka por kaba slem bha, sa shisien pat phi ïoh ka lad ban pyn-i ba phi sumar ïa nga. Ngam mut ba phi la sangeh kaba sumar ïa nga — phim shym la ïohlad ban pyn-i ïa kata. 11Bad ngam shym ong ïa kane namar ba nga la shah leh klet, naba nga la nang ban sngewhun ha kaei kaba nga don. 12Nga sngewthuh kumno ka long haba kyrduh, bad kumno ka long ban don pahuh kyrhai. Nga la nang ïa kane ka buit barieh, ba hangno hangno ha kano kano ka por, nga sngewhun haba lada nga sngewdap kyrhai ne sngew kyrduh lane haba nga don palat than eh ne don khyndiat eh. 13Nga don ka bor ban mad ïa baroh ki jinglong da ka bor kaba U Khrist u ai ïa nga.
14Hynrei ka long kaba bha shibun ïa phi ban ïarap ïa nga ha ki jingjynjar jong nga. 15Phi ki nong Philippi phi tip bha shibun ba haba nga la mihnoh na Makedonia ha ki sngi kiba sdang ban ïalap ïa ka Khubor Babha, phi dei tang ma phi ka balang ban ïarap ïa nga; phi dei tang ma phi kiba la shim bynta ha ki jingïoh bad jingduh jong nga. 16#Ki Kam. 17:1#2 Kor. 11:9Palat ïa shisien, haba nga donkam jingïarap ha Thessaloni, phi la phah ïa ka sha nga. 17Ym dei tang namar ba nga shu kwah ban ïohpdiang ïa ki jingai sngewbha jong phi; pynban, nga kwah ban ïohi ba la pynlang ïa ka jingïohnong ha ka jingbuh jingkheiñ jong phi. 18#Eks. 29:18Hangne, te, ka long ka jingïohpdiang jong nga ïa kiei kiei baroh ba phi la ai ha nga — bad ka la long palat ban ïa kaba nga donkam! Nga don ïa baroh kaba nga donkam mynta ha kaba u Epaphroditos u la wanrah sha nga ïa ki jingai sngewbha baroh jong phi. Ki long kum ka jingainguh ba-iwbih sha U Blei, ka jingkñia kaba pdiang hun bad kaba pynsngewbha ïa u. 19Bad da baroh ka spah bakyrhai jong u lyngba U Khrist Jisu, U Blei jong nga un pyndap ïa ka jingdonkam jong phi baroh. 20Ha U Blei bad U Kpa jong ngi, long ka burom junom la junom! Amen.
Ki jingkhublei khatduh
21To ai khublei ïa uwei pa uwei na ki briew jong U Blei kiba ha U Khrist Jisu. Ki parabangeit hangne lem bad nga ki phah sha phi ki jingkhublei jong ki. 22Baroh ki briew U Blei hangne ki phah ïa ki jingai khublei, khamtam kito kiba na ka ïingsyiem jong u Patsha.
23To ka jingaiei jong U Jisu Khrist uba U Trai kan long lem bad phi baroh.
Currently Selected:
PHILIPPI 4: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
