PHILIPPI 1

1 # Ki Kam. 16:12 Na u Paul bad u Timothi, ki shakri U Khrist Jisu — Sha baroh ki briew jong U Blei ha Philippi kiba ha U Khrist Jisu, kiba ki kynthup ïa ki nongïalam balang bad ki nongïarap. 2To ai ba U Blei uba U Kpa jong ngi bad U Jisu Khrist uba U Trai jong ngi un ai ha phi ka jingaiei bad ka jingsuk.

U Paul u duwai na ka bynta ki parabangeit jong u

3Nga ainguh ïa U Blei jong nga namar jong phi man la ka por ba nga pyrkhat shaphang jong phi, 4bad man la ka por nga duwai na ka bynta jong phi baroh, nga duwai da ka jingkmen, 5namar ka rukom kaba phi la ïarap ïa nga ha ka kam jong ka gospel sha kiwei pat naduh ka sngi kaba sdang haduh mynta. 6Bad kumta nga sngewskhem ba U Blei, uba la sdang ïa kane ka kam babha ha phi, un ïai trei ha phi haduh ba yn da pyndep ïa ka ha kata ka Sngi jong U Khrist Jisu. 7Phi long borabor ha ka dohnud jong nga! Kumta ka long kaba dei ïa nga ban sngew kumba nga sngew shaphang jong phi. Namar phi baroh phi la ïoh bynta lem bad nga ha kane ka lad kaba U Blei u la ai ha nga, mynta haba nga don ha byndi bad ruh haba nga la long laitluid ban ïada ïa ka gospel bad ha kaba tei pynskhem ïa ka. 8U Blei u long u sakhi jong nga, ba nga ïathuh ïa ka jingshisha, haba nga ong ba ka jingsngew bajylliew na ka bynta jong phi baroh, ka wan na ka dohnud U Khrist Jisu hi.

9Nga duwai ba ka jingieit jong phi kan nang ïoh roi kyrhai shuh shuh, ryngkat bad ka jingtip bashisha bad ka jingbishar bajanai; khnang ba phi lah ban jied ïa kaei kaba bha tam. 10Te phin long kiba lait na baroh ki jingbymkhuid bad khlem shah kynnoh pop ha ka Sngi U Khrist. 11Ïa ka jingim jong phi yn pyndap da ki jinglong babha shisha kiba tang U Jisu Khrist u lah ban pynmih, na ka bynta ka burom bad ka jingïaroh ïa U Blei.

Ban im ka long U Khrist

12Nga kwah ïa phi ban tip, ko parabangeit jong nga, ba kiei kiei kiba la jia ha nga ki la ïarap da shisha ïa ka jingpynroi ïa ka gospel. 13#Ki Kam. 28:30Kaba mih nangta ka long, ba ka kynhun nongap phira jong ka ïingsyiem baroh kawei bad baroh kiwei pat hangne, ki tip ba nga don ha ka byndi namar nga long u shakri jong U Khrist. 14Bad ka jingdon jong nga ha byndi, ka la ai ïa kiba bun eh ki parabangeit ban kham sngewskhem ha U Trai, khnang ba kin nang kham shlur ha ki por baroh ban ïalap ïa ka khubor khlem sheptieng.

15Da shisha katto katne ngut na ki, ki ïalap ïa U Khrist namar ka jingpihuiñ bad ka jingïakajia, hynrei kiwei pat na ka mon kaba khuid. 16Kine ki leh kumta na ka jingieit, namar ki tip ba U Blei u la ai ha nga ïa ka kam ban ïada ïa ka gospel. 17Kiwei pat, kim ïalap ïa U Khrist da kaba sngur, hynrei na ka mynsiem ka jingkwah rhah; ba ki da pyrkhat ba kin nang pynjynjar shuh shuh ïa nga katba nga dang don ha byndi.

18Kam lei lei! Nga sngewkmen shaphang kata, katba ïa U Khrist dang ïai ïalap ha ka rukom baroh, la na ki jingthmu bymdei ne badei. 19Bad ngan ïailong uba kmen, namar nga tip ba da ki jingduwai jong phi bad da ka jingïarap kaba wan na U Mynsiem jong U Jisu Khrist, ïa nga yn sa pyllaitluid. 20Ka jingkwah bajur bad ka jingkyrmen jong nga ka long ba ngan ym shah rem ha ka kamram jong nga, hynrei, ha ki por baroh, bad kyrpang ïa mynta hi, ngan da long uba dap da ka jingshlur, khnang ba da ka longrynïeng jong nga baroh, ngan wanrah burom ïa U Khrist, la nga im ne nga ïap. 21Naba kaei ka jingim? Ïa nga, ka long U Khrist. Da ka jingïap, te, ngan wallam kham bun. 22Hynrei, lada, da kaba nga lah ban leh shuh shuh ka kam kaba myntoi, te ngam thikna ïa kano nga dei ban jied. 23Ïa nga la tan ha ki ar bynta. Nga da kwah eh ban iehnoh ïa kane ka jingim bad ban don bad U Khrist, kaba long kaei kaei kaba kham bha; 24hynrei na ka bynta jong phi, kan kham donkam shibun eh ba ngan dang im. 25Nga sngewskhem ïa kane bad kumta nga tip ba ngan dang sah. Ngan dang ïaisah bad phi baroh, ban pynsan shuh shuh ïa phi bad ïa ka jingkmen ha ka jingngeit, 26khnang ba haba nga don pat bad phi, phin don wat kham bun ka daw ban sngewsarong ïa nga ha ka jingim jong phi ha U Khrist Jisu.

27Mynta, ka bynta kaba donkam eh ka long, ba ka rukom ka jingim jong phi ka dei ban long kat kumba ka gospel U Khrist ka dawa, khnang ba, la nga lah ne ngam lah ban leit bad ïohi ïa phi, ngan ïohsngew ba phi ïeng skhem ha kawei ka jingthmu, bad kata, da kawei ka jingthrang, phi ïakhun lang na ka bynta ka jingngeit ha ka gospel. 28Wat sheptieng ïa ki nongshun jong phi; long borabor kiba shlur, bad kane hi kan pynshisha ha ki, ba kin shah rem bad ba phin jop, namar dei U Blei uba ai ïa phi ka jingjop. 29Naba ïa phi la ai ka lad ban shakri ïa U Khrist, ym tang ban ngeit ha u, hynrei ban shahshitom ruh na ka bynta jong u. 30#Ki Kam. 16:19-40Mynta phi lah ban ïashim bynta lem bad nga ha ka thma. Ka dei kajuh ka thma kaba phi la ïohi ïa nga ba nga la ïaleh ha ki por kiba mynshuwa, bad kumba phi ïohsngew, ïa kata kaba nga dang ïaleh haduh mynta.

Currently Selected:

PHILIPPI 1: KHACLBSI

Highlight

Copy