PHILIPPI 2

Ka jingsngewrit bad ka jingkhraw U Khrist

1Ka jingim jong phi ha U Khrist ka pynlong khlaiñ ïa phi, bad ka jingieit jong u ka pyntngen ïa phi. Phi don ka jingïasyllok lem bad U Mynsiem, bad phi don ka jingsbun bad ka jingsngewsynei iwei ïa iwei pat. 2Te, nga kyrpad ïa phi, ban pynshlei ïa ka jingkmen jong nga da kaba don kijuh ki jingpyrkhat, kiba ïasam ïa kajuh ka jingieit, bad kiba don kawei ka mynsiem bad ka jingmut. 3Wat leh ei ei na ka jingkhwan myntoi lane na ka jingkwah bymmyntoi ban sngewsarong, hynrei, to long kiba sngewrit iwei ïa iwei pat, kiba ñiew borabor ïa kiwei kiba kham bha ban ïa lade. 4Bad to khmih ïa ki jingdonkam jong iwei ïa iwei pat, ym tang ïa la ka jong. 5Ka jingmut kaba phi dei ban don ka long kata kaba U Khrist Jisu u la don:

6U don borabor ïa ka jinglong U Blei;

hynrei um shym pyrkhat ïa kata da ka bor

ba u dei ban pyrshang ban pynlong mar ryngkat bad U Blei.

7Ha ka jaka kane, da ka mon balaitluid u kheiñduh noh ïa baroh

kaba u don, bad u la shim ïa ka jinglong u shakri.

U kylla long u kum u briew,

bad u la wanpaw ha ka dur u briew.

8U la long uba sngewrit bad u la ïaid ha ka lynti

jong ka jingkohnguh baroh shi lynter lynti sha ka jingïap —

ka jingïap jong u halor ka diengphna.

9Na kane ka daw U Blei u la kyntiew eh ïa u

sha ka jaka kaba hajrong tam eh,

bad u la ai ha u ïa ka kyrteng kaba kham khraw

ban ïa kano kano kawei pat ka kyrteng.

10 # Isa. 45:23 Bad kumta, kum ka burom ïa ka kyrteng U Jisu

baroh ki jingthaw ha bneng, ha pyrthei

bad ha ka pyrthei hapoh

kin dem khrup ha ki khohsiew jong ki,

11bad baroh kin pynbna shynna

ba U Jisu Khrist u long U Trai,

ïa ka burom U Blei uba U Kpa.

To tyngshaiñ kum ki jingshai ha ka Pyrthei

12Kumta te, ko ki paralok ba-ieit, kumba phi la kohnguh borabor ïa nga mynba nga la don bad phi, ka long kaba donkam shuh shuh ba phi kohnguh ïa nga mynta haba nga don jngai na phi. To ïai trei da ka jingsheptieng bad ka jingkhynñiuh ban pyndep noh ïa ka jingpynim jong phi, 13namar U Blei u trei borabor hapoh jong phi, ban pynlong ïa phi kiba don ka mon bad kiba lah ban kohnguh ïa ka jingthmu jong u hi.

14To leh ïa kiei kiei baroh khlem da khñium ne khlem ïania, 15#Deut. 32:5khnang ba phi lah ban long kiba lui lui bad kiba khuid kum ki khun kiba janai jong U Blei, kiba im ha ka pyrthei jong ki briew kiba bamsap bad kiba pop. Phi dei ban tyngshaiñ hapdeng jong ki kum ki khlur kiba pynshai ïa ka sahit bneng, kumba phi tyrwa ha ki ïa ka khubor jong ka jingim. 16Lada phi leh kumta, ngan don ka daw ban sngewsarong ïa phi ha ka Sngi jong U Khrist, namar kan pyn-i ba baroh ka jingpyrshang bad ka jingtrei jong nga kam shym la long kaba lehnoh-ei.

17Lehse ïa ka snam jong ka jingim jong nga la dei ban theh noh kum ka jingainguh halor ka jingkñia kaba long ka jingngeit jong phi ba ai sha U Blei. Lada kata ka long kumta, nga shadkmen bad nga ïasam bynta lem ïa ka jingkmen jong nga bad phi baroh. 18Ha kajuh ka rukom, phi ruh phi dei ban shadkmen, bad ïasam bynta lem ïa ka jingkmen jong phi bad nga.

U Timothi bad u Epaphroditos

19Lada ka long ka mon U Trai, nga kyrmen ba nga lah ban phah shen sha phi ïa u Timothi, khnang ba nga lah ban ïoh ka jingpynshlur da ka khubor shaphang jong phi. 20U long tang ma u marwei, uba sngewthuh ïa ki jingsngew jong nga, bad uba sngewlem shisha shaphang jong phi. 21Uwei pa uwei u sngewkhia tang ïa la ki jong ki kam, ym ïa kiei kiei ki jong U Jisu Khrist. 22Bad phi hi phi tip, kumno u la pynshisha ïa ka jingkordor jong u, kumno ma u bad ma nga, kum u khun bad u kpa jong u, ngi la ïatreilang na ka bynta ka gospel. 23Kumta nga kyrmen ban phah shen ïa u sha phi tang mar shu tip kumno kiei kiei kin long na ka bynta jong nga. 24Bad nga shaniah ha U Trai ba nga da lade hi, nga lah ban wan shen sha phi.

25Nga don ka jingpyrkhat ba ka donkam ban phah sha phi ïa u para jong ngi u Epaphroditos, uba la trei bad ïaleh ha syndah jong nga bad uba la shakri kum u nonglamktien jong phi ha kaba ïarap ïa nga. 26U kwah eh ban ïohi ïa phi baroh, bad u la sngew pisa shibun namar ba phi la ïohsngew ba u la pang. 27Da shisha u la pang bad u la jan ïap. Hynrei U Blei u la isynei ïa u, bad ym tang ïa u hynrei ïa nga ruh, bad u la pyllait ïa nga wat na ka jingsngewsih kaba kham khraw. 28Te, nga la kwah dik dik eh ban phah ïa u sha phi, khnang ba phin shadkmen pat haba phin ïohi ïa u, bad ka jingsngewsih jong nga kan jah noh. 29To pdiang ïa u, te, da ka jingkmen, kum u para ha U Trai. To phin ñiewburom ïa kiba kum kita ki briew kum ma u, 30namar u la kheiñduh ïa la ka jingim, bad u la jan ïap na ka bynta ka kam U Khrist, khnang ba un ai ïa nga ka jingïarap, kaba ma phi da lade phim lah ban ai.

Currently Selected:

PHILIPPI 2: KHACLBSI

Highlight

Copy